1 Thissaluneekiyon 5

khudaavand kee aamad kay liyay tayyaar rahenaa

¹bhaaiyo, is kee zaroorat naheen ki ham aap ko likhen ki yah sab kuchh kab aur kis mauqay par hoga. ²kyoonki aap khud khoob jaantay hain ki khudaavand ka din yoon aaega jis tarah chor raat kay vaqt ghar men ghus aata hai. ³jab log kahengay, “ab amn-o-amaan hai,” to halaakat achaanak hee un par aan padegee. vah is tarah museebat men pad jaaengay jis tarah vah aurat jis ka bachcha paida ho raha hai. vah hargiz naheen bach sakengay. ⁴lekin aap bhaaiyo taareekee kee girift men naheen hain, is liyay yah din chor kee tarah aap par ghaalib naheen aana chaahiay. ⁵kyoonki aap sab raushnee aur din kay farzand hain. hamaara raat ya taareekee say koee vaasta naheen. ⁶gharaz aaen, ham doosron kee maanind na hon jo soay huay hain balki jaagtay rahen, hoshmand rahen. ⁷kyoonki raat kay vaqt hee log so jaatay hain, raat kay vaqt hee log nashay men dhut ho jaatay hain. ⁸lekin choonki ham din kay hain is liyay aaen ham hosh men rahen. laazim hai ki ham eemaan aur muhabbat ko ziraabaktar kay taur par aur najaat kee ummeed ko khod kay taur par pahen len. ⁹kyoonki allaah nay hamen is liyay naheen chuna ki ham par apna ghazab naazil karay balki is liyay ki ham apnay khudaavand eesa maseeh kay vaseelay say najaat paaen. ¹⁰us nay hamaaree khaatir apnee jaan day dee taaki ham us kay saath jien, khwaah ham us kee aamad kay din murda hon ya zinda. ¹¹is liyay ek doosray kee hausalaaafzaaee aur taameer kartay rahen, jaisa ki aap kar bhee rahay hain.

aakhiree hidaayaat aur salaam

¹²bhaaiyo, hamaaree darakhwaast hai ki aap un kee qadar karen jo aap kay darmiyaan sakht mehanat karkay khudaavand men aap kee raahanumaaee aur hidaayat kartay hain. ¹³un kee khidmat ko saamnay rakh kar piyaar say un kee badee izzat karen. aur ek doosray kay saath mel-milaap say zindagee guzaaren.

¹⁴bhaaiyo, ham is par zor dena chaahatay hain ki unhen samjhaaen jo beqaaida zindagee guzaartay hain, unhen tasallee den jo jaldee say maayoos ho jaatay hain, kamzoron ka khayaal rakhen aur sab ko sabr say bardaasht karen. ¹⁵is par dhyaan den ki koee kisee say buraaee kay badlay buraaee na karay balki aap har vaqt ek doosray aur tamaam logon kay saath nek kaam karnay men lagay rahen.

¹⁶har vaqt khush rahen, ¹⁷bilaanaagha dua karen, ¹⁸aur har haalat men khuda ka shukr karen. kyoonki jab aap maseeh men hain to allaah yahee kuchh aap say chaahata hai.

¹⁹rooh-ul-quds ko mat bujhaaen. ²⁰nubuvvaton kee tahqeer na karen. ²¹sab kuchh parakh kar vah thaamay rakhen jo achchha hai, ²²aur har qism kee buraaee say baaz rahen.

²³allaah khud jo salaamatee ka khuda hai aap ko pooray taur par makhsoos-o-muqaddas karay. vah karay ki aap pooray taur par rooh, jaan aur badan samet us vaqt tak mahfooz aur beilzaam rahen jab tak hamaara khudaavand eesa maseeh vaapas naheen a jaata. ²⁴jo aap ko bulaata hai vah vafaadaar hai aur vah aisa karega bhee.

²⁵bhaaiyo, hamaaray liyay dua karen.

²⁶tamaam bhaaiyon ko hamaaree taraf say bosa dena.

²⁷khudaavand kay huzoor main aap ko taakeed karta hoon ki yah khat tamaam bhaaiyon kay saamnay padha jaaay.

²⁸hamaaray khudaavand eesa maseeh ka fazl aap kay saath hota rahay.