2 Kurinthiyon 10

paulus apnee khidmat ka difa karta hai

¹main aap say apeel karta hoon, main paulus jis kay baaray men kaha jaata hai ki main aap kay roo-ba-roo aajiz hota hoon aur sirf aap say door ho kar diler hota hoon. maseeh kee haleemee aur narmee kay naam men ²men aap say minnat karta hoon ki mujhay aap kay paas a kar itnee dileree say un logon say nipatna na paday jo samajhtay hain ki hamaara chaal-chalan duniyaavee hai. kyoonki filahaal aisa lagta hai ki is kee zaroorat hogee. ³beshak ham insaan hee hain, lekin ham duniya kee tarah jang naheen ladtay. ⁴aur jo hathiyaar ham is jang men istemaal kartay hain vah is duniya kay naheen hain, balki unhen allaah kee taraf say qilaay dha denay kee quvvat haasil hai. in say ham ghalat khayaalaat kay dhaanche ⁵aur har oonchee cheez dha detay hain jo allaah kay ilm-o-irfaan kay khilaaf khadee ho jaatee hai. aur ham har khayaal ko qaid karkay maseeh kay taabay kar detay hain. ⁶haan, aap kay pooray taur par taabay ho jaanay par ham har naafarmaanee kee saza denay kay liyay tayyaar hongay.

⁷aap sirf zaahiree baaton par ghaur kar rahay hain. agar kisee ko is baat ka etimaad ho ki vah maseeh ka hai to vah is ka bhee khayaal karay ki ham bhee usee kee tarah maseeh kay hain. ⁸kyoonki agar main us ikhtiyaar par mazeed fakhar bhee karoon jo khudaavand nay hamen diya hai to bhee main sharminda naheen hoonga. ghaur karen ki us nay hamen aap ko dha denay ka naheen balki aap kee ruhaanee taameer karnay ka ikhtiyaar diya hai. ⁹main naheen chaahata ki aisa lagay jaisay main aap ko apnay khaton say daraanay kee koshish kar raha hoon. ¹⁰kyoonki baaz kahetay hain, “paulus kay khat zordaar aur zabardast hain, lekin jab vah khud haazir hota hai to vah kamzor aur us kay bolnay ka tarz hiqaarat’aamez hai.” ¹¹aisay log is baat ka khayaal karen ki jo baaten ham aap say door hotay huay apnay khaton men pesh kartay hain un hee baaton par ham amal karengay jab aap kay paas aaengay.

¹²ham to apnay aap ko un men shumaar naheen kartay jo apnee taareef karkay apnee sifaarish kartay rahetay hain, na apna un kay saath muvaazna kartay hain. vah kitnay besamajh hain jab vah apnay aap ko meyaar bana kar usee par apnay aap ko jaanchtay hain aur apna muvaazna apnay aap say kartay hain. ¹³lekin ham munaasib hadd say ziyaada fakhar naheen karengay balki sirf us hadd tak jo allaah nay hamaaray liyay muqarrar kiya hai. aur aap bhee is hadd kay andar a jaatay hain. ¹⁴is men ham munaasib hadd say ziyaada fakhar naheen kar rahay, kyoonki ham to maseeh kee khushkhabaree lay kar aap tak pahunch gaay hain. agar aisa na hota to phir aur baat hotee. ¹⁵ham aisay kaam par fakhar naheen kartay jo doosron kee mehanat say sar’anjaam diya gaya hai. is men bhee ham munaasib haddon kay andar rahetay hain, balki ham yah ummeed rakhtay hain ki aap ka eemaan badh jaaay aur yoon hamaaree qadar-o-qeemat bhee allaah kee muqarrara hadd tak badh jaaay. khuda karay ki aap men hamaara yah kaam itna badh jaae ¹⁶ki ham allaah kee khushkhabaree aap say aagay ja kar bhee suna saken. kyoonki ham us kaam par fakhar naheen karna chaahatay jisay doosray kar chukay hain.

¹⁷kalaam-ay-muqaddas men likha hai, “fakhar karnay vaala khudaavand hee par fakhar karay.” ¹⁸jab log apnee taareef karkay apnee sifaarish kartay hain to is men kya hai! is say vah saheeh saabit naheen hotay, balki ahem baat yah hai ki khudaavand hee is kee tasdeeq karay.