2 Kurinthiyon 9

maqaddaseen kee madad

¹asal men is kee zaroorat naheen ki main aap ko us kaam kay baaray men likhoon jo hamen yahoodiya kay muqaddaseen kee khidmat men karna hai. ²kyoonki main aap kee garmajoshee jaanta hoon, aur main makiduniya kay eemaandaaron kay saamnay aap par fakhar karta raha hoon ki “akhya kay log pichhlay saal say denay kay liyay tayyaar thay.” yoon aap kee sargarmee nay ziyaadaatar logon ko khud denay kay liyay ubhaara. ³ab main nay in bhaaiyon ko bhej diya hai taaki hamaara aap par fakhar bebunyaad na niklay balki jis tarah main nay kaha tha aap tayyaar rahen. ⁴aisa na ho ki jab main makiduniya kay kuchh bhaaiyon ko saath lay kar aap kay paas pahunchoonga to aap tayyaar na hoon. us vaqt main, balki aap bhee sharminda hongay ki main nay aap par itna etimaad kiya hai. ⁵is liyay main nay is baat par zor dena zarooree samjha ki bhaaee pahelay hee aap kay paas a kar us hadiay ka intizaam karen jis ka vaada aap nay kiya hai. kyoonki main chaahata hoon ki meray aanay tak yah hadiya jama kiya gaya ho aur aisa na lagay jaisa isay mushkil say aap say nikaalna pada. is kay bajaay aap kee sakhaavat zaahir ho jaaay.

⁶yaad rahay ki jo shakhs beej ko bacha bacha kar bota hai us kee fasal bhee utnee kam hogee. lekin jo bahut beej bota hai us kee fasal bhee bahut ziyaada hogee. ⁷har ek utna day jitna denay kay liyay us nay pahelay apnay dil men thahera liya hai. vah is men takleef ya majbooree mahsoos na karay, kyoonki allaah us say muhabbat rakhta hai jo khushee say deta hai. ⁸aur allaah is qaabil hai ki aap ko aap kee zarooriyaat say kaheen ziyaada day. phir aap kay paas har vaqt aur har lihaaz say kaafee hoga balki itna ziyaada ki aap har qism ka nek kaam kar sakengay. ⁹chunaanchay kalaam-ay-muqaddas men yah bhee likha hai, “us nay fayyaazee say zarooratmandon men khairaat bikher dee, us kee raastbaazee hamesha tak qaaim rahegee.” ¹⁰khuda hee beej bonay vaalay ko beej muhayya karta aur usay khaanay kay liyay rotee deta hai. aur vah aap ko bhee beej day kar us men izaafa karega aur aap kee raastbaazee kee fasal ugnay dega. ¹¹haan, vah aap ko har lihaaz say daulatmand bana dega aur aap har mauqay par fayyaazee say day sakengay. chunaanchay jab ham aap ka hadiya un kay paas lay jaaengay jo zarooratmand hain to vah khuda ka shukr karengay. ¹²yoon aap na sirf muqaddaseen kee zarooriyaat pooree karengay balki vah aap kee is khidmat say itnay mut’assir ho jaaengay ki vah baday josh say khuda ka bhee shukriya ada karengay. ¹³aap kee khidmat kay nateejay men vah allaah ko jalaal dengay. kyoonki aap kee un par aur tamaam eemaandaaron par sakhaavat ka izhaar saabit karega ki aap maseeh kee khushkhabaree na sirf tasleem kartay hain balki us kay taabay bhee rahetay hain. ¹⁴aur jab vah aap kay liyay dua karengay to aap kay aarzoomand rahengay, is liyay ki allaah nay aap ko kitna bada fazl day diya hai. ¹⁵allaah ka us kee naaqaabil-ay-bayaan bakhshish kay liyay shukr ho