2 Patras 3

khudaavand kee aamad ka vaadaa

¹azeezo, yah ab doosra khat hai jo main nay aap ko likh diya hai. donon khaton men main nay kaee baaton kee yaad dila kar aap kay zahenon men paak soch ubhaarnay kee koshish kee. ²main chaahata hoon ki aap vah kuchh yaad rakhen jis kee peshgoee muqaddas nabiyon nay kee thee aur saath saath hamaaray khudaavand aur najaatadihanda ka vah hukm bhee jo aap ko apnay rasoolon kee maarifat mila. ³avval aap ko yah baat samajhnay kee zaroorat hai ki in aakhiree dinon men aisay log aaengay jo mazaaq uda kar apnee shahevaton kay qabzay men rahengay. ⁴vah poochhengay, “eesa nay aanay ka vaada to kiya, lekin vah kahaan hai? hamaaray baapdaada to mar chukay hain, aur duniya kee takhleeq say lay kar aaj tak sab kuchh vaisay ka vaisa hee hai.” ⁵lekin yah log nazar’andaaz kartay hain ki qadeem zamaanay men allaah kay hukm par aasmaanon kee takhleeq huee aur zameen paanee men say aur paanee kay zareeay vujood men aaee. ⁶isee paanee kay zareeay qadeem zamaanay kee duniya par sailaab aaya aur sab kuchh tabaah hua. ⁷aur allaah kay isee hukm nay maujooda aasmaan aur zameen ko aag kay liyay mahfooz kar rakha hai, us din kay liyay jab bedeen logon kee adaalat kee jaaegee aur vah halaak ho jaaengay.

⁸lekin meray azeezo, ek baat aap say posheeda na rahay. khudaavand kay nazdeek ek din hazaar saal kay baraabar hai aur hazaar saal ek din kay baraabar. ⁹khudaavand apna vaada poora karnay men der naheen karta jis tarah kuchh log samajhtay hain balki vah to aap kee khaatir sabr kar raha hai. kyoonki vah naheen chaahata ki koee halaak ho jaaay balki yah ki sab tauba kee naubat tak pahunchen.

¹⁰lekin khudaavand ka din chor kee tarah aaega. aasmaan baday shor kay saath khatm ho jaaengay, ajraam-ay-falkee aag men pighal jaaengay aur zameen us kay kaamon samet zaahir ho kar adaalat men pesh kee jaaegee. ¹¹ab sochen, agar sab kuchh is tarah khatm ho jaaega to phir aap kis qism kay log honay chaahien? aap ko muqaddas aur khudaataras zindagee guzaartay hue ¹²allaah kay din kee raah dekhnee chaahiay. haan, aap ko yah koshish karnee chaahiay ki vah din jaldee aaay jab aasmaan jal jaaengay aur ajraam-ay-falkee aag men pighal jaaengay. ¹³lekin ham un naay aasmaanon aur naee zameen kay intizaar men hain jis ka vaada allaah nay kiya hai. aur vahaan raastee sukoonat karegee.

¹⁴chunaanchay azeezo, choonki aap is intizaar men hain is liyay pooree lagan kay saath koshaan rahen ki aap allaah kay nazdeek bedaagh aur beilzaam thaheren aur aap kee us kay saath sulah ho. ¹⁵yaad rakhen ki hamaaray khudaavand ka sabr logon ko najaat paanay ka mauqa deta hai. hamaaray azeez bhaaee paulus nay bhee us hikmat kay mutaabiq jo allaah nay usay ata kee hai aap ko yahee kuchh likha hai. ¹⁶vah yahee kuchh apnay tamaam khaton men likhta hai jab vah is mazmoon ka zikr karta hai. us kay khaton men kuchh aisee baaten hain jo samajhnay men mushkil hain aur jinhen jaahil aur kamzor log tod-marod kar bayaan kartay hain, bilkul usee tarah jis tarah vah baaqee saheefon kay saath bhee kartay hain. lekin is say vah apnay aap ko hee halaak kar rahay hain.

¹⁷meray azeezo, main aap ko vaqt say pahelay in baaton say aagaah kar raha hoon. is liyay khabardaar rahen taaki beusool logon kee ghalat soch aap ko baheka kar aap ko mahfooz maqaam say hata na day. ¹⁸is kay bajaay hamaaray khudaavand aur najaatadihanda eesa maseeh kay fazl aur ilm men taraqqee kartay rahen. usay ab aur abad tak jalaal haasil hota rahay! aameen.