1 Teemuthiyus 3
khuda kee jamaaat kay nigraan
1yah baat yaqeenee hai ki jo jamaaat ka nigraan banna chaahata hai vah ek achchhee zimmaadaaree kee aarzoo rakhta hai. 2laazim hai ki nigraan beilzaam ho. us kee ek hee beevee ho. vah hoshmand, samajhdaar [a] yoonaanee lafz men zabt-ay-nafs ka unsur bhee paaya jaata hai. , shareef, mehamaan-navaaz aur taaleem denay kay qaabil ho. 3vah sharaabee na ho, na ladaaka balki narmdil aur amnapasand. vah paison ka laalach karnay vaala na ho. 4laazim hai ki vah apnay khaandaan ko achchhee tarah sambhaal sakay aur ki us kay bachchay sharaafat kay saath us kee baat maanen. 5kyoonki agar vah apna khaandaan na sambhaal sakay to vah kis tarah allaah kee jamaaat kee dekh-bhaal kar sakega? 6vah naumureed na ho varna khatra hai ki vah phool kar iblees kay jaal men ulajh jaaay aur yoon us kee adaalat kee jaaay. 7laazim hai ki jamaaat say baahar kay log us kee achchhee gavaahee day saken, aisa na ho ki vah badnaam ho kar iblees kay phanday men phans jaaay.
jamaaat kay madadgaar
8isee tarah jamaaat kay madadgaar bhee shareef hon. vah riyaakaar na hon, na hadd say ziyaada mai pien. vah laalchee bhee na hon. 9laazim hai ki vah saaf zameer rakh kar eemaan kee pur’asraar sachchaaiyaan mahfooz rakhen. 10yah bhee zarooree hai ki unhen pahelay parkha jaaay. agar vah is kay baad beilzaam niklen to phir vah khidmat karen. 11un kee beeviyaan bhee shareef hon. vah buhtaan lagaanay vaalee na hon balki hoshmand aur har baat men vafaadaar. 12madadgaar kee ek hee beevee ho. laazim hai ki vah apnay bachchon aur khaandaan ko achchhee tarah sambhaal sakay. 13jo madadgaar achchhee tarah apnee khidmat sambhaaltay hain un kee haisiyat badh jaaegee aur maseeh eesa par un ka eemaan itna pukhta ho jaaega ki vah baday etimaad kay saath zindagee guzaar sakengay.
ek azeem bhed
14agarchi main jald aap kay paas aanay kee ummeed rakhta hoon to bhee aap ko yah khat likh raha hoon. 15lekin agar der bhee lagay to yah padh kar aap ko maaloom hoga ki allaah kay gharaanay men hamaara bartaao kaisa hona chaahiay. allaah ka gharaana kya hai? zinda khuda kee jamaaat, jo sachchaaee ka satoon aur bunyaad hai. 16yaqeenan hamaaray eemaan ka bhed azeem hai.
vah jism men zaahir hua,
rooh men raastbaaz thaheraa
aur farishton ko dikhaaee diya.
us kee ghairyahoodiyon men munaadee kee gaee,
us par duniya men eemaan laaya gayaa
aur usay aasmaan kay jalaal men utha liya gaya.