1 Teemuthiyus 2

jamaaat kee parastish

¹pahelay main is par zor dena chaahata hoon ki aap sab kay liyay darakhwaasten, duaaen, siphaarishen aur shukraguzaariyaan pesh karen, ²baadshaahon aur ikhtiyaar vaalon kay liyay bhee taaki ham aaraam aur sukoon say khudaataras aur shareef zindagee guzaar saken. ³yah achchha aur hamaaray najaatadihanda allaah ko pasandeeda hai. ⁴haan, vah chaahata hai ki tamaam insaan najaat pa kar sachchaaee ko jaan len. ⁵kyoonki ek hee khuda hai aur allaah aur insaan kay beech men ek hee darmiyaanee hai yaanee maseeh eesa, vah insaan ⁶jis nay apnay aap ko fidya kay taur par sab kay liyay day diya taaki vah makhlsee paaen. yoon us nay muqarrara vaqt par gavaahee dee ⁷aur yah gavaahee sunaanay kay liyay mujhay munaad, rasool aur ghairyahoodiyon ka ustaad muqarrar kiya taaki unhen eemaan aur sachchaaee ka paighaam sunaaoon. main jhoot naheen bol raha balki sachch kah raha hoon.

⁸ab main chaahata hoon ki har maqaamee jamaaat kay mard muqaddas haath utha kar dua karen. vah ghussay ya bahs-mubaahasa kee haalat men aisa na karen. ⁹isee tarah main chaahata hoon ki khavaateen munaasib kapday pahen kar sharaafat aur shaaistagee say apnay aap ko aaraasta karen. vah gundhay huay baal, sona, motee ya hadd say ziyaada mahengay kapdon say apnay aap ko aaraasta na karen ¹⁰balki nek kaamon say. kyoonki yahee aisee khavaateen kay liyay munaasib hai jo khudaataras honay ka daava kartee hain. ¹¹khaatoon khaamoshee say aur pooree faramaambardaaree kay saath seekhay. ¹²main khavaateen ko taaleem denay ya aadmiyon par hukoomat karnay kee ijaazat naheen deta. vah khaamosh rahen. ¹³kyoonki pahelay aadam ko tashkeel diya gaya, phir havva ko. ¹⁴aur aadam nay iblees say dhoka na khaaya balki havva nay, jis ka nateeja gunaah tha. ¹⁵lekin khavaateen bachchay janm denay say najaat paaengee. shart yah hai ki vah samajh kay saath eemaan, muhabbat aur muqaddas haalat men zindagee guzaartee rahen.