1 Thissaluneekiyon 4

allaah ko pasandeeda zindagee

¹bhaaiyo, ek aakhiree baat, aap nay ham say seekh liya tha ki hamaaree zindagee kis tarah honee chaahiay taaki vah allaah ko pasand aaay. aur aap is kay mutaabiq zindagee guzaartay bhee hain. ab ham khudaavand eesa men aap say darakhwaast aur aap kee hausalaaafzaaee kartay hain ki aap is men mazeed taraqqee kartay jaaen. ²aap to un hidaayaat say vaaqif hain jo ham nay aap ko khudaavand eesa kay vaseelay say dee theen. ³kyoonki allaah kee marzee hai ki aap us kay liyay makhsoos-o-muqaddas hon, ki aap zinaakaaree say baaz rahen. ⁴har ek apnay badan par yoon qaaboo paana seekh lay ki vah muqaddas aur shareef zindagee guzaar sakay. ⁵vah ghaireemaandaaron kee tarah jo allaah say naavaaqif hain shahevatparastee ka shikaar na ho. ⁶is muaamalay men koee apnay bhaaee ka gunaah na karay, na us say ghalat faaida uthaaay. khudaavand aisay gunaahon kee saza deta hai. ham yah sab kuchh bata chukay aur aap ko aagaah kar chukay hain. ⁷kyoonki allaah nay hamen naapaak zindagee guzaarnay kay liyay naheen bulaaya balki makhsoos-o-muqaddas zindagee guzaarnay kay liyay. ⁸is liyay jo yah hidaayaat radd karta hai vah insaan ko naheen balki allaah ko radd karta hai jo aap ko apna muqaddas rooh day deta hai.

⁹yah likhnay kee zaroorat naheen ki aap doosray eemaandaaron say muhabbat rakhen. allaah nay khud aap ko ek doosray say muhabbat rakhna sikhaaya hai. ¹⁰aur haqeeqatan aap makiduniya kay tamaam bhaaiyon say aisee hee muhabbat rakhtay hain. to bhee bhaaiyo, ham aap kee hausalaaafzaaee karna chaahatay hain ki aap is men mazeed taraqqee kartay jaaen. ¹¹apnee izzat is men barqaraar rakhen ki aap sukoon say zindagee guzaaren, apnay faraaiz ada karen aur apnay haathon say kaam karen, jis tarah ham nay aap ko kah diya tha. ¹²jab aap aisa karengay to ghaireemaandaar aap kee qadar karengay aur aap kisee bhee cheez kay muhtaaj naheen rahengay.

khudaavand kee aamad

¹³bhaaiyo, ham chaahatay hain ki aap un kay baaray men haqeeqat jaan len jo so gaay hain taaki aap doosron kee tarah jin kee koee ummeed naheen maatam na karen. ¹⁴hamaara eemaan hai ki eesa mar gaya aur dubaara jee utha, is liyay hamaara yah bhee eemaan hai ki jab eesa vaapas aaega to allaah us kay saath un eemaandaaron ko bhee vaapas laaega jo maut kee neend so gaay hain.

¹⁵jo kuchh ham ab aap ko bata rahay hain vah khudaavand kee taaleem hai. khudaavand kee aamad par ham jo zinda hongay soay huay logon say pahelay khudaavand say naheen milengay. ¹⁶us vaqt oonchee aavaaz say hukm diya jaaega, farishta-ay-aazam kee aavaaz sunaaee degee, allaah ka turam bajega aur khudaavand khud aasmaan par say utar aaega. tab pahelay vah jee uthengay jo maseeh men mar gaay thay. ¹⁷in kay baad hee hamen jo zinda hongay baadlon par utha liya jaaega taaki hava men khudaavand say milen. phir ham hamesha khudaavand kay saath rahengay. ¹⁸chunaanchay in alfaaz say ek doosray ko tasallee diya karen.