2 Kurinthiyon 6

¹allaah kay hamkhidmat hotay huay ham aap say minnat kartay hain ki jo fazl aap ko mila hai vah zaaay na jaaay. ²kyoonki allaah farmaata hai, “qabooliyat kay vaqt main nay teree sunee, najaat kay din teree madad kee.” sunen! ab qabooliyat ka vaqt a gaya hai, ab najaat ka din hai.

³ham kisee kay liyay bhee thokar ka baais naheen bantay taaki log hamaaree khidmat men nuqs na nikaal saken. ⁴haan, hamen sifaarish kee zaroorat hee naheen, kyoonki allaah kay khaadim hotay huay ham har haalat men apnee neknaamee zaahir kartay hain : jab ham sabr say museebaten, mushkilaat aur aaften bardaasht kartay hain, ⁵jab log hamen maartay aur qaid men daaltay hain, jab ham bekaaboo hujoomon ka saamna kartay hain, jab ham mehanat-mashaqqat kartay, raat kay vaqt jaagtay aur bhookay rahetay hain, ⁶jab ham apnee paakeezgee, ilm, sabr aur meharbaan sulook ka izhaar kartay hain, jab ham rooh-ul-quds kay vaseelay say haqeeqee muhabbat rakhtay, ⁷sachchee baaten kartay aur allaah kee qudrat say logon kee khidmat kartay hain. ham apnee neknaamee is men bhee zaahir kartay hain ki ham donon haathon say raastbaazee kay hathiyaar thaamay rakhtay hain. ⁸ham apnee khidmat jaaree rakhtay hain, chaahay log hamaaree izzat karen chaahay beizzatee, chaahay vah hamaaree buree riport den chaahay achchhee. agarchi hamaaree khidmat sachchee hai, lekin log hamen daghaabaaz qaraar detay hain. ⁹agarchi log hamen jaantay hain to bhee hamen nazar’andaaz kiya jaata hai. ham martay martay zinda rahetay hain aur log hamen maar maar kar qatl naheen kar saktay. ¹⁰ham gham kha kha kar har vaqt khush rahetay hain, ham ghareeb haalat men bahuton ko daulatmand bana detay hain. hamaaray paas kuchh naheen hai, to bhee hamen sab kuchh haasil hai.

¹¹kurinthus kay azeezo, ham nay khul kar aap say baat kee hai, hamaara dil aap kay liyay kushaada ho gaya hai. ¹²jo jagah ham nay dil men aap ko dee hai vah ab tak kam naheen huee. lekin aap kay dilon men hamaaray liyay koee jagah naheen rahee. ¹³ab main aap say jo meray bachchay hain darakhwaast karta hoon ki javaab men hamen bhee apnay dilon men jagah den.

ghairmaseehee asraat say khabardaar

¹⁴ghaireemaandaaron kay saath mil kar ek jooay talay zindagee na guzaaren, kyoonki raastee ka naaraastee say kya vaasta hai? ya raushnee taareekee kay saath kya taalluq rakh saktee hai? ¹⁵maseeh aur iblees kay darmiyaan kya mutaabiqat ho saktee hai? eemaandaar ka ghaireemaandaar kay saath kya vaasta hai? ¹⁶allaah kay maqdis aur buton men kya ittifaaq ho sakta hai? ham to zinda khuda ka ghar hain. allaah nay yoon farmaaya hai,

“main un kay darmiyaan sukoonat karoongaa

aur un men phiroonga.

main un ka khuda hoonga,

aur vah meree qaum hongay.”

¹⁷chunaanchay rabb farmaata hai,

“is liyay un men say nikal aao

aur un say alag ho jaao.

kisee naapaak cheez ko na chhoona,

to phir main tumhen qabool karoonga.

¹⁸main tumhaara baap hoongaa

aur tum meray betay-betiyaan hogay,

rabb qaadir-ay-mutlaq farmaata hai.”