1 Thissaluneekiyon 2

thissaluneekay men paulus ka kaam

¹bhaaiyo, aap jaantay hain ki hamaara aap kay paas aana befaaida na hua. ²aap us dukh say bhee vaaqif hain jo hamen aap kay paas aanay say pahelay sahena pada, ki filippee shaher men hamaaray saath kitnee badasulookee huee thee. to bhee ham nay apnay khuda kee madad say aap ko us kee khushkhabaree sunaanay kee jur’at kee haalaanki bahut mukhaalafat ka saamna karna pada. ³kyoonki jab ham aap ko ubhaartay hain to is kay peechhay na to koee ghalat neeyat hotee hai, na koee naapaak maqsad ya chaalaakee. ⁴naheen, allaah nay khud hamen jaanch kar is laaiq samjha ki ham us kee khushkhabaree sunaanay kee zimmaadaaree sambhaalen. isee bina par ham boltay hain, insaanon ko khush rakhnay kay liyay naheen balki allaah ko jo hamaaray dilon ko parakhta hai. ⁵aap ko bhee maaloom hai ki ham nay na khushaamad say kaam liya, na ham pas-ay-parda laalchee thay - allaah hamaara gavaah hai! ⁶ham is maqsad say kaam naheen kar rahay thay ki log hamaaree izzat karen, khwaah aap hon ya deegar log. ⁷maseeh kay rasoolon kee haisiyat say ham aap kay liyay maalee bojh ban saktay thay, lekin ham aap kay darmiyaan hotay huay narmdil rahay, aisee maan kee tarah jo apnay chhotay bachchon kee parvarish kartee hai. ⁸hamaaree aap kay liyay chaahat itnee shadeed thee ki ham aap ko na sirf allaah kee khushkhabaree kee barkat men shareek karnay ko tayyaar thay balki apnee zindagiyon men bhee. haan, aap hamen itnay azeez thay! ⁹bhaaiyo, beshak aap ko yaad hai ki ham nay kitnee sakht mehanat-mashaqqat kee. din raat ham kaam kartay rahay taaki allaah kee khushkhabaree sunaatay vaqt kisee par bojh na banen.

¹⁰aap aur allaah hamaaray gavaah hain ki aap eemaan laanay vaalon kay saath hamaara sulook kitna muqaddas, raast aur beilzaam tha. ¹¹kyoonki aap jaantay hain ki ham nay aap men say har ek say aisa sulook kiya jaisa baap apnay bachchon kay saath karta hai. ¹²ham aap kee hausalaaafzaaee kartay, aap ko tasallee detay aur aap ko samjhaatay rahay ki aap allaah kay laaiq zindagee guzaaren, kyoonki vah aap ko apnee baadshaahee aur jalaal men hissa lenay kay liyay bulaata hai.

¹³ek aur vajah hai ki ham har vaqt khuda ka shukr kartay hain. jab ham nay aap tak allaah ka paighaam pahunchaaya to aap nay usay sun kar yoon qabool kiya jaisa yah haqeeqat men hai yaanee allaah ka kalaam jo insaanon kee taraf say naheen hai aur jo aap eemaandaaron men kaam kar raha hai. ¹⁴bhaaiyo, na sirf yah balki aap yahoodiya men allaah kee un jamaaaton kay namoonay par chal paday jo maseeh eesa men hain. kyoonki aap ko apnay hamvatanon kay haathon vah kuchh sahena pada jo unhen pahelay hee apnay hamvatan yahoodiyon say sahena pada tha. ¹⁵haan, yahoodiyon nay na sirf khudaavand eesa aur nabiyon ko qatl kiya balki hamen bhee apnay beech men say nikaal diya. yah log allaah ko pasand naheen aatay aur tamaam logon kay khilaaf ho kar ¹⁶hamen is say roknay kee koshish kartay hain ki ghairyahoodiyon ko allaah kee khushkhabaree sunaaen, aisa na ho ki vah najaat paaen. yoon vah har vaqt apnay gunaahon ka piyaala kinaaray tak bhartay ja rahay hain. lekin allaah ka poora ghazab un par naazil ho chuka hai.

paulus kee un say dubaara milnay kee khwaahish

¹⁷bhaaiyo, jab hamen kuchh der kay liyay aap say alag kar diya gaya (go ham dil say aap kay saath rahay) to ham nay badee aarzoo say aap say milnay kee pooree koshish kee. ¹⁸kyoonki ham aap kay paas aana chaahatay thay. haan, main paulus nay baar baar aanay kee koshish kee, lekin iblees nay hamen rok liya. ¹⁹aakhir aap hee hamaaree ummeed aur khushee ka baais hain. aap hee hamaara in’aam aur hamaara taaj hain jis par ham apnay khudaavand eesa kay huzoor fakhar karengay jab vah aaega. ²⁰haan, aap hamaara jalaal aur khushee hain.