1 Patras 3
beevee aur shauhar
1isee tarah aap beeviyon ko bhee apnay apnay shauhar kay taabay rahena hai. kyoonki is tarah vah jo eemaan naheen rakhtay apnee beevee kay chaal-chalan say jeetay ja saktay hain. kuchh kahenay kee zaroorat naheen rahegee 2kyoonki vah dekhengay ki aap kitnee paakeezgee say khuda kay khauf men zindagee guzaartee hain. 3is kee fikr mat karna ki aap zaahiree taur par aaraasta hon, maslan khaas taur-tareeqon say gundhay huay baalon say ya sonay kay zevar aur shaandaar libaas pahennay say. 4is kay bajaay is kee fikr karen ki aap kee baatinee shakhsiyat aaraasta ho. kyoonki jo rooh narmdilee aur sukoon kay laafaanee zevron say sajee huee hai vahee allaah kay nazdeek beshaqeemat hai. 5maazee men allaah par ummeed rakhnay vaalee muqaddas khavaateen bhee isee tarah apna singaar kiya kartee theen. yoon vah apnay shauharon kay taabay raheen, 6saara kee tarah jo apnay shauhar ibraaheem ko aaqa kah kar us kee maantee thee. aap to saara kee betiyaan ban gaee hain. chunaanchay nek kaam karen aur kisee bhee cheez say na daren, khwaah vah kitnee hee daraaaunee kyoon na ho. 7is tarah laazim hai ki aap jo shauhar hain samajh kay saath apnee beeviyon kay saath zindagee guzaaren, yah jaan kar ki yah aap kee nisbat kamzor hain. un kee izzat karen, kyoonki yah bhee aap kay saath zindagee kay fazl kee vaaris hain. aisa na ho ki is men beparvaaee karnay say aap kee duaaiya zindagee men rukaavat paida ho jaaay.
nek zindagee guzaarnay kee vajah say dukh
8aakhir men ek aur baat, aap sab ek hee soch rakhen aur ek doosray say taalluqaat men hamdardee, piyaar, rahem aur haleemee ka izhaar karen. 9kisee kay ghalat kaam kay javaab men ghalat kaam mat karna, na kisee kee gaaliyon kay javaab men gaalee dena. is kay bajaay javaab men aisay shakhs ko barkat den, kyoonki allaah nay aap ko bhee is liyay bulaaya hai ki aap us kee barkat viraasat men paaen. 10kalaam-ay-muqaddas yoon farmaata hai,
“kaun mazay say zindagee guzaarnaa
aur achchhay din dekhna chaahata hai?
vah apnee zabaan ko shareer baaten karnay say roke
aur apnay honton ko jhoot bolnay say.
11vah buraaee say munh pher kar nek kaam karay,
sulah-salaamatee ka taalib ho kar
us kay peechhay laga rahay.
12kyoonki rabb kee aankhen raastbaazon par lagee rahetee hain,
aur us kay kaan un kee duaaon kee taraf maail hain.
lekin rabb ka chihara un kay khilaaf hai jo ghalat kaam kartay hain.”
13agar aap nek kaam karnay men sargarm hon to kaun aap ko nuqsaan pahunchaaega? 14lekin agar aap ko raast kaam karnay kee vajah say dukh bhee uthaana paday to aap mubaarak hain. un kee dhamkiyon say mat darna aur mat ghabraanaa 15balki apnay dilon men khudaavand maseeh ko makhsoos-o-muqaddas jaanen. aur jo bhee aap say aap kee maseeh par ummeed kay baaray men poochhay har vaqt usay javaab denay kay liyay tayyaar rahen. lekin narmdilee say aur khuda kay khauf kay saath javaab den. 16saath saath aap ka zameer saaf ho. phir jo log aap kay maseeh men achchhay chaal-chalan kay baaray men ghalat baaten kar rahay hain unhen apnee tuhamat par sharm aaegee. 17yaad rahay ki ghalat kaam karnay kee vajah say dukh sahenay kee nisbat behatar yah hai ki ham nek kaam karnay kee vajah say takleef uthaaen, basharteeki yah allaah kee marzee ho. 18kyoonki maseeh nay hamaaray gunaahon ko mitaanay kee khaatir ek baar sada kay liyay maut sahee. haan, jo raastbaaz hai us nay yah naaraaston kay liyay kiya taaki aap ko allaah kay paas pahunchaaay. usay badan kay etibaar say saza-ay-maut dee gaee, lekin rooh kay etibaar say usay zinda kar diya gaya. 19is rooh kay zareeay us nay ja kar qaidee roohon ko paighaam diya. 20yah un kee roohen theen jo un dinon men naaframaan thay jab nooh apnee kashtee bana raha tha. us vaqt allaah sabr say intizaar karta raha, lekin aakhirkaar sirf chand ek log yaanee aath afraad paanee men say guzar kar bach niklay. 21yah paanee us baptismay kee taraf ishaara hai jo is vaqt aap ko najaat dilaata hai. is say jism kee gandgee door naheen kee jaatee balki baptisma letay vaqt ham allaah say arz kartay hain ki vah hamaara zameer paak-saaf kar day. phir yah aap ko eesa maseeh kay jee uthnay say najaat dilaata hai. 22ab maseeh aasmaan par ja kar allaah kay dahenay haath baith gaya hai jahaan farishtay, ikhtiyaar vaalay aur quvvaten us kay taabay hain.