2 Kurinthiyon 11

paulus aur jhootay rasool

¹khuda karay ki jab main apnee hamaaqat ka kuchh izhaar karta hoon to aap mujhay bardaasht karen. haan, zaroor mujhay bardaasht karen, ²kyoonki main aap kay liyay allaah kee see ghairat rakhta hoon. main nay aap ka rishta ek hee mard kay saath baandha, aur main aap ko paakdaaman kunvaaree kee haisiyat say us mard maseeh kay huzoor pesh karna chaahata tha. ³lekin afsos, mujhay dar hai ki aap havva kee tarah gunaah men gir jaaengay, ki jis tarah saamp nay apnee chaalaakee say havva ko dhoka diya usee tarah aap kee soch bhee bigad jaaegee aur vah khuloosdilee aur paak lagan khatm ho jaaegee jo aap maseeh kay liyay mahsoos kartay hain. ⁴kyoonki aap khushee say har ek ko bardaasht kartay hain jo aap kay paas a kar ek farq qism ka eesa pesh karta hai, ek aisa eesa jo ham nay aap ko pesh naheen kiya tha. aur aap ek aisee rooh aur aisee “khushkhabaree” qabool kartay hain jo us rooh aur khushkhabaree say bilkul farq hai jo aap ko ham say milee thee.

⁵mera naheen khayaal ki main in naam-nihaad ‘khaas’ rasoolon kee nisbat kam hoon. ⁶ho sakta hai ki main bolnay men maahir naheen hoon, lekin yah meray ilm kay baaray men naheen kaha ja sakta. yah ham nay aap ko saaf saaf aur har lihaaz say dikhaaya hai.

⁷main nay allaah kee khushkhabaree sunaanay kay liyay aap say koee bhee muaavaza na liya. yoon main nay apnay aap ko neecha kar diya taaki aap ko sarfaraaz kar diya jaaay. kya is men mujh say ghaltee huee? ⁸jab main aap kee khidmat kar raha tha to mujhay khuda kee deegar jamaaaton say paisay mil rahay thay, yaanee aap kee madad karnay kay liyay main unhen loot raha tha. ⁹aur jab main aap kay paas tha aur zarooratmand tha to main kisee par bojh na bana, kyoonki jo bhaaee makiduniya say aaay unhon nay meree zarooriyaat pooree keen. maazee men main aap par bojh na bana aur aainda bhee naheen banoonga. ¹⁰maseeh kee us sachchaaee kee qasam jo meray andar hai, akhya kay pooray soobay men koee mujhay is par fakhar karnay say naheen rokega. ¹¹main yah kyoon kah raha hoon? is liyay ki main aap say muhabbat naheen rakhta? khuda hee jaanta hai ki main aap say muhabbat rakhta hoon.

¹²aur jo kuchh main ab kar raha hoon vahee karta rahoonga, taaki main naam-nihaad rasoolon ko vah mauqa na doon jo vah dhoond rahay hain. kyoonki yahee un ka maqsad hai ki vah fakhar karkay yah kah saken ki vah ham jaisay hain. ¹³aisay log to jhootay rasool hain, dhokebaaz mazdoor jinhon nay maseeh kay rasoolon ka roop dhaar liya hai. ¹⁴aur kya ajab, kyoonki iblees bhee noor kay farishtay ka roop dhaar kar ghoomta phirta hai. ¹⁵to phir yah badee baat naheen ki us kay chelay raastbaazee kay khaadim ka roop dhaar kar ghoomtay phirtay hain. un ka anjaam un kay aamaal kay mutaabiq hee hoga.

