1 Patras 2

zinda patthar aur muqaddas qaum

¹chunaanchay apnee zindagee say tamaam tarah kee buraaee, dhokebaazee, riyaakaaree, hasad aur buhtaan nikaalen. ²choonki aap naumaulood bachchay hain is liyay khaalis ruhaanee doodh peenay kay aarzoomand rahen, kyoonki isay peenay say hee aap badhtay badhtay najaat kee naubat tak pahunchengay. ³jinhon nay khudaavand kee bhalaaee ka tajriba kiya hai un kay liyay aisa karna zarooree hai.

⁴khudaavand kay paas aaen, us zinda patthar kay paas jisay insaanon nay radd kiya hai, lekin jo allaah kay nazdeek chuneeda aur qeemtee hai. ⁵aur aap bhee zinda patthar hain jin ko allaah apnay ruhaanee maqdis ko taameer karnay kay liyay istemaal kar raha hai. na sirf yah balki aap us kay makhsoos-o-muqaddas imaam hain. eesa maseeh kay vaseelay say aap aisee ruhaanee qurbaaniyaan pesh kar rahay hain jo allaah ko pasand hain. ⁶kyoonki kalaam-ay-muqaddas farmaata hai,

“dekho, main siyyoon men ek patthar rakh deta hoon,

konay ka ek chuneeda aur qeemtee patthar.

jo us par eemaan laaegaa

usay sharminda naheen kiya jaaega.”

⁷yah patthar aap kay nazdeek jo eemaan rakhtay hain beshaqeemat hai. lekin jo eemaan naheen laaay unhon nay usay radd kiya.

“jis patthar ko makaan banaanay vaalon nay radd kiyaa

vah konay ka bunyaadee patthar ban gaya.”

⁸neez vah ek aisa patthar hai

“jo thokar ka baais banega,

ek chataan jo thes lagnay ka sabab hogee.”

vah is liyay thokar khaatay hain kyoonki vah kalaam-ay-muqaddas kay taabay naheen hotay. yahee kuchh allaah kee un kay liyay marzee thee.

⁹lekin aap allaah kee chunee huee nasal hain, aap aasmaanee baadshaah kay imaam aur us kee makhsoos-o-muqaddas qaum hain. aap us kee milkiyat ban gaay hain taaki allaah kay qavee kaamon ka elaan karen, kyoonki vah aap ko taareekee say apnee hairat’angez raushnee men laaya hai. ¹⁰ek vaqt tha jab aap us kee qaum naheen thay, lekin ab aap allaah kee qaum hain. pahelay aap par rahem naheen hua tha, lekin ab allaah nay aap par apnay rahem ka izhaar kiya hai.

allaah kay khaadim

¹¹azeezo, aap is duniya men ajnabee aur mehamaan hain. is liyay main aap ko taakeed karta hoon ki aap jismaanee khwaahishaat ka inkaar karen. kyoonki yah aap kee jaan say ladtee hain. ¹²ghaireemaandaaron kay darmiyaan rahetay huay itnee achchhee zindagee guzaaren ki go vah aap par ghalat kaam karnay kee tuhamat bhee lagaaen to bhee unhen aap kay nek kaam nazar aaen aur unhen allaah kee aamad kay din us kee tamjeed karnee paday.

¹³khudaavand kee khaatir har insaanee ikhtiyaar kay taabay rahen, khwaah baadshaah ho jo sab say aala ikhtiyaar rakhnay vaala hai, ¹⁴khwaah us kay vazeer jinhen us nay is liyay muqarrar kiya hai ki vah ghalat kaam karnay vaalon ko saza aur achchha kaam karnay vaalon ko shaabaash den. ¹⁵kyoonki allaah kee marzee hai ki aap achchha kaam karnay say naasamajh logon kee jaahil baaton ko band karen. ¹⁶aap aazaad hain, is liyay aazaadaana zindagee guzaaren. lekin apnee aazaadee ko ghalat kaam chhupaanay kay liyay istemaal na karen, kyoonki aap allaah kay khaadim hain. ¹⁷har ek ka munaasib ehatiraam karen, apnay bahen-bhaaiyon say muhabbat rakhen, khuda ka khauf maanen, baadshaah ka ehatiraam karen.

maseeh kay dukh ka namoonaa

¹⁸ai ghulaamo, har lihaaz say apnay maalikon ka ehatiraam karkay un kay taabay rahen. aur yah sulook na sirf un kay saath ho jo nek aur narmdil hain balki un kay saath bhee jo zaalim hain. ¹⁹kyoonki agar koee allaah kee marzee ka khayaal karkay beinsaaf takleef ka gham sabr say bardaasht karay to yah allaah ka fazl hai. ²⁰beshak is men fakhar kee koee baat naheen agar aap sabr say pitaaee kee vah saza bardaasht karen jo aap ko ghalat kaam karnay kee vajah say milee ho. lekin agar aap ko achchha kaam karnay kee vajah say dukh sahena paday aur aap yah saza sabr say bardaasht karen to yah allaah ka fazl hai. ²¹aap ko isee kay liyay bulaaya gaya hai. kyoonki maseeh nay aap kee khaatir dukh sahenay men aap kay liyay ek namoona chhoda hai. aur vah chaahata hai ki aap us kay naqsh-ay-qadam par chalen. ²²us nay to koee gunaah na kiya, aur na koee fareb kee baat us kay munh say niklee. ²³jab logon nay usay gaaliyaan deen to us nay javaab men gaaliyaan na deen. jab usay dukh sahena pada to us nay kisee ko dhamkee na dee balki us nay apnay aap ko allaah kay havaalay kar diya jo insaaf say adaalat karta hai. ²⁴maseeh khud apnay badan par hamaaray gunaahon ko saleeb par lay gaya taaki ham gunaahon kay etibaar say mar jaaen aur yoon hamaara gunaah say taalluq khatm ho jaaay. ab vah chaahata hai ki ham raastbaazee kee zindagee guzaaren. kyoonki aap ko usee kay zakhmon kay vaseelay say shifa milee hai. ²⁵pahelay aap aavaara bhedon kee tarah aavaara phir rahay thay, lekin ab aap apnee jaanon kay charvaahay aur nigraan kay paas laut aaay hain.