1 Patras 4

tabdeelashuda zindagiyaan

¹ab choonki maseeh nay jismaanee taur par dukh uthaaya is liyay aap bhee apnay aap ko us kee see soch say les karen. kyoonki jis nay maseeh kee khaatir jismaanee taur par dukh sah liya hai us nay gunaah say nipat liya hai. ²nateejay men vah zameen par apnee baaqee zindagee insaan kee buree khwaahishaat pooree karnay men naheen guzaarega balki allaah kee marzee pooree karnay men. ³maazee men aap nay kaafee vaqt vah kuchh karnay men guzaara jo ghaireemaandaar pasand kartay hain yaanee ayyaashee, shahevatparastee, nashaabaazee, sharaabnoshee, rangraliyon, naach-rang aur ghinaunee butparastee men. ⁴ab aap kay ghaireemaandaar dost taajjub kartay hain ki aap un kay saath mil kar ayyaashee kay is tez dhaaray men chhalaang naheen lagaatay. is liyay vah aap par kufr baktay hain. ⁵lekin unhen allaah ko javaab dena padega jo zindon aur murdon kee adaalat karnay kay liyay tayyaar khada hai. ⁶yahee vajah hai ki allaah kee khushkhabaree unhen bhee sunaaee gaee jo ab murda hain. maqsad yah tha ki vah allaah kay saamnay rooh men zindagee guzaar saken agarchi insaanee lihaaz say un kay jism kee adaalat kee gaee hai.

apnee nemton say ek doosray kee khidmat karen

⁷tamaam cheezon ka khaatma qareeb a gaya hai. chunaanchay dua karnay kay liyay chust aur hoshmand rahen. ⁸sab say zarooree baat yah hai ki aap ek doosray say lagaataar muhabbat rakhen, kyoonki muhabbat gunaahon kee badee taadaad par parda daal detee hai. ⁹budabudaaay baghair ek doosray kee mehamaan-navaazee karen. ¹⁰allaah apna fazl mukhtalif nemton say zaahir karta hai. fazl ka yah intizaam vafaadaaree say chalaatay huay ek doosray kee khidmat karen, har ek us nemat say jo usay milee hai. ¹¹agar koee bolay to allaah kay say alfaaz kay saath bolay. agar koee khidmat karay to us taaqat kay zareeay jo allaah usay muhayya karta hai, kyoonki is tarah hee allaah ko eesa maseeh kay vaseelay say jalaal diya jaaega. azal say abad tak jalaal aur qudrat usee kee ho! aameen.

aap kee museebat ghairmaamoolee naheen hai

¹²azeezo, eezaarasaanee kee us aag par taajjub na karen jo aap ko aazmaanay kay liyay aap par aan padee hai. yah mat sochna ki meray saath kaisee ghairmaamoolee baat ho rahee hai. ¹³balki khushee manaaen ki aap maseeh kay dukhon men shareek ho rahay hain. kyoonki phir aap us vaqt bhee khushee manaaengay jab maseeh ka jalaal zaahir hoga. ¹⁴agar log is liyay aap kee beizzatee kartay hain ki aap maseeh kay pairokaar hain to aap mubaarak hain. kyoonki is ka matlab hai ki allaah ka jalaalee rooh aap par thahera hua hai. ¹⁵agar aap men say kisee ko dukh uthaana paday to yah is liyay naheen hona chaahiay ki aap qaatil, chor, mujrim ya fasaadee hain. ¹⁶lekin agar aap ko maseeh kay pairokaar honay kee vajah say dukh uthaana paday to na sharmaaen balki maseeh kay naam men allaah kee hamd-o-sana karen.

¹⁷kyoonki ab vaqt a gaya hai ki allaah kee adaalat shuroo ho jaaay, aur pahelay us kay ghar vaalon kee adaalat kee jaaegee. agar aisa hai to phir is ka anjaam un kay liyay kya hoga jo allaah kee khushkhabaree kay taabay naheen hain? ¹⁸aur agar raastbaaz mushkil say bachengay to phir bedeen aur gunaahgaar ka kya hoga? ¹⁹chunaanchay jo allaah kee marzee say dukh utha rahay hain vah nek kaam karnay say baaz na aaen balki apnee jaanon ko usee kay havaalay karen jo un ka vafaadaar khaaliq hai.