2 Kurinthiyon 8

yahoodiya kay ghareebon kay liyay hadiyaa

¹bhaaiyo, ham aap kee tavajjuh us fazl kee taraf dilaana chaahatay hain jo allaah nay sooba makiduniya kee jamaaat par kiya. ²jis museebat men vah phansay huay hain us say un kee sakht aazmaaish huee. to bhee un kee beintiha khushee aur shadeed ghurbat ka nateeja yah nikla ki unhon nay badee fayyaazdilee say hadiya diya. ³main gavaah hoon ki jitna vah day sakay utna unhon nay day diya balki is say bhee ziyaada. apnee hee taraf se ⁴unhon nay baday zor say ham say minnat kee ki hamen bhee yahoodiya kay muqaddaseen kee khidmat karnay ka mauqa den, ham bhee denay kay fazl men shareek hona chaahatay hain. ⁵aur unhon nay hamaaree ummeed say kaheen ziyaada kiya! allaah kee marzee say un ka pahela qadam yah tha ki unhon nay apnay aap ko khudaavand kay liyay makhsoos kiya. un ka doosra qadam yah tha ki unhon nay apnay aap ko hamaaray liyay makhsoos kiya. ⁶is par ham nay titus kee hausalaaafzaaee kee ki vah aap kay paas bhee hadiya jama karnay ka vah silsila anjaam tak pahunchaaay jo us nay shuroo kiya tha. ⁷aap kay paas sab kuchh kasrat say paaya jaata hai, khwaah eemaan ho, khwaah kalaam, ilm, mukammal sargarmee ya ham say muhabbat ho. ab is baat ka khayaal rakhen ki aap yah hadiya denay men bhee apnee kaseer daulat ka izhaar karen.

⁸meree taraf say yah koee hukm naheen hai. lekin doosron kee sargarmee kay pesh-ay-nazar main aap kee bhee muhabbat parakh raha hoon ki vah kitnee haqeeqee hai. ⁹aap to jaantay hain ki hamaaray khudaavand eesa maseeh nay aap par kaisa fazl kiya hai, ki agarchi vah daulatmand tha to bhee vah aap kee khaatir ghareeb ban gaya taaki aap us kee ghurbat say daulatmand ban jaaen.

¹⁰is muaamalay men mera mashvra sunen, kyoonki vah aap kay liyay mufeed saabit hoga. pichhlay saal aap pahelee jamaaat thay jo na sirf hadiya denay lagee balki isay dena bhee chaahatee thee. ¹¹ab usay takmeel tak pahunchaaen jo aap nay shuroo kar rakha hai. denay ka jo shauq aap rakhtay hain vah amal men laaya jaaay. utna den jitna aap day saken. ¹²kyoonki agar aap denay ka shauq rakhtay hain to phir allaah aap ka hadiya us bina par qabool karega jo aap day saktay hain, us bina par naheen jo aap naheen day saktay.

¹³kahenay ka matlab yah naheen ki doosron ko aaraam dilaanay kay baais aap khud museebat men pad jaaen. baat sirf yah hai ki logon kay haalaat kuchh baraabar honay chaahien. ¹⁴is vaqt to aap kay paas bahut hai aur aap un kee zaroorat pooree kar saktay hain. baad men kisee vaqt jab un kay paas bahut hoga to vah aap kee zaroorat bhee pooree kar sakengay. yoon aap kay haalaat kuchh baraabar rahengay, ¹⁵jis tarah kalaam-ay-muqaddas men bhee likha hai, “jis nay ziyaada jama kiya tha us kay paas kuchh na bacha. lekin jis nay kam jama kiya tha us kay paas bhee kaafee tha.”

titus aur us kay saathee

¹⁶khuda ka shukr hai jis nay titus kay dil men vahee josh paida kiya hai jo main aap kay liyay rakhta hoon. ¹⁷jab ham nay us kee hausalaaafzaaee kee ki vah aap kay paas jaaay to vah na sirf is kay liyay tayyaar hua balki bada sargarm ho kar khud-ba-khud aap kay paas jaanay kay liyay ravaana hua. ¹⁸ham nay us kay saath us bhaaee ko bhej diya jis kee khidmat kee taareef tamaam jamaaaten kartee hain, kyoonki usay allaah kee khushkhabaree sunaanay kee nemat milee hai. ¹⁹usay na sirf aap kay paas jaana hai balki jamaaaton nay usay muqarrar kiya hai ki jab ham hadiay ko yarooshalam lay jaaengay to vah hamaaray saath jaaay. yoon ham yah khidmat ada kartay vaqt khudaavand ko jalaal dengay aur apnee sargarmee ka izhaar karengay.

²⁰kyoonki us baday hadiay kay pesh-ay-nazar jo ham lay jaaengay ham is say bachna chaahatay hain ki kisee ko ham par shak karnay ka mauqa milay. ²¹hamaaree pooree koshish yah hai ki vahee kuchh karen jo na sirf khudaavand kee nazar men durust hai balki insaan kee nazar men bhee.

²²un kay saath ham nay ek aur bhaaee ko bhee bhej diya jis kee sargarmee ham nay kaee mauqon par parkhee hai. ab vah mazeed sargarm ho gaya hai, kyoonki vah aap par bada etimaad karta hai. ²³jahaan tak titus ka taalluq hai, vah mera saathee aur hamkhidmat hai. aur jo bhaaee us kay saath hain unhen jamaaaton nay bheja hai. vah maseeh kay liyay izzat ka baais hain. ²⁴un par apnee muhabbat ka izhaar karkay yah zaahir karen ki ham aap par kyoon fakhar kartay hain. phir yah baat khuda kee deegar jamaaaton ko bhee nazar aaegee.