2 Kurinthiyon 4

mittee kay bartanon men ruhaanee khazaanaa

¹pas choonki hamen allaah kay rahem say yah khidmat saumpee gaee hai is liyay ham bedil naheen ho jaatay. ²ham nay chhupee huee sharmanaak baaten mustarad kar dee hain. na ham chaalaakee say kaam kartay, na allaah kay kalaam men tahereef kartay hain. balki hamen apnee sifaarish kee zaroorat bhee naheen, kyoonki jab ham allaah kay huzoor logon par haqeeqat ko zaahir kartay hain to hamaaree neknaamee khud-ba-khud har ek kay zameer par zaahir ho jaatee hai. ³aur agar hamaaree khushkhabaree niqaab talay chhupee huee bhee ho to vah sirf un kay liyay chhupee huee hai jo halaak ho rahay hain. ⁴is jahaan kay shareer khuda nay un kay zahenon ko andha kar diya hai jo eemaan naheen rakhtay. is liyay vah allaah kee khushkhabaree kee jalaalee raushnee naheen dekh saktay. vah yah paighaam naheen samajh saktay jo maseeh kay jalaal kay baaray men hai, us kay baaray men jo allaah kee soorat hai. ⁵kyoonki ham apna parchaar naheen kartay balki eesa maseeh ka paighaam sunaatay hain ki vah khudaavand hai. apnay aap ko ham eesa kee khaatir aap kay khaadim qaraar detay hain. ⁶kyoonki jis khuda nay farmaaya, “andheray men say raushnee chamkay,” us nay hamaaray dilon men apnee raushnee chamaknay dee taaki ham allaah ka vah jalaal jaan len jo eesa maseeh kay chiharay say chamakta hai.

⁷lekin ham jin kay andar yah khazaana hai aam mittee kay bartanon kee maanind hain taaki zaahir ho ki yah zabardast quvvat hamaaree taraf say naheen balki allaah kee taraf say hai. ⁸log hamen chaaron taraf say dabaatay hain, lekin koee hamen kuchal kar khatm naheen kar sakta. ham uljhan men pad jaatay hain, lekin ummeed ka daaman haath say jaanay naheen detay. ⁹log hamen eeza detay hain, lekin hamen akela naheen chhoda jaata. logon kay dhakkon say ham zameen par gir jaatay hain, lekin ham tabaah naheen hotay. ¹⁰har vaqt ham apnay badan men eesa kee maut liyay phirtay hain taaki eesa kee zindagee bhee hamaaray badan men zaahir ho jaaay. ¹¹kyoonki har vaqt hamen zinda haalat men eesa kee khaatir maut kay havaalay kar diya jaata hai taaki us kee zindagee hamaaray faanee badan men zaahir ho jaaay. ¹²yoon ham men maut ka asar kaam karta hai jabki aap men zindagee ka asar.

¹³kalaam-ay-muqaddas men likha hai, “main eemaan laaya aur is liyay bola.” hamen eemaan ka yahee rooh haasil hai is liyay ham bhee eemaan laanay kee vajah say boltay hain. ¹⁴kyoonki ham jaantay hain ki jis nay khudaavand eesa ko murdon men say zinda kar diya hai vah eesa kay saath hamen bhee zinda karkay aap logon samet apnay huzoor khada karega. ¹⁵yah sab kuchh aap kay faaiday kay liyay hai. yoon allaah ka fazl aagay badhtay badhtay mazeed bahut say logon tak pahunch raha hai aur nateejay men vah allaah ko jalaal day kar shukrguzaaree kee duaaon men bahut izaafa kar rahay hain.

eemaan kee zindagee

¹⁶isee vajah say ham bedil naheen ho jaatay. beshak zaahiree taur par ham khatm ho rahay hain, lekin andar hee andar roz-ba-roz hamaaree tajdeed hotee ja rahee hai. ¹⁷kyoonki hamaaree maujooda museebat halkee aur pal bhar kee hai, aur vah hamaaray liyay ek aisa abdee jalaal paida kar rahee hai jis kee nisbat maujooda museebat kuchh bhee naheen. ¹⁸is liyay ham dekhee huee cheezon par ghaur naheen kartay balki andekhee cheezon par. kyoonki dekhee huee cheezen aarizee hain, jabki andekhee cheezen abdee hain.