2 Kurinthiyon 2

¹chunaanchay main nay faisla kiya ki main dubaara aap kay paas naheen aaoonga, varna aap ko bahut gham khaana padega. ²kyoonki agar main aap ko dukh pahunchaaoon to kaun mujhay khush karega? yah vah shakhs naheen karega jisay main nay dukh pahunchaaya hai. ³yahee vajah hai ki main nay aap ko yah likh diya. main naheen chaahata tha ki aap kay paas a kar un hee logon say gham khaaoon jinhen mujhay khush karna chaahiay. kyoonki mujhay aap sab kay baaray men yaqeen hai ki meree khushee aap sab kee khushee hai. ⁴main nay aap ko nihaayat ranjeeda aur pareshaan haalat men aansoo baha baha kar likh diya. maqsad yah naheen tha ki aap ghamgeen ho jaaen balki main chaahata tha ki aap jaan len ki main aap say kitnee gaheree muhabbat rakhta hoon.

mujrim ko muaaf kar diya jaae

⁵agar kisee nay dukh pahunchaaya hai to mujhay naheen balki kisee hadd tak aap sab ko (main ziyaada sakhtee say baat naheen karna chaahata). ⁶lekin mazkoora shakhs kay liyay yah kaafee hai ki usay jamaaat kay aksar logon nay saza dee hai. ⁷ab zarooree hai ki aap usay muaaf karkay tasallee den, varna vah gham kha kha kar tabaah ho jaaega. ⁸chunaanchay main is par zor dena chaahata hoon ki aap usay apnee muhabbat ka ihsaas dilaaen. ⁹main nay yah maaloom karnay kay liyay aap ko likha ki kya aap imtihaan men pooray utarengay aur har baat men taabay rahengay. ¹⁰jisay aap kuchh muaaf kartay hain usay main bhee muaaf karta hoon. aur jo kuchh main nay muaaf kiya, agar mujhay kuchh muaaf karnay kee zaroorat thee, vah main nay aap kee khaatir maseeh kay huzoor muaaf kiya hai ¹¹taaki iblees ham say faaida na uthaaay. kyoonki ham us kee chaalon say khoob vaaqif hain.

troaas men paulus kee pareshaanee

¹²jab main maseeh kee khushkhabaree sunaanay kay liyay troaas gaya to khudaavand nay meray liyay aagay khidmat karnay ka ek darvaaza khol diya. ¹³lekin jab mujhay apna bhaaee titus vahaan na mila to main bechain ho gaya aur unhen khairbaad kah kar sooba makiduniya chala gaya.

maseeh men fatah

¹⁴lekin khuda ka shukr hai! vahee hamaaray aagay aagay chalta hai aur ham maseeh kay qaidee ban kar us kee fatah manaatay huay us kay peechhay peechhay chaltay hain. yoon allaah hamaaray vaseelay say har jagah maseeh kay baaray men ilm khushboo kee tarah phailaata hai. ¹⁵kyoonki ham maseeh kee khushboo hain jo allaah tak pahunchtee hai aur saath saath logon men bhee phailtee hai, najaat paanay vaalon men bhee aur halaak honay vaalon men bhee. ¹⁶baaz logon kay liyay ham maut kee muhalak boo hain jabki baaz kay liyay ham zindageebakhsh khushboo hain. to kaun yah zimmaadaaree nibhaanay kay laaiq hai? ¹⁷kyoonki ham aksar logon kee tarah allaah kay kalaam kee tijaarat naheen kartay, balki yah jaan kar ki ham allaah kay huzoor men hain aur us kay bhejay huay hain ham khuloosdilee say logon say baat kartay hain.