2 Kurinthiyon 3

naay ahd kay khaadim

¹kya ham dubaara apnee khoobiyon ka dhandora peet rahay hain? ya kya ham baaz logon kee maanind hain jinhen aap ko sifaarishee khat denay ya aap say aisay khat likhvaanay kee zaroorat hotee hai? ²naheen, aap to khud hamaara khat hain jo hamaaray dilon par likha hua hai. sab isay pahechaan aur padh saktay hain. ³yah saaf zaahir hai ki aap maseeh ka khat hain jo us nay hamaaree khidmat kay zareeay likh diya hai. aur yah khat siyaahee say naheen balki zinda khuda kay rooh say likha gaya, patthar kee takhtiyon par naheen balki insaanee dilon par.

⁴ham yah is liyay yaqeen say kah saktay hain kyoonki ham maseeh kay vaseelay say allaah par etimaad rakhtay hain. ⁵hamaaray andar to kuchh naheen hai jis kee bina par ham daava kar saktay ki ham yah kaam karnay kay laaiq hain. naheen, hamaaree liyaaqat allaah kee taraf say hai. ⁶usee nay hamen naay ahd kay khaadim honay kay laaiq bana diya hai. aur yah ahd likhee huee shareeat par mabnee naheen hai balki rooh par, kyoonki likhee huee shareeat kay asar say ham mar jaatay hain jabki rooh hamen zinda kar deta hai.

⁷shareeat kay huroof patthar kee takhtiyon par kanda kiay gaay aur jab usay diya gaya to allaah ka jalaal zaahir hua. yah jalaal itna tez tha ki israaeelee moosa kay chiharay ko lagaataar dekh na sakay. agar us cheez ka jalaal itna tez tha jo ab mansookh hai ⁸to kya rooh kay nizaam ka jalaal is say kaheen ziyaada naheen hoga? ⁹agar puraana nizaam jo hamen mujrim thaheraata tha jalaalee tha to phir naya nizaam jo hamen raastbaaz qaraar deta hai kaheen ziyaada jalaalee hoga. ¹⁰haan, pahelay nizaam ka jalaal naay nizaam kay zabardast jalaal kee nisbat kuchh bhee naheen hai. ¹¹aur agar us puraanay nizaam ka jalaal bahut tha jo ab mansookh hai to phir us naay nizaam ka jalaal kaheen ziyaada hoga jo qaaim rahega.

¹²pas choonki ham aisee ummeed rakhtay hain is liyay badee dileree say khidmat kartay hain. ¹³ham moosa kee maanind naheen hain jis nay shareeat sunaanay kay ikhtitaam par apnay chiharay par niqaab daal liya taaki israaeelee usay taktay na rahen jo ab mansookh hai. ¹⁴to bhee vah zahenee taur par ad gaay, kyoonki aaj tak jab puraanay ahdanaamay kee tilaavat kee jaatee hai to yahee niqaab qaaim hai. aaj tak niqaab ko hataaya naheen gaya kyoonki yah ahd sirf maseeh men mansookh hota hai. ¹⁵haan, aaj tak jab moosa kee shareeat padhee jaatee hai to yah niqaab un kay dilon par pada raheta hai. ¹⁶lekin jab bhee koee khudaavand kee taraf rujoo karta hai to yah niqaab hataaya jaata hai, ¹⁷kyoonki khudaavand rooh hai aur jahaan khudaavand ka rooh hai vahaan aazaadee hai. ¹⁸chunaanchay ham sab jin kay chiharon say niqaab hataaya gaya hai khudaavand ka jalaal mun’akis kartay aur qadam-ba-qadam jalaal paatay huay maseeh kee soorat men badaltay jaatay hain. yah khudaavand hee ka kaam hai jo rooh hai.