2 Kurinthiyon 12

paulus par kaee baaton ka inkishaaf

¹laazim hai ki main kuchh aur fakhar karoon. agarchi is ka koee faaida naheen, lekin ab main un royaaon aur inkishaafaat ka zikr karoonga jo khudaavand nay mujh par zaahir kiay. ²main maseeh men ek aadmee ko jaanta hoon jisay chaudah saal huay chheen kar teesray aasmaan tak pahunchaaya gaya. mujhay naheen pata ki usay yah tajriba jism men ya is kay baahar hua. khuda jaanta hai. ³haan, khuda hee jaanta hai ki vah jism men tha ya naheen. lekin yah main jaanta hoon ⁴ki usay chheen kar firdaus men laaya gaya jahaan us nay naaqaabil-ay-bayaan baaten suneen, aisee baaten jin ka zikr karna insaan kay liyay rava naheen. ⁵is qism kay aadmee par main fakhar karoonga, lekin apnay aap par naheen. main sirf un baaton par fakhar karoonga jo meree kamzor haalat ko zaahir kartee hain. ⁶agar main fakhar karna chaahata to is men ahemaq na hota, kyoonki main haqeeqat bayaan karta. lekin main yah naheen karoonga, kyoonki main chaahata hoon ki sab kee meray baaray men raay sirf us par munhasir ho jo main karta ya bayaan karta hoon. koee mujhay is say ziyaada na samjhay.

⁷lekin mujhay in aala inkishaafaat kee vajah say ek kaanta chubho diya gaya, ek takleefdih cheez jo meray jism men dhansee rahetee hai taaki main phool na jaaoon. iblees ka yah paighambar meray mukkay maarta raheta hai taaki main maghroor na ho jaaoon. ⁸teen baar main nay khudaavand say iltija kee ki vah isay mujh say door karay. ⁹lekin us nay mujhay yahee javaab diya, “mera fazl teray liyay kaafee hai, kyoonki meree qudrat ka poora izhaar teree kamzor haalat hee men hota hai.” is liyay main mazeed khushee say apnee kamzoriyon par fakhar karoonga taaki maseeh kee qudrat mujh par thaheree rahay. ¹⁰yahee vajah hai ki main maseeh kee khaatir kamzoriyon, gaaliyon, majbooriyon, eezaarasaaniyon aur pareshaaniyon men khush hoon, kyoonki jab main kamzor hota hoon tab hee main taaqatvar hota hoon.

paulus kee kurinthiyon kay liyay fikr

¹¹main bevuqoof ban gaya hoon, lekin aap nay mujhay majboor kar diya hai. chaahiay tha ki aap hee doosron kay saamnay meray haq men baat kartay. kyoonki beshak main kuchh bhee naheen hoon, lekin in naam-nihaad khaas rasoolon kay muqaablay men main kisee bhee lihaaz say kam naheen hoon. ¹²jo mut’addid ilaahee nishaan, mojizay aur zabardast kaam meray vaseelay say huay vah saabit kartay hain ki main rasool hoon. haan, vah badee saabitqadmee say aap kay darmiyaan kiay gaay. ¹³jo khidmat main nay aap kay darmiyaan kee, kya vah khuda kee deegar jamaaaton men meree khidmat kee nisbat kam thee? hargiz naheen! is men farq sirf yah tha ki main aap kay liyay maalee bojh na bana. mujhay muaaf karen agar mujh say is men ghaltee huee hai.

¹⁴ab main teesree baar aap kay paas aanay kay liyay tayyaar hoon. is martaba bhee main aap kay liyay bojh ka baais naheen banoonga, kyoonki main aap ka maal naheen balki aap hee ko chaahata hoon. aakhir bachchon ko maan-baap kee madad kay liyay maal jama naheen karna chaahiay balki maan-baap ko bachchon kay liyay. ¹⁵main to badee khushee say aap kay liyay har kharcha utha loonga balki apnay aap ko bhee kharch kar doonga. kya aap mujhay kam piyaar karengay agar main aap say ziyaada muhabbat rakhoon?

¹⁶theek hai, main aap kay liyay bojh na bana. lekin baaz sochtay hain ki main chaalaak hoon aur aap ko dhokay say apnay jaal men phansa liya. ¹⁷kis tarah? jin logon ko main nay aap kay paas bheja kya main nay un men say kisee kay zareeay aap say ghalat faaida uthaaya? ¹⁸main nay titus kee hausalaaafzaaee kee ki vah aap kay paas jaaay aur doosray bhaaee ko bhee saath bhej diya. kya titus nay aap say ghalat faaida uthaaya? hargiz naheen! kyoonki ham donon ek hee rooh men ek hee raah par chaltay hain.

¹⁹aap kaafee der say soch rahay hongay ki ham aap kay saamnay apna difa kar rahay hain. lekin aisa naheen hai balki ham maseeh men hotay huay allaah kay huzoor hee yah kuchh bayaan kar rahay hain. aur meray azeezo, jo kuchh bhee ham kartay hain ham aap kee taameer karnay kay liyay kartay hain. ²⁰mujhay dar hai ki jab main aaoonga to na aap kee haalat mujhay pasand aaegee, na meree haalat aap ko. mujhay dar hai ki aap men jhagda, hasad, ghussa, khudgharzee, buhtaan, gapbaajee, gharoor aur betarteebee paaee jaaegee. ²¹haan, mujhay dar hai ki aglee dafa jab aaoonga to allaah mujhay aap kay saamnay neecha dikhaaega, aur main un bahuton kay liyay gham khaaoonga jinhon nay maazee men gunaah karkay ab tak apnee naapaakee, zinaakaaree aur ayyaashee say tauba naheen kee.