1 Thissaluneekiyon 2

“bedeenee ka aadmee”

¹bhaaiyo, yah savaal utha hai ki hamaaray khudaavand eesa maseeh kee aamad kaisee hogee? ham kis tarah us kay saath jama ho jaaengay? is naatay say hamaaree aap say darakhwaast hai ²ki jab log kahetay hain ki khudaavand ka din a chuka hai to aap jaldee say bechain ya pareshaan na ho jaaen. un kee baat na maanen, chaahay vah yah daava bhee karen ki un kay paas hamaaree taraf say koee nubuvvat, paighaam ya khat hai. ³koee bhee aap ko kisee bhee chaal say fareb na day, kyoonki yah din us vaqt tak naheen aaega jab tak aakhiree baghaavat pesh na aaay aur “bedeenee ka aadmee” zaahir na ho jaaay, vah jis ka anjaam halaakat hoga. ⁴vah har ek kee mukhaalafat karega jo allaah aur maabood kahelaata hai aur apnay aap ko un sab say bada thaheraaega. haan, vah allaah kay ghar men baith kar elaan karega, “main allaah hoon.”

⁵kya aap ko yaad naheen ki main aap ko yah bataata raha jab abhee aap kay paas tha? ⁶aur ab aap jaantay hain ki kya kuchh usay rok raha hai taaki vah apnay muqarrara vaqt par zaahir ho jaaay. ⁷kyoonki yah pur’asraar bedeenee ab bhee asar kar rahee hai. lekin yah us vaqt tak zaahir naheen hogee jab tak vah shakhs hat na jaaay jo ab tak usay rok raha hai. ⁸phir hee “bedeenee ka aadmee” zaahir hoga. lekin jab khudaavand eesa aaega to vah usay apnay munh kee phoonk say maar daalega, zaahir honay par hee vah usay halaak kar dega. ⁹“bedeenee kay aadmee” men iblees kaam karega. jab vah aaega to har qism kee taaqat ka izhaar karega. vah jhootay nishaan aur mojizay pesh karega. ¹⁰yoon vah unhen har tarah kay shareer fareb men phansaaega jo halaak honay vaalay hain. log is liyay halaak ho jaaengay ki unhon nay sachchaaee say muhabbat karnay say inkaar kiya, varna vah bach jaatay. ¹¹is vajah say allaah unhen buree tarah say fareb men phansnay deta hai taaki vah is jhoot par eemaan laaen. ¹²nateejay men sab jo sachchaaee par eemaan na laaay balki naaraastee say lutf’andoz huay mujrim thaherengay.

aap ko najaat kay liyay chun liya gaya hai

¹³meray bhaaiyo, vaajib hai ki ham har vaqt aap kay liyay khuda ka shukr karen jinhen khudaavand piyaar karta hai. kyoonki allaah nay aap ko shuroo hee say najaat paanay kay liyay chun liya, aisee najaat kay liyay jo rooh-ul-quds say paakeezgee pa kar sachchaaee par eemaan laanay say haasil hotee hai. ¹⁴allaah nay aap ko us vaqt yah najaat paanay kay liyay bula liya jab ham nay aap ko us kee khushkhabaree sunaaee. aur ab aap hamaaray khudaavand eesa maseeh kay jalaal men shareek ho saktay hain. ¹⁵bhaaiyo, is liyay saabitqadam rahen aur un rivaayaat ko thaamay rakhen jo ham nay aap ko sikhaaee hain, khwaah zabaanee ya khat kay zareeay.

¹⁶hamaara khudaavand eesa maseeh khud aur khuda hamaara baap jis nay ham say muhabbat rakhee aur apnay fazl say hamen abdee tasallee aur thos ummeed bakhshee ¹⁷aap kee hausalaaafzaaee karay aur yoon mazboot karay ki aap hamesha vah kuchh bolen aur karen jo achchha hai.