2 Kurinthiyon 5

¹ham to jaantay hain ki jab hamaaree duniyaavee jhompdee jis men ham rahetay hain giraaee jaaegee to allaah hamen aasmaan par ek makaan dega, ek aisa abdee ghar jisay insaanee haathon nay naheen banaaya hoga. ²is liyay ham is jhompdee men karaahatay hain aur aasmaanee ghar pahen lenay kee shadeed aarzoo rakhtay hain, ³kyoonki jab ham usay pahen lengay to ham nangay naheen paaay jaaengay. ⁴is jhompdee men rahetay huay ham bojh talay karaahatay hain. kyoonki ham apna faanee libaas utaarna naheen chaahatay balki us par aasmaanee ghar ka libaas pahen lena chaahatay hain taaki zindagee vah kuchh nigal jaaay jo faanee hai. ⁵allaah nay khud hamen is maqsad kay liyay tayyaar kiya hai aur usee nay hamen rooh-ul-quds ko aanay vaalay jalaal kay baiaanay kay taur par day diya hai.

⁶chunaanchay ham hamesha hausla rakhtay hain. ham jaantay hain ki jab tak apnay badan men rihaaishpazeer hain us vaqt tak khudaavand kay ghar say door hain. ⁷ham zaahiree cheezon par bharosa naheen kartay balki eemaan par chaltay hain. ⁸haan, hamaara hausla buland hai balki ham ziyaada yah chaahatay hain ki apnay jismaanee ghar say ravaana ho kar khudaavand kay ghar men rahen. ⁹lekin khwaah ham apnay badan men hon ya na, ham isee koshish men rahetay hain ki khudaavand ko pasand aaen. ¹⁰kyoonki laazim hai ki ham sab maseeh kay takht-ay-adaalat kay saamnay haazir ho jaaen. vahaan har ek ko us kaam ka ajr milega jo us nay apnay badan men rahetay huay kiya hai, khwaah vah achchha tha ya bura.

maseeh kay vaseelay say hamaaree allaah kay saath dostee

¹¹ab ham khudaavand kay khauf ko jaan kar logon ko samjhaanay kee koshish kartay hain. ham to allaah kay saamnay pooray taur par zaahir hain. aur main ummeed rakhta hoon ki ham aap kay zameer kay saamnay bhee zaahir hain. ¹²kya ham yah baat karkay dubaara apnee sifaarish kar rahay hain? naheen, aap ko ham par fakhar karnay ka mauqa day rahay hain taaki aap un kay javaab men kuchh kah saken jo zaahiree baaton par shekhee maartay aur dilee baaten nazar’andaaz kartay hain. ¹³kyoonki agar ham bekhud huay to allaah kee khaatir, aur agar hosh men hain to aap kee khaatir. ¹⁴baat yah hai ki maseeh kee muhabbat hamen majboor kar detee hai, kyoonki ham is nateejay par pahunch gaay hain ki ek sab kay liyay mua. is ka matlab hai ki sab hee mar gaay hain. ¹⁵aur vah sab kay liyay is liyay mua taaki jo zinda hain vah apnay liyay na jien balki us kay liyay jo un kee khaatir mua aur phir jee utha.

¹⁶is vajah say ham ab say kisee ko bhee duniyaavee nigaah say naheen dekhtay. pahelay to ham maseeh ko bhee is zaaveeay say dekhtay thay, lekin yah vaqt guzar gaya hai. ¹⁷chunaanchay jo maseeh men hai vah naya makhlooq hai. puraanee zindagee jaatee rahee aur naee zindagee shuroo ho gaee hai. ¹⁸yah sab kuchh allaah kee taraf say hai jis nay maseeh kay vaseelay say apnay saath hamaara mel-milaap kar liya hai. aur usee nay hamen mel-milaap karaanay kee khidmat kee zimmaadaaree dee hai. ¹⁹is khidmat kay tahet ham yah paighaam sunaatay hain ki allaah nay maseeh kay vaseelay say apnay saath duniya kee sulah karaaee aur logon kay gunaahon ko un kay zimmay na lagaaya. sulah karaanay ka yah paighaam us nay hamaaray sapurd kar diya.

²⁰pas ham maseeh kay elchee hain aur allaah hamaaray vaseelay say logon ko samjhaata hai. ham maseeh kay vaastay aap say minnat kartay hain ki allaah kee sulah kee peshkash ko qabool karen taaki us kee aap kay saath sulah ho jaaay. ²¹maseeh begunaah tha, lekin allaah nay usay hamaaree khaatir gunaah thaheraaya taaki hamen us men raastbaaz qaraar diya jaaay.