1 Thissaluneekiyon 1

¹yah khat paulus, silvaanus aur teemuthiyus kee taraf say hai.

ham thissaluneekiyon kee jamaaat ko likh rahay hain, unhen jo allaah hamaaray baap aur khudaavand eesa maseeh par eemaan laaay hain.

²khuda hamaara baap aur khudaavand eesa maseeh aap ko fazl aur salaamatee bakhshen.

maseeh kee aamad par adaalat

³bhaaiyo, vaajib hai ki ham har vaqt aap kay liyay khuda ka shukr karen. haan, yah mauzoon hai, kyoonki aap ka eemaan hairat’angez taraqqee kar raha hai aur aap sab kee ek doosray say muhabbat badh rahee hai. ⁴yahee vajah hai ki ham allaah kee deegar jamaaaton men aap par fakhar kartay hain. haan, ham fakhar kartay hain ki aap in dinon men kitnee saabitqadmee aur eemaan dikha rahay hain haalaanki aap bahut eezaarasaaniyaan aur museebaten bardaasht kar rahay hain.

⁵yah sab kuchh saabit karta hai ki allaah kee adaalat raast hai, aur nateejay men aap us kee baadshaahee kay laaiq thaherengay, jis kay liyay aap ab dukh utha rahay hain. ⁶allaah vahee kuchh karega jo raast hai. vah unhen museebaton men daal dega jo aap ko museebat men daal rahay hain, ⁷aur aap ko jo museebat men hain hamaaray samet aaraam dega. vah yah us vaqt karega jab khudaavand eesa apnay qavee farishton kay saath aasmaan par say a kar zaahir hogaa ⁸aur bhadaktee huee aag men unhen saza dega jo na allaah ko jaantay hain, na hamaaray khudaavand eesa kee khushkhabaree kay taabay hain. ⁹aisay log abdee halaakat kee saza paaengay, vah hamesha tak khudaavand kee huzooree aur us kee jalaalee qudrat say door ho jaaengay. ¹⁰lekin us din khudaavand is liyay bhee aaega ki apnay muqaddaseen men jalaal paaay aur tamaam eemaandaaron men hairat ka baais ho. aap bhee un men shaamil hongay, kyoonki aap us par eemaan laaay jis kee gavaahee ham nay aap ko dee.

¹¹yah pesh-ay-nazar rakh kar ham lagaataar aap kay liyay dua kartay hain. hamaara khuda aap ko us bulaavay kay laaiq thaheraaay jis kay liyay aap ko bulaaya gaya hai. aur vah apnee qudrat say aap kee nekee karnay kee har khwaahish aur aap kay eemaan ka har kaam takmeel tak pahunchaaay. ¹²kyoonki is tarah hee hamaaray khudaavand eesa ka naam aap men jalaal paaega aur aap bhee us men jalaal paaengay, us fazl kay mutaabiq jo hamaaray khuda aur khudaavand eesa maseeh nay aap ko diya hai.