2 Yoohanna 1
1yah khat buzurg yoohanna kee taraf say hai.
main chuneeda khaatoon aur us kay bachchon ko likh raha hoon jinhen main sachchaaee say piyaar karta hoon, aur na sirf main balki sab jo sachchaaee ko jaantay hain. 2kyoonki sachchaaee ham men rahetee hai aur abad tak hamaaray saath rahegee.
3khuda baap aur baap ka farzand eesa maseeh hamen fazl, rahem aur salaamatee ata karay. aur yah cheezen sachchaaee aur muhabbat kee rooh men hamen haasil hon.
sachchaaee aur muhabbat
4main nihaayat hee khush hua ki main nay aap kay bachchon men say baaz aisay paaay jo usee tarah sachchaaee men chaltay hain jis tarah khuda baap nay hamen hukm diya tha. 5aur ab azeez khaatoon, main aap say darakhwaast karta hoon ki aaen, ham sab ek doosray say muhabbat rakhen. yah koee naya hukm naheen hai jo main aap ko likh raha hoon balki vahee jo hamen shuroo hee say mila hai. 6muhabbat ka matlab yah hai ki ham us kay ahkaam kay mutaabiq zindagee guzaaren. jis tarah aap nay shuroo hee say suna hai, us ka hukm yah hai ki aap muhabbat kee rooh men chalen.
7kyoonki bahut say aisay log duniya men nikal khaday huay hain jo aap ko saheeh raah say hataanay kee koshish men lagay rahetay hain. yah log naheen maantay ki eesa maseeh mujassam ho kar aaya hai. har aisa shakhs fareb denay vaala aur mukhaalif-ay-maseeh hai. 8chunaanchay khabardaar rahen. aisa na ho ki aap nay jo kuchh mehanat karkay haasil kiya hai vah jaata rahay balki khuda karay ki aap ko is ka poora ajr mil jaaay.
9jo bhee maseeh kee taaleem par qaaim naheen raheta balki is say aagay nikal jaata hai us kay paas allaah naheen. jo maseeh kee taaleem par qaaim raheta hai us kay paas baap bhee hai aur farzand bhee. 10chunaanchay agar koee aap kay paas a kar yah taaleem pesh naheen karta to na usay apnay gharon men aanay den, na us ko salaam karen. 11kyoonki jo us kay liyay salaamatee kee dua karta hai vah us kay shareer kaamon men shareek ho jaata hai.
aakhiree baaten
12main aap ko bahut kuchh bataana chaahata hoon, lekin kaaghaz aur siyaahee kay zareeay naheen. is kay bajaay main aap say milnay aur aap kay roo-ba-roo baat karnay kee ummeed rakhta hoon. phir hamaaree khushee mukammal ho jaaegee.
13aap kee chuneeda bahen kay bachchay aap ko salaam kahetay hain.