2 Patras 2

jhootay ustaad

¹lekin jis tarah maazee men israaeel qaum men jhootay nabee bhee thay, usee tarah aap men say bhee jhootay ustaad khaday ho jaaengay. yah khuda kee jamaaaton men muhalak taaleemaat phailaaengay balki apnay maalik ko jaannay say inkaar bhee karengay jis nay unhen khareed liya tha. aisee harkaton say yah jald hee apnay aap par halaakat laaengay. ²bahut say log un kee ayyaash harkaton kee pairvee karengay, aur is vajah say doosray sachchaaee kee raah par kufr bakengay. ³laalach kay sabab say yah ustaad aap ko farzee kahaaniyaan suna kar aap kee loot-khasoot karengay. lekin allaah nay badee der say unhen mujrim thaheraaya, aur us ka faisla sustaraftaar naheen hai. haan, un ka munsif oongh naheen raha balki unhen halaak karnay kay liyay tayyaar khada hai.

⁴dekhen, allaah nay un farishton ko bachnay na diya jinhon nay gunaah kiya balki unhen taareekee kee zanjeeron men baandh kar jahennum men daal diya jahaan vah adaalat kay din tak mahfooz rahengay. ⁵isee tarah us nay qadeem duniya ko bachnay na diya balki us kay bedeen baashindon par sailaab ko aanay diya. us nay sirf raastbaazee kay paighambar nooh ko saat aur jaanon samet bachaaya. ⁶aur us nay sadoom aur amoora kay shaheron ko mujrim qaraar day kar raakh kar diya. yoon allaah nay unhen ibrat bana kar dikhaaya ki bedeenon kay saath kya kuchh kiya jaaega. ⁷saath saath us nay loot ko bachaaya jo raastbaaz tha aur beusool logon kay ganday chaal-chalan dekh dekh kar pista raha. ⁸kyoonki yah raastbaaz aadmee un kay darmiyaan basta tha, aur us kee raastbaaz jaan roz-ba-roz un kee shareer harkaten dekh aur sun kar sakht azaab men phansee rahee. ⁹yoon zaahir hai ki rabb deendaar logon ko aazmaaish say bachaana aur bedeenon ko adaalat kay din tak saza kay tahet rakhna jaanta hai, ¹⁰khaaskar unhen jo apnay jism kee gandee khwaahishaat kay peechhay lagay rahetay aur khudaavand kay ikhtiyaar ko haqeer jaantay hain.

yah log gustaakh aur maghroor hain aur jalaalee hastiyon par kufr baknay say naheen dartay. ¹¹is kay muqaablay men farishtay bhee jo kaheen ziyaada taaqatvar aur qavee hain rabb kay huzoor aisee hastiyon par buhtaan aur ilzaamaat lagaanay kee jur’at naheen kartay. ¹²lekin yah jhootay ustaad beaqal jaanvaron kee maanind hain, jo fitree taur par is liyay paida huay hain ki unhen pakda aur khatm kiya jaaay. jo kuchh vah naheen samajhtay us par vah kufr baktay hain. aur janglee jaanvaron kee tarah vah bhee halaak ho jaaengay. ¹³yoon jo nuqsaan unhon nay doosron ko pahunchaaya vahee unhen khud bhugatna padega. un kay nazdeek lutf uthaanay say muraad yah hai ki din kay vaqt khul kar aish karen. vah daagh aur dhabbay hain jo aap kee ziyaafaton men shareek ho kar apnee daghaabaaziyon kee rangraliyaan manaatay hain. ¹⁴un kee aankhen har vaqt kisee badkaar aurat say zina karnay kee talaash men rahetee hain aur gunaah karnay say kabhee naheen rukteen. vah kamzor logon ko ghalat kaam karnay kay liyay uksaatay aur laalach karnay men maahir hain. un par allaah kee laanat! ¹⁵vah saheeh raah say hat kar aavaara phir rahay aur bal’aam bin baor kay naqsh-ay-qadam par chal rahay hain, kyoonki bal’aam nay paison kay laalach men ghalat kaam kiya. ¹⁶lekin gadhee nay usay is gunaah kay sabab say daanta. is jaanvar nay jo bolnay kay qaabil naheen tha insaan kee see aavaaz men baat kee aur nabee ko us kee deevaangee say rok diya.

¹⁷yah log sookhay huay chashmay aur aandhee say dhakelay huay baadal hain. in kee taqdeer andheray ka taareektareen hissa hai. ¹⁸yah maghroor baaten kartay hain jin kay peechhay kuchh naheen hai aur ghair’akhlaaqee jismaanee shahevaton say aisay logon ko uksaatay hain jo haal hee men dhokay kee zindagee guzaarnay vaalon men say bach niklay hain. ¹⁹yah unhen aazaad karnay ka vaada kartay hain jabki khud badkaaree kay ghulaam hain. kyoonki insaan usee ka ghulaam hai jo us par ghaalib a gaya hai. ²⁰aur jo hamaaray khudaavand aur najaatadihanda eesa maseeh ko jaan lenay say is duniya kee aaloodgee say bach nikaltay hain, lekin baad men ek baar phir is men phans kar maghloob ho jaatay hain un ka anjaam pahelay kee nisbat ziyaada bura ho jaata hai. ²¹haan, jin logon nay raastbaazee kee raah ko jaan liya, lekin baad men us muqaddas hukm say munh pher liya jo un kay havaalay kiya gaya tha, un kay liyay behatar hota ki vah is raah say kabhee vaaqif na hotay. ²²un par yah muhaavara saadiq aata hai ki “kutta apnee qai kay paas vaapas a jaata hai.” aur yah bhee ki “sooaranee nahaanay kay baad dubaara keechad men lotnay lagtee hai.”