1 Teemuthiyus 1
1yah khat paulus kee taraf say hai jo hamaaray najaatadihanda allaah aur hamaaree ummeed maseeh eesa kay hukm par maseeh eesa ka rasool hai.
2main teemuthiyus ko likh raha hoon jo eemaan men mera sachcha beta hai.
khuda baap aur hamaara khudaavand maseeh eesa aap ko fazl, rahem aur salaamatee ata karen.
ghalat taaleem say khabardaar
3main nay aap ko makiduniya jaatay vaqt naseehat kee thee ki ifisus men rahen taaki aap vahaan kay kuchh logon ko ghalat taaleem denay say roken. 4unhen farzee kahaaniyon aur khatm na honay vaalay nasbanaamay kay peechhay na lagnay den. in say mahez bahs-mubaahasa paida hota hai aur allaah ka najaatabakhsh mansooba poora naheen hota. kyoonki yah mansooba sirf eemaan say takmeel tak pahunchta hai. 5meree is hidaayat ka maqsad yah hai ki muhabbat ubhar aaay, aisee muhabbat jo khaalis dil, saaf zameer aur beriya eemaan say paida hotee hai. 6kuchh log in cheezon say bhatak kar bemaanee baaton men gum ho gaay hain. 7yah shareeat kay ustaad banna chaahatay hain, lekin unhen un baaton kee samajh naheen aatee jo vah kar rahay hain aur jin par vah itnay etimaad say israar kar rahay hain.
8lekin ham to jaantay hain ki shareeat achchhee hai basharteeki isay saheeh taur par istemaal kiya jaaay. 9aur yaad rahay ki yah raastbaazon kay liyay naheen dee gaee. kyoonki yah un kay liyay hai jo baghair shareeat kay aur sarkash zindagee guzaartay hain, jo bedeen aur gunaahgaar hain, jo muqaddas aur ruhaanee baaton say khaalee hain, jo apnay maan-baap kay qaatil hain, jo khoonee, 10zinaakaar, hamjinsparast aur ghulaamon kay taajir hain, jo jhoot boltay, jhootee qasam khaatay aur mazeed bahut kuchh kartay hain jo sehatabakhsh taaleem kay khilaaf hai. 11aur sehatabakhsh taaleem kya hai? vah jo mubaarak khuda kee us jalaalee khushkhabaree men paaee jaatee hai jo meray sapurd kee gaee hai.
allaah kay rahem kay liyay shukrguzaaree
12main apnay khudaavand maseeh eesa ka shukr karta hoon jis nay meree taqviyat kee hai. main us ka shukr karta hoon ki us nay mujhay vafaadaar samajh kar khidmat kay liyay muqarrar kiya. 13go main pahelay kufr baknay vaala aur gustaakh aadmee tha, jo logon ko eeza deta tha, lekin allaah nay mujh par rahem kiya. kyoonki us vaqt main eemaan naheen laaya tha aur is liyay naheen jaanta tha ki kya kar raha hoon. 14haan, hamaaray khudaavand nay mujh par apna fazl kasrat say undel diya aur mujhay vah eemaan aur muhabbat ata kee jo hamen maseeh eesa men hotay huay miltee hai. 15ham is qaabil-ay-qabool baat par poora bharosa rakh saktay hain ki maseeh eesa gunaahgaaron ko najaat denay kay liyay is duniya men aaya. un men say main sab say bada gunaahgaar hoon, 16lekin yahee vajah hai ki allaah nay mujh par rahem kiya. kyoonki vah chaahata tha ki maseeh eesa mujh men jo avval gunaahgaar hoon apna vasee sabr zaahir karay aur main yoon un kay liyay namoona ban jaaoon jo us par eemaan la kar abdee zindagee paanay vaalay hain. 17haan, hamaaray azlee-o-abdee shahenshaah kee hamesha tak izzat-o-jalaal ho! vahee laafaanee, andekha aur vaahid khuda hai. aameen.
18teemuthiyus meray betay, main aap ko yah hidaayat un peshgoiyon kay mutaabiq deta hoon jo pahelay aap kay baaray men kee gaee theen. kyoonki main chaahata hoon ki aap in kee pairvee karkay achchhee tarah lad saken 19aur eemaan aur saaf zameer kay saath zindagee guzaar saken. kyoonki baaz nay yah baaten radd kar dee hain aur nateejay men un kay eemaan ka beda gharq ho gaya. 20huminyus aur sikandar bhee in men shaamil hain. ab main nay inhen iblees kay havaalay kar diya hai taaki vah kufr baknay say baaz aana seekhen.