1 Teemuthiyus 6

¹jo bhee ghulaamee kay jooay men hain vah apnay maalikon ko pooree izzat kay laaiq samjhen taaki log allaah kay naam aur hamaaree taaleem par kufr na baken. ²jab maalik eemaan laatay hain to ghulaamon ko un kee is liyay kam izzat naheen karna chaahiay ki vah ab maseeh men bhaaee hain. balki vah un kee aur ziyaada khidmat karen, kyoonki ab jo un kee achchhee khidmat say faaida utha rahay hain vah eemaandaar aur azeez hain.

ghalat taaleem aur haqeeqee daulat

laazim hai ki aap logon ko in baaton kee taaleem den aur is men un kee hausalaaafzaaee karen. ³jo bhee is say farq taaleem day kar hamaaray khudaavand eesa maseeh kay sehatabakhsh alfaaz aur is khudaataras zindagee kee taaleem say vaabasta naheen rahetaa ⁴vah khudpasandee say phoola hua hai aur kuchh naheen samajhta. aisa shakhs bahs-mubaahasa karnay aur khaalee baaton par jhagadnay men ghairsehatmand dilchaspee leta hai. nateejay men hasad, jhagday, kufr aur badagumaanee paida hotee hai. ⁵yah log aapas men jhagadnay kee vajah say hamesha kudhtay rahetay hain. un kay zahen bigad gaay hain aur sachchaaee un say chheen lee gaee hai. haan, yah samajhtay hain ki khudaataras zindagee guzaarnay say maalee nafa haasil kiya ja sakta hai.

⁶khudaataras zindagee vaaqaee bahut nafa ka baais hai, lekin shart yah hai ki insaan ko jo kuchh bhee mil jaaay vah us par iktifa karay. ⁷ham duniya men apnay saath kya laaay? kuchh naheen! to ham duniya say nikaltay vaqt kya kuchh saath lay ja sakengay? kuchh bhee naheen! ⁸chunaanchay agar hamaaray paas khuraak aur libaas ho to yah hamaaray liyay kaafee hona chaahiay. ⁹jo ameer bannay kay khwaahaan rahetay hain vah kaee tarah kee aazmaaishon aur phandon men phans jaatay hain. bahut see naasamajh aur nuqsaandih khwaahishaat unhen halaakat aur tabaahee men gharq ho jaanay detee hain. ¹⁰kyoonki paison ka laalach har ghalat kaam ka sarchashma hai. kaee logon nay isee laalach kay baais eemaan say bhatak kar apnay aap ko bahut aziyat pahunchaaee hai.

shakhsee hidaayaat

¹¹lekin aap jo allaah kay banday hain in cheezon say bhaagtay rahen. in kee bajaay raastbaazee, khudaatarasee, eemaan, muhabbat, saabitqadmee aur narmdilee kay peechhay lagay rahen. ¹²eemaan kee achchhee kushtee laden. abdee zindagee say khoob lipat jaaen, kyoonki allaah nay aap ko yahee zindagee paanay kay liyay bulaaya, aur aap nay apnee taraf say bahut say gavaahon kay saamnay is baat ka iqraar bhee kiya. ¹³meray do gavaah hain, allaah jo sab kuchh zinda rakhta hai aur maseeh eesa jis nay puntiyus peelaatus kay saamnay apnay eemaan kee achchhee gavaahee dee. in hee kay saamnay main aap ko kaheta hoon ki ¹⁴yah hukm yoon poora karen ki aap par na daagh lagay, na ilzaam. aur is hukm par us din tak amal kartay rahen jab tak hamaara khudaavand eesa maseeh zaahir naheen ho jaata. ¹⁵kyoonki allaah maseeh ko muqarrara vaqt par zaahir karega. haan, jo mubaarak aur vaahid hukmaraan, baadshaahon ka baadshaah aur maalikon ka maalik hai vah usay muqarrara vaqt par zaahir karega. ¹⁶sirf vahee laafaanee hai, vahee aisee raushnee men raheta hai jis kay qareeb koee naheen a sakta. na kisee insaan nay usay kabhee dekha, na vah usay dekh sakta hai. us kee izzat aur qudrat abad tak rahay. aameen.

¹⁷jo maujooda duniya men ameer hain unhen samjhaaen ki vah maghroor na hon, na daulat jaisee ghairyaqeenee cheez par ummeed rakhen. is kee bajaay vah allaah par ummeed rakhen jo hamen fayyaazee say sab kuchh muhayya karta hai taaki ham us say lutf’andoz ho jaaen. ¹⁸yah pesh-ay-nazar rakh kar ameer nek kaam karen aur bhalaaee karnay men hee ameer hon. vah khushee say doosron ko denay aur apnee daulat men shareek karnay kay liyay tayyaar hon. ¹⁹yoon vah apnay liyay ek achchha khazaana jama karengay yaanee aanay vaalay jahaan kay liyay ek thos bunyaad jis par khaday ho kar vah haqeeqee zindagee pa sakengay.

²⁰teemuthiyus betay, jo kuchh aap kay havaalay kiya gaya hai usay mahfooz rakhen. duniyaavee bakvaas aur un mutzaad khayaalaat say katraatay rahen jinhen ghaltee say ilm ka naam diya gaya hai. ²¹kuchh to is ilm kay maahir honay ka daava karkay eemaan kee saheeh raah say hat gaay hain.

allaah ka fazl aap sab kay saath rahay.