2 Kurinthiyon 13

aakhiree tambeeh aur salaam

¹ab main teesree dafa aap kay paas a raha hoon. kalaam-ay-muqaddas kay mutaabiq laazim hai ki har ilzaam kee tasdeeq do ya teen gavaahon say kee jaaay. ²jab main doosree dafa aap kay paas aaya tha to main nay pahelay say aap ko aagaah kiya tha. ab main aap say door yah baat dubaara kaheta hoon ki jab main vaapas aaoonga to na vah bachengay jinhon nay pahelay gunaah kiya tha na deegar log. ³jo bhee saboot aap maang rahay hain ki maseeh meray zareeay bolta hai vah main aap ko doonga. aap kay saath sulook men maseeh kamzor naheen hai. naheen, vah aap kay darmiyaan hee apnee quvvat ka izhaar karta hai. ⁴kyoonki agarchi usay kamzor haalat men masloob kiya gaya, lekin ab vah allaah kee qudrat say zinda hai. isee tarah ham bhee us men kamzor hain, lekin allaah kee qudrat say ham aap kee khidmat kartay vaqt us kay saath zinda hain.

⁵apnay aap ko jaanch kar maaloom karen ki kya aap ka eemaan qaaim hai? khud apnay aap ko parkhen. kya aap naheen jaantay ki eesa maseeh aap men hai? agar naheen to is ka matlab hota ki aap ka eemaan naamaqbool saabit hota. ⁶lekin mujhay ummeed hai ki aap itna pahechaan lengay ki jahaan tak hamaara taalluq hai ham naamaqbool saabit naheen huay hain. ⁷ham allaah say dua kartay hain ki aap say koee ghaltee na ho jaaay. baat yah naheen ki logon kay saamnay ham saheeh niklen balki yah ki aap saheeh kaam karen, chaahay log hamen khud naakaam kyoon na qaraar den. ⁸kyoonki ham haqeeqat kay khilaaf khaday naheen ho saktay balki sirf us kay haq men. ⁹ham khush hain jab aap taaqatvar hain go ham khud kamzor hain. aur hamaaree dua yah hai ki aap kaamil ho jaaen. ¹⁰yahee vajah hai ki main aap say door rah kar likhta hoon. phir jab main aaoonga to mujhay apna ikhtiyaar istemaal karkay aap par sakhtee naheen karnee padegee. kyoonki khudaavand nay mujhay yah ikhtiyaar aap ko dha denay kay liyay naheen balki aap ko taameer karnay kay liyay diya hai.

¹¹bhaaiyo, aakhir men main aap ko salaam kaheta hoon. sudhar jaaen, ek doosray kee hausalaaafzaaee karen, ek hee soch rakhen aur sulah-salaamatee kay saath zindagee guzaaren. phir muhabbat aur salaamatee ka khuda aap kay saath hoga.

¹²ek doosray ko muqaddas bosa dena. tamaam muqaddaseen aap ko salaam kahetay hain.

¹³khudaavand eesa maseeh ka fazl, allaah kee muhabbat aur rooh-ul-quds kee rifaaqat aap sab kay saath hotee rahay.