2 Kurinthiyon 7

¹meray azeezo, yah tamaam vaaday ham say kiay gaay hain. is liyay aaen, ham apnay aap ko har us cheez say paak-saaf karen jo jism aur rooh ko aalooda kar detee hai. aur ham khuda kay khauf men mukammal taur par muqaddas bannay kay liyay koshaan rahen.

paulus kee khushee

²hamen apnay dil men jagah den. na ham nay kisee say naainsaafee kee, na kisee ko bigaada ya us say ghalat faaida uthaaya. ³main yah baat aap ko mujrim thaheraanay kay liyay naheen kah raha. main aap ko pahelay bata chuka hoon ki aap hamen itnay azeez hain ki ham aap kay saath marnay aur jeenay kay liyay tayyaar hain. ⁴is liyay main aap say khul kar baat karta hoon aur main aap par bada fakhar bhee karta hoon. is naatay say mujhay pooree tasallee hai, aur hamaaree tamaam museebaton kay baavujood meree khushee kee intiha naheen.

⁵kyoonki jab ham makiduniya pahunchay to ham jism kay lihaaz say aaraam na kar sakay. museebaton nay hamen har taraf say gher liya. doosron kee taraf say jhagdon say aur dil men tarah tarah kay dar say nipatna pada. ⁶lekin allaah nay jo dabay huon ko tasallee bakhshta hai titus kay aanay say hamaaree hausalaaafzaaee kee. ⁷hamaara hausla na sirf us kay aanay say badh gaya balki un hausalaaafza baaton say bhee jin say aap nay usay tasallee dee. us nay hamen aap kee aarzoo, aap kee aah-o-zaaree aur meray liyay aap kee sargarmee kay baaray men riport dee. yah sun kar meree khushee mazeed badh gaee.

⁸kyoonki agarchi main nay aap ko apnay khat say dukh pahunchaaya to bhee main pachhtaata naheen. pahelay to main khat likhnay say pachhtaaya, lekin ab main dekhta hoon ki jo dukh us nay aap ko pahunchaaya vah sirf aarizee thaa ⁹aur us nay aap ko tauba tak pahunchaaya. yah sun kar main ab khushee manaata hoon, is liyay naheen ki aap ko dukh uthaana pada hai balki is liyay ki is dukh nay aap ko tauba tak pahunchaaya. allaah nay yah dukh apnee marzee pooree karaanay kay liyay istemaal kiya, is liyay aap ko hamaaree taraf say koee nuqsaan na pahuncha. ¹⁰kyoonki jo dukh allaah apnee marzee pooree karaanay kay liyay istemaal karta hai us say tauba paida hotee hai aur us ka anjaam najaat hai. is men pachhtaanay kee gunjaaish hee naheen. is kay bar’aks duniyaavee dukh ka anjaam maut hai. ¹¹aap khud dekhen ki allaah kay is dukh nay aap men kya paida kiya hai : kitnee sanjeedgee, apna difa karnay ka kitna josh, ghalat harkaton par kitna ghussa, kitna khauf, kitnee chaahat, kitnee sargarmee. aap saza denay kay liyay kitnay tayyaar thay! aap nay har lihaaz say saabit kiya hai ki aap is muaamalay men bequsoor hain.

¹²gharaz, agarchi main nay aap ko likha, lekin maqsad yah naheen tha ki ghalat harkaten karnay vaalay kay baaray men likhoon ya us kay baaray men jis kay saath ghalat kaam kiya gaya. naheen, maqsad yah tha ki allaah kay huzoor aap par zaahir ho jaaay ki aap hamaaray liyay kitnay sargarm hain. ¹³yahee vajah hai ki hamaara hausla badh gaya hai.

lekin na sirf hamaaree hausalaaafzaaee huee hai balki ham yah dekh kar beintiha khush huay ki titus kitna khush tha. vah kyoon khush tha? is liyay ki us kee rooh aap sab say tar-o-taaza huee. ¹⁴us kay saamnay main nay aap par fakhar kiya tha, aur main sharminda naheen hua kyoonki yah baat durust saabit huee hai. jis tarah ham nay aap ko hamesha sachchee baaten bataaee hain usee tarah titus kay saamnay aap par hamaara fakhar bhee durust nikla. ¹⁵aap usay nihaayat azeez hain kyoonki vah aap sab kee faramaambardaaree yaad karta hai, ki aap nay dartay aur kaamptay huay usay khush’aamadeed kaha. ¹⁶main khush hoon ki main har lihaaz say aap par etimaad kar sakta hoon.