1 Thissaluneekiyon 1

¹yah khat paulus, silvaanus aur teemuthiyus kee taraf say hai.

ham thissaluneekiyon kee jamaaat ko likh hai hain, unhen jo khuda baap aur khudaavand eesa maseeh par eemaan laaay hain.

allaah aap ko fazl aur salaamatee bakhshay.

thissaluneekiyon kee zindagee aur eemaan

²ham har vaqt aap sab kay liyay khuda ka shukr kartay aur apnee duaaon men aap ko yaad kartay rahetay hain. ³hamen apnay khuda baap kay huzoor khaaskar aap ka amal, mehanat-mashaqqat aur saabitqadmee yaad aatee rahetee hai. aap apna eemaan kitnee achchhee tarah amal men laaay, aap nay muhabbat kee rooh men kitnee mehanat-mashaqqat kee aur aap nay kitnee saabitqadmee dikhaaee, aisee saabitqadmee jo sirf hamaaray khudaavand eesa maseeh par ummeed hee dila saktee hai. ⁴bhaaiyo, allaah aap say muhabbat rakhta hai, aur hamen poora ilm hai ki us nay aap ko vaaqaee chun liya hai. ⁵kyoonki jab ham nay allaah kee khushkhabaree aap tak pahunchaaee to na sirf baaten karkay balki quvvat kay saath, rooh-ul-qoodas men aur pooray etimaad kay saath. aap jaantay hain ki jab ham aap kay paas thay to ham nay kis tarah kee zindagee guzaaree. jo kuchh ham nay kiya vah aap kee khaatir kiya. ⁶us vaqt aap hamaaray aur khudaavand kay namoonay par chalnay lagay. agarchi aap badee museebat men pad gaay to bhee aap nay hamaaray paighaam ko us khushee kay saath qabool kiya jo sirf rooh-ul-quds day sakta hai. ⁷yoon aap sooba makiduniya aur sooba akhya kay tamaam eemaandaaron kay liyay namoona ban gaay. ⁸khudaavand kay paighaam kee aavaaz aap men say nikal kar na sirf makiduniya aur akhya men sunaaee dee, balki yah khabar ki aap allaah par eemaan rakhtay hain har jagah tak pahunch gaee hai. nateejay men hamen kuchh kahenay kee zaroorat naheen rahee, ⁹kyoonki log har jagah baat kar rahay hain ki aap nay hamen kis tarah khush’aamadeed kaha hai, ki aap nay kis tarah buton say munh pher kar allaah kee taraf rujoo kiya taaki zinda aur haqeeqee khuda kee khidmat karen. ¹⁰log yah bhee kah rahay hain ki ab aap is intizaar men hain ki allaah ka farzand aasmaan par say aaay yaanee eesa jisay allaah nay murdon men say zinda kar diya aur jo hamen aanay vaalay ghazab say bachaaega.