1 Teemuthiyus 4

jhootay ustaad

¹rooh-ul-quds saaf farmaata hai ki aakhiree dinon men kuchh eemaan say hat kar farebdih roohon aur shaitaanee taaleemaat kee pairvee karengay. ²aisee taaleemaat jhoot bolnay vaalon kee riyaakaar baaton say aatee hain, jin kay zameer par iblees nay apna nishaan laga kar zaahir kar diya hai ki yah us kay apnay hain. ³yah shaadee karnay kee ijaazat naheen detay aur logon ko kahetay hain ki vah mukhtalif khaanay kee cheezon say parhez karen. lekin allaah nay yah cheezen is liyay banaaee hain ki jo eemaan rakhtay hain aur sachchaaee say vaaqif hain inhen shukrguzaaree kay saath khaaen. ⁴jo kuchh bhee allaah nay khalaq kiya hai vah achchha hai, aur hamen usay radd naheen karna chaahiay balki khuda ka shukr karkay usay kha lena chaahiay. ⁵kyoonki usay allaah kay kalaam aur dua say makhsoos-o-muqaddas kiya gaya hai.

maseeh eesa ka achchha khaadim

⁶agar aap bhaaiyon ko yah taaleem den to aap maseeh eesa kay achchhay khaadim hongay. phir yah saabit ho jaaega ki aap ko eemaan aur us achchhee taaleem kee sachchaaiyon men tarbiyat dee gaee hai jis kee pairvee aap kartay rahay hain. ⁷lekin daadee-ammaan kee in bemaanee farzee kahaaniyon say baaz rahen. in kee bajaay aisee tarbiyat haasil karen jis say aap kee ruhaanee zindagee mazboot ho jaaay. ⁸kyoonki jism kee tarbiyat ka thoda hee faaida hai, lekin ruhaanee tarbiyat har lihaaz say mufeed hai, is liyay ki agar ham is qism kee tarbiyat haasil karen to ham say haal aur mustaqbil men zindagee paanay ka vaada kiya gaya hai. ⁹yah baat qaabil-ay-etimaad hai aur isay pooray taur par qabool karna chaahiay. ¹⁰yahee vajah hai ki ham mehanat-mashaqqat aur jaanfishaanee kartay rahetay hain, kyoonki ham nay apnee ummeed zinda khuda par rakhee hai jo tamaam insaanon ka najaatadihanda hai, khaaskar eemaan rakhnay vaalon ka.

¹¹logon ko yah hidaayaat den aur sikhaaen. ¹²koee bhee aap ko is liyay haqeer na jaanay ki aap javaan hain. lekin zarooree hai ki aap kalaam men, chaal-chalan men, muhabbat men, eemaan men aur paakeezgee men eemaandaaron kay liyay namoona ban jaaen. ¹³jab tak main naheen aata is par khaas dhyaan den ki jamaaat men baaqaaidagee say kalaam kee tilaavat kee jaaay, logon ko naseehat kee jaaay aur unhen taaleem dee jaaay. ¹⁴apnee us nemat ko nazar’andaaz na karen jo aap ko us vaqt peshgoee kay zareeay milee jab buzurgon nay aap par apnay haath rakhay. ¹⁵in baaton ko farogh den aur in kay peechhay lagay rahen taaki aap kee taraqqee sab ko nazar aaay. ¹⁶apna aur taaleem ka khaas khayaal rakhen. in men saabitqadam rahen, kyoonki aisa karnay say aap apnay aap ko aur apnay sunnay vaalon ko bacha lengay.