1 Thissaluneekiyon 3

hamaaray liyay dua karnaa

¹bhaaiyo, ek aakhiree baat, hamaaray liyay dua karen ki khudaavand ka paighaam jaldee say phail jaaay aur izzat paaay, bilkul usee tarah jis tarah aap kay darmiyaan hua. ²is kay liyay bhee dua karen ki allaah hamen ghalat aur shareer logon say bachaaay rakhay, kyoonki sab to eemaan naheen rakhtay.

³lekin khudaavand vafaadaar hai, aur vahee aap ko mazboot karkay iblees say mahfooz rakhega. ⁴ham khudaavand men aap par etimaad rakhtay hain ki aap vah kuchh kar rahay hain balki kartay rahengay jo ham nay aap ko karnay ko kaha tha.

⁵khudaavand aap kay dilon ko allaah kee muhabbat aur maseeh kee saabitqadmee kee taraf maail karta rahay.

kaam karnay ka farz

⁶bhaaiyo, apnay khudaavand eesa maseeh kay naam men ham aap ko hukm detay hain ki har us bhaaee say kinaara karen jo beqaaida chalta aur jo ham say paaee huee rivaayat kay mutaabiq zindagee naheen guzaarta. ⁷aap khud jaantay hain ki aap ko kis tarah hamaaray namoonay par chalna chaahiay. jab ham aap kay paas thay to hamaaree zindagee men betarteebee naheen paaee jaatee thee. ⁸ham nay kisee ka khaana bhee paisay diay baghair na khaaya, balki din raat sakht mehanat-mashaqqat kartay rahay taaki aap men say kisee kay liyay bojh na banen. ⁹baat yah naheen ki hamen aap say muaavaza milnay ka haq naheen tha. naheen, ham nay aisa kiya taaki ham aap kay liyay achchha namoona banen aur aap is namoonay par chalen. ¹⁰jab ham abhee aap kay paas thay to ham nay aap ko hukm diya, “jo kaam naheen karna chaahata vah khaana bhee na khaaay.”

¹¹ab hamen yah khabar milee hai ki aap men say baaz beqaaida zindagee guzaartay hain. vah kaam naheen kartay balki doosron kay kaamon men khwaah-m-khwaah dakhal detay hain. ¹²khudaavand eesa maseeh kay naam men ham aisay logon ko hukm detay aur samjhaatay hain ki aaraam say kaam karkay apnee rozee kamaaen.

¹³bhaaiyo, aap bhalaaee karnay say kabhee himmat na haaren. ¹⁴agar koee is khat men darj hamaaree hidaayat par amal na karay to us say taalluq na rakhna taaki usay sharm aaay. ¹⁵lekin usay dushman mat samajhna balki usay bhaaee jaan kar samjhaana.

aakhiree alfaaz

¹⁶khudaavand khud jo salaamatee ka sarchashma hai aap ko har vaqt aur har tarah say salaamatee bakhshay. khudaavand aap sab kay saath ho.

¹⁷main, paulus apnay haath say yah likh raha hoon. meree taraf say salaam. main isee tareeqay say apnay har khat par dastakhat karta aur isee tarah likhta hoon.

¹⁸hamaaray khudaavand eesa maseeh ka fazl aap sab kay saath rahay.