rasool honay kee vajah say paulus kee eezaarasaanee

¹⁶main dubaara kaheta hoon ki koee mujhay ahemaq na samjhay. lekin agar aap yah sochen bhee to kam az kam mujhay ahemaq kee haisiyat say qabool karen taaki main bhee thoda bahut apnay aap par fakhar karoon. ¹⁷asal men jo kuchh main ab bayaan kar raha hoon vah khudaavand ko pasand naheen hai, balki main ahemaq kee tarah baat kar raha hoon. ¹⁸lekin choonki itnay log jismaanee taur par fakhar kar rahay hain is liyay main bhee fakhar karoonga. ¹⁹beshak aap khud itnay daanishmand hain ki aap ahemaqon ko khushee say bardaasht kartay hain. ²⁰haan, balki aap yah bhee bardaasht kartay hain jab log aap ko ghulaam banaatay, aap ko loottay, aap say ghalat faaida uthaatay, nakhray kartay aur aap ko thappad maartay hain. ²¹yah kah kar mujhay sharm aatee hai ki ham itnay kamzor thay ki ham aisa na kar sakay.

lekin agar koee kisee baat par fakhar karnay kee jur’at karay (main ahemaq kee see baat kar raha hoon) to main bhee utnee hee jur’at karoonga. ²²kya vah ibraanee hain? main bhee hoon. kya vah israaeelee hain? main bhee hoon. kya vah ibraaheem kee aulaad hain? main bhee hoon. ²³kya vah maseeh kay khaadim hain? (ab to main goya bekhud ho gaya hoon ki is tarah kee baaten kar raha hoon!) main un say ziyaada maseeh kee khidmat karta hoon. main nay un say kaheen ziyaada mehanat-mashaqqat kee, ziyaada dafa jel men raha, meray ziyaada sakhtee say koday lagaaay gaay aur main baar baar marnay kay khatron men raha hoon. ²⁴mujhay yahoodiyon say paanch dafa 39 kodon kee saza milee hai. ²⁵teen dafa romiyon nay mujhay laathee say maara. ek baar mujhay sangasaar kiya gaya. jab main samundar men safar kar raha tha to teen martaba mera jahaaz tabaah hua. haan, ek dafa mujhay jahaaz kay tabaah honay par ek pooree raat aur din samundar men guzaarna pada. ²⁶meray beshumaar safron kay dauraan mujhay kaee tarah kay khatron ka saamna karna pada, daryaaon aur daakuon ka khatra, apnay hamvatanon aur ghairyahoodiyon kay hamlon ka khatra. jahaan bhee main gaya hoon vahaan yah khatray maujood rahay, khwaah main shaher men tha, khwaah ghair’aabaad ilaaqay men ya samundar men. jhootay bhaaiyon kee taraf say bhee khatray rahay hain. ²⁷main nay jaanfishaanee say sakht mehanat-mashaqqat kee hai aur kaee raat jaagta raha hoon, main bhooka aur piyaasa raha hoon, main nay bahut rozay rakhay hain. mujhay sardee aur nangepan ka tajriba hua hai. ²⁸aur yah un fikron kay ilaava hai jo main khuda kee tamaam jamaaaton kay liyay mahsoos karta hoon aur jo mujhay dabaatee rahetee hain. ²⁹jab koee kamzor hai to main apnay aap ko bhee kamzor mahsoos karta hoon. jab kisee ko ghalat raah par laaya jaata hai to main us kay liyay shadeed ranjish mahsoos karta hoon.

³⁰agar mujhay fakhar karna paday to main un cheezon par fakhar karoonga jo meree kamzor haalat zaahir kartee hain. ³¹hamaara khuda aur khudaavand eesa ka baap (us kee hamd-o-sana abad tak ho) jaanta hai ki main jhoot naheen bol raha. ³²jab main damishq shaher men tha to baadshaah aritaas kay gavarnar nay shaher kay tamaam darvaazon par apnay paheredaar muqarrar kiay taaki vah mujhay giriftaar karen. ³³lekin shaher kee faseel men ek dareecha tha, aur mujhay ek tokray men rakh kar vahaan say utaara gaya. yoon main us kay haathon say bach nikla.