2 Patras 1

¹yah khat eesa maseeh kay khaadim aur rasool shamaaoon patras kee taraf say hai.

main un sab ko likh raha hoon jinhen hamaaray khuda aur najaatadihanda eesa maseeh kee raastbaazee kay vaseelay say vahee beshaqeemat eemaan bakhsha gaya hai jo hamen bhee mila.

²khuda karay ki aap usay aur hamaaray khudaavand eesa ko jaannay men taraqqee kartay kartay kasrat say fazl aur salaamatee paatay jaaen.

allaah ka bulaavaa

³allaah nay apnee ilaahee qudrat say hamen vah sab kuchh ata kiya hai jo khudaataras zindagee guzaarnay kay liyay zarooree hai. aur hamen yah usay jaan lenay say haasil hua hai. kyoonki us nay hamen apnay zaatee jalaal aur qudrat kay zareeay bulaaya hai. ⁴is jalaal aur qudrat say us nay hamen vah azeem aur beshaqeemat cheezen dee hain jin ka vaada us nay kiya tha. kyoonki vah chaahata tha ki aap in say duniya kee buree khwaahishaat say paida honay vaalay fasaad say bach kar us kee ilaahee zaat men shareek ho jaaen. ⁵yah sab kuchh pesh-ay-nazar rakh kar pooree lagan say koshish karen ki aap kay eemaan say akhlaaq paida ho jaaay, akhlaaq say ilm, ⁶ilm say zabt-ay-nafs, zabt-ay-nafs say saabitqadmee, saabitqadmee say khudaataras zindagee, ⁷khudaataras zindagee say baraadraana shafqat aur baraadraana shafqat say sab kay liyay muhabbat. ⁸kyoonki jitna hee aap in khoobiyon men badhtay jaaengay utna hee yah aap ko is say mahfooz rakhengee ki aap hamaaray khudaavand eesa maseeh ko jaannay men sust aur bephal rahen. ⁹lekin jis men yah khoobiyaan naheen hain us kee nazar itnee kamzor hai ki vah andha hai. vah bhool gaya hai ki usay us kay guzray gunaahon say paak-saaf kiya gaya hai.

¹⁰chunaanchay bhaaiyo, mazeed lagan say apnay bulaavay aur chunaao kee tasdeeq karnay men koshaan rahen. kyoonki yah karnay say aap gir jaanay say bachenge ¹¹aur allaah badee khushee say aap ko hamaaray khudaavand aur najaatadihanda eesa maseeh kee baadshaahee men daakhil honay kee ijaazat dega.

¹²is liyay main hamesha aap ko in baaton kee yaad dilaata rahoonga, haalaanki aap in say vaaqif hain aur mazbootee say us sachchaaee par qaaim hain jo aap ko milee hai. ¹³balki main apna farz samajhta hoon ki jitnee aur der main jism kee is jhompdee men raheta hoon aap ko in baaton kee yaad dilaanay say ubhaarta rahoon. ¹⁴kyoonki mujhay maaloom hai ki ab meree yah jhompdee jald hee dha dee jaaegee. hamaaray khudaavand eesa maseeh nay bhee mujh par yah zaahir kiya tha. ¹⁵lekin main pooree koshish karoonga ki meray kooch kar jaanay kay baad bhee aap har vaqt in baaton ko yaad rakh saken.

maseeh kay jalaal kay gavaah

¹⁶kyoonki jab ham nay aap ko apnay aur aap kay khudaavand maseeh kee qudrat aur aamad kay baaray men bataaya to ham chaalaakee say ghaday qissay-kahaaniyon par inhisaar naheen kar rahay thay balki ham nay yah gavaahon kee haisiyat say bataaya. kyoonki ham nay apnee hee aankhon say us kee azmat dekhee thee. ¹⁷ham maujood thay jab usay khuda baap say izzat-o-jalaal mila, jab ek aavaaz nay allaah kee purjalaal shaan say a kar kaha, “yah mera piyaara farzand hai jis say main khush hoon.” ¹⁸jab ham us kay saath muqaddas pahaad par thay to ham nay khud yah aavaaz aasmaan say aatee sunee.

¹⁹is tajribay kee bina par hamaara nabiyon kay paighaam par etimaad ziyaada mazboot hai. aap achchha karengay agar is par khoob dhyaan den. kyoonki yah kisee taareek jagah men raushnee kee maanind hai jo us vaqt tak chamaktee rahegee jab tak pau phat kar subah ka sitaara aap kay dilon men tuloo na ho jaaay. ²⁰sab say badh kar aap ko yah samajhnay kee zaroorat hai ki kalaam-ay-muqaddas kee koee bhee peshgoee nabee kee apnee hee tafseer say paida naheen hotee. ²¹kyoonki koee bhee peshgoee kabhee bhee insaan kee tahereek say vujood men naheen aaee balki peshgoee kartay vaqt insaanon nay rooh-ul-quds say tahereek pa kar allaah kee taraf say baat kee.