2 Kurinthiyon 1

¹yah khat paulus kee taraf say hai, jo allaah kee marzee say maseeh eesa ka rasool hai. saath hee yah bhaaee teemuthiyus kee taraf say bhee hai.

main kurinthus men allaah kee jamaaat aur sooba akhya men maujood tamaam muqaddaseen ko yah likh raha hoon.

²khuda hamaara baap aur khudaavand eesa maseeh aap ko fazl aur salaamatee ata karen.

allaah kee hamd-o-sanaa

³hamaaray khudaavand eesa maseeh kay khuda aur baap kee tamjeed ho, jo rahem ka baap aur tamaam tarah kee tasallee ka khuda hai. ⁴jab bhee ham museebat men phans jaatay hain to vah hamen tasallee deta hai taaki ham auron ko bhee tasallee day saken. phir jab vah kisee museebat say dochaar hotay hain to ham bhee un ko usee tarah tasallee day saktay hain jis tarah allaah nay hamen tasallee dee hai. ⁵kyoonki jitnee kasrat say maseeh kee see museebaten ham par a jaatee hain utnee kasrat say allaah maseeh kay zareeay hamen tasallee deta hai. ⁶jab ham museebaton say dochaar hotay hain to yah baat aap kee tasallee aur najaat ka baais bantee hai. jab hamaaree tasallee hotee hai to yah aap kee bhee tasallee ka baais bantee hai. yoon aap bhee sabr say vah kuchh bardaasht karnay kay qaabil ban jaatay hain jo ham bardaasht kar rahay hain. ⁷chunaanchay hamaaree aap kay baaray men ummeed pukhta rahetee hai. kyoonki ham jaantay hain ki jis tarah aap hamaaree museebaton men shareek hain usee tarah aap us tasallee men bhee shareek hain jo hamen haasil hotee hai.

⁸bhaaiyo, ham aap ko us museebat say aagaah karna chaahatay hain jis men ham sooba aasiya men phans gaay. ham par dabaao itna shadeed tha ki usay bardaasht karna naamumkin sa ho gaya aur ham jaan say haath dho baithay. ⁹ham nay mahsoos kiya ki hamen saza-ay-maut dee gaee hai. lekin yah is liyay hua taaki ham apnay aap par bharosa na karen balki allaah par jo murdon ko zinda kar deta hai. ¹⁰usee nay hamen aisee haibtanaak maut say bachaaya aur vah aainda bhee hamen bachaaega. aur ham nay us par ummeed rakhee hai ki vah hamen ek baar phir bachaaega. ¹¹aap bhee apnee duaaon say hamaaree madad kar rahay hain. yah kitnee khoobsoorat baat hai ki allaah bahuton kee duaaon ko sun kar ham par meharbaanee karega aur nateejay men bahuteray hamaaray liyay shukr karengay.

paulus kay mansoobon men tabdeelee

¹²yah baat hamaaray liyay fakhar ka baais hai ki hamaara zameer saaf hai. kyoonki ham nay allaah kay saamnay saadaadilee aur khuloos say zindagee guzaaree hai, aur ham nay apnee insaanee hikmat par inhisaar naheen kiya balki allaah kay fazl par. duniya men aur khaaskar aap kay saath hamaara ravayya aisa hee raha hai. ¹³ham to aap ko aisee koee baat naheen likhtay jo aap padh ya samajh naheen saktay. aur mujhay ummeed hai ki aap ko pooray taur par samajh aaegee, ¹⁴agarchi aap filahaal sab kuchh naheen samajhtay. kyoonki jab aap ko sab kuchh samajh aaega tab aap khudaavand eesa kay din ham par utna fakhar kar sakengay jitna ham aap par.

¹⁵choonki mujhay is ka poora yaqeen tha is liyay main pahelay aap kay paas aana chaahata tha taaki aap ko dugnee barkat mil jaaay. ¹⁶khayaal yah tha ki main aap kay haan say ho kar makiduniya jaaoon aur vahaan say aap kay paas vaapas aaoon. phir aap sooba yahoodiya kay safar kay liyay tayyaariyaan karnay men meree madad karkay mujhay aagay bhej saktay thay. ¹⁷aap mujhay bataaen ki kya main nay yah mansooba yoon hee banaaya tha? kya main duniyaavee logon kee tarah mansoobay bana leta hoon jo ek hee lamhay men “jee haan” aur “jee naheen” kahetay hain? ¹⁸lekin allaah vafaadaar hai aur vah mera gavaah hai ki ham aap kay saath baat kartay vaqt “naheen” ko “haan” kay saath naheen milaatay. ¹⁹kyoonki allaah ka farzand eesa maseeh jis kee munaadee main, seelaas aur teemuthiyus nay kee vah bhee aisa naheen hai. us nay kabhee bhee “haan” ko “naheen” kay saath naheen milaaya balki us men allaah kee hatmee “jee haan” vujood men aaee. ²⁰kyoonki vahee allaah kay tamaam vaadon kee “haan” hai. is liyay ham usee kay vaseelay say “aameen” (jee haan) kah kar allaah ko jalaal detay hain. ²¹aur allaah khud hamen aur aap ko maseeh men mazboot kar deta hai. usee nay hamen masah karkay makhsoos kiya hai. ²²usee nay ham par apnee muhar laga kar zaahir kiya hai ki ham us kee milkiyat hain aur usee nay hamen rooh-ul-quds day kar apnay vaadon ka baiaana ada kiya hai.

²³agar main jhoot boloon to allaah meray khilaaf gavaahee day. baat yah hai ki main aap ko bachaanay kay liyay kurinthus vaapas na aaya. ²⁴matlab yah naheen ki ham eemaan kay muaamalay men aap par hukoomat karna chaahatay hain. naheen, ham aap kay saath mil kar khidmat kartay hain taaki aap khushee say bhar jaaen, kyoonki aap to eemaan kee maarifat qaaim hain.