1 Thissaluneekiyon 3

¹aakhirkaar ham yah haalat mazeed bardaasht na kar sakay. ham nay faisla kiya ki akelay hee athenay men rah kar ²teemuthiyus ko bhej dengay jo hamaara bhaaee aur maseeh kee khushkhabaree phailaanay men hamaaray saath allaah kee khidmat karta hai. ham nay usay bhej diya taaki vah aap ko mazboot karay aur eemaan men aap kee hausalaaafzaaee kare ³taaki koee in museebaton say bechain na ho jaaay. kyoonki aap khud jaantay hain ki in ka saamna karna hamaaray liyay allaah kee marzee hai. ⁴balki jab ham aap kay paas thay to ham nay is kee peshgoee kee ki hamen museebat bardaasht karnee padegee. aur aisa hee hua jaisa ki aap khoob jaantay hain. ⁵yahee vajah thee ki main nay teemuthiyus ko bhej diya. main yah haalaat bardaasht na kar saka, is liyay main nay usay aap kay eemaan ko maaloom karnay kay liyay bhej diya. aisa na ho ki aazmaanay vaalay nay aap ko yoon aazmaaish men daal diya ho ki hamaaree aap par mehanat zaaay jaaay.

⁶lekin ab teemuthiyus laut aaya hai, aur vah aap kay eemaan aur muhabbat kay baaray men achchhee khabar lay kar aaya hai. us nay hamen bataaya ki aap hamen bahut yaad kartay hain aur ham say utna hee milnay kay aarzoomand hain jitna ki ham aap say. ⁷bhaaiyo, aap aur aap kay eemaan kay baaray men yah sun kar hamaaree hausalaaafzaaee huee, haalaanki ham khud tarah tarah kay dabaao aur museebaton men phansay huay hain. ⁸ab hamaaree jaan men jaan a gaee hai, kyoonki aap mazbootee say khudaavand men qaaim hain. ⁹ham aap kee vajah say allaah kay kitnay shukrguzaar hain! yah khushee naaqaabil-ay-bayaan hai jo ham aap kee vajah say allaah kay huzoor mahsoos kartay hain. ¹⁰din raat ham badee sanjeedgee say dua kartay rahetay hain ki aap say dubaara mil kar vah kamiyaan pooree karen jo aap kay eemaan men ab tak rah gaee hain.

¹¹ab hamaara khuda aur baap khud aur hamaara khudaavand eesa raasta kholay taaki ham aap tak pahunch saken. ¹²khudaavand karay ki aap kee ek doosray aur deegar tamaam logon say muhabbat itnee badh jaaay ki vah yoon dil say chhalak uthay jis tarah aap kay liyay hamaaree muhabbat bhee chhalak rahee hai. ¹³kyoonki is tarah allaah aap kay dilon ko mazboot karega aur aap us vaqt hamaaray khuda aur baap kay huzoor beilzaam aur muqaddas saabit hongay jab hamaara khudaavand eesa apnay tamaam muqaddaseen kay saath aaega. aameen.