1 Patras 1

¹yah khat eesa maseeh kay rasool patras kee taraf say hai.

main allaah kay chunay huon ko likh raha hoon, duniya kay un mehamaanon ko jo puntus, galtiya, kappadukiya, aasiya aur bithuniya kay soobon men bikhray huay hain. ²khuda baap nay aap ko bahut der pahelay jaan kar chun liya aur us kay rooh nay aap ko makhsoos-o-muqaddas kar diya. nateejay men aap eesa maseeh kay taabay aur us kay chhidkaaay gaay khoon say paak-saaf ho gaay hain.

allaah aap ko bharpoor fazl aur salaamatee bakhshay.

zinda ummeed

³khuda hamaaray khudaavand eesa maseeh kay baap kee taareef ho! apnay azeem rahem say us nay eesa maseeh ko zinda karnay kay vaseelay say hamen naay siray say paida kiya hai. is say hamen ek zinda ummeed milee hai, ⁴ek aisee meeraas jo kabhee naheen sadegee, kabhee naheen naapaak ho jaaegee aur kabhee naheen murajhaaegee. kyoonki yah aasmaan par aap kay liyay mahfooz rakhee gaee hai. ⁵aur allaah aap kay eemaan kay zareeay apnee qudrat say aap kee us vaqt tak hifaazat karta rahega jab tak aap ko najaat na mil jaaay, vah najaat jo aakhirat kay din sab par zaahir honay kay liyay tayyaar hai.

⁶us vaqt aap khushee manaaengay, go filahaal aap ko thodee der kay liyay tarah tarah kee aazmaaishon ka saamna karkay gham khaana padta hai ⁷taaki aap ka eemaan aslee saabit ho jaaay. kyoonki jis tarah aag sonay ko aazma kar khaalis bana detee hai usee tarah aap ka eemaan bhee aazmaaya ja raha hai, haalaanki yah faanee sonay say kaheen ziyaada qeemtee hai. kyoonki allaah chaahata hai ki aap ko us din taareef, jalaal aur izzat mil jaaay jab eesa maseeh zaahir hoga. ⁸usee ko aap piyaar kartay hain agarchi aap nay usay dekha naheen, aur usee par aap eemaan rakhtay hain go vah aap ko is vaqt nazar naheen aata. haan, aap dil men naaqaabil-ay-bayaan aur jalaalee khushee manaaengay, ⁹jab aap vah kuchh paaengay jo eemaan kee manzil-ay-maqsood hai yaanee apnee jaanon kee najaat.

¹⁰nabee isee najaat kee talaash aur tafteesh men lagay rahay, aur unhon nay us fazl kee peshgoee kee jo allaah aap ko denay vaala tha. ¹¹unhon nay maaloom karnay kee koshish kee ki maseeh ka rooh jo un men tha kis vaqt ya kin haalaat kay baaray men baat kar raha tha jab us nay maseeh kay dukh aur baad kay jalaal kee peshgoee kee. ¹²un par itna zaahir kiya gaya ki un kee yah peshgoiyaan un kay apnay liyay naheen theen, balki aap kay liyay. aur ab yah sab kuchh aap ko un hee kay vaseelay say pesh kiya gaya hai jinhon nay aasmaan say bhejay gaay rooh-ul-quds kay zareeay aap ko allaah kee khushkhabaree sunaaee hai. yah aisee baaten hain jin par farishtay bhee nazar daalnay kay aarzoomand hain.

muqaddas zindagee guzaarnaa

¹³chunaanchay zahenee taur par kamarbasta ho jaaen. hoshmandee say apnee pooree ummeed us fazl par rakhen jo aap ko eesa maseeh kay zuhoor par bakhsha jaaega. ¹⁴aap allaah kay taabefaramaan farzand hain, is liyay un buree khwaahishaat ko apnee zindagee men jagah na den jo aap jaahil hotay vaqt rakhtay thay. varna vah aap kee zindagee ko apnay saanchay men dhaal lengee. ¹⁵is kay bajaay allaah kee maanind banen jis nay aap ko bulaaya hai. jis tarah vah quddoos hai usee tarah aap bhee har vaqt muqaddas zindagee guzaaren. ¹⁶kyoonki kalaam-ay-muqaddas men likha hai, “apnay aap ko makhsoos-o-muqaddas rakho kyoonki main muqaddas hoon.”

¹⁷aur yaad rakhen ki aasmaanee baap jis say aap dua kartay hain jaanibdaaree naheen karta balki aap kay amal kay mutaabiq aap ka faisla karega. chunaanchay jab tak aap is duniya kay mehamaan rahengay khuda kay khauf men zindagee guzaaren. ¹⁸kyoonki aap khud jaantay hain ki aap ko baapdaada kee bemaanee zindagee say chhudaanay kay liyay kya fidya diya gaya. yah sonay ya chaandee jaisee faanee cheez naheen thee ¹⁹balki maseeh ka qeemtee khoon tha. usee ko benuqs aur bedaagh lelay kee haisiyat say hamaaray liyay qurbaan kiya gaya. ²⁰usay duniya kee takhleeq say peshtar chuna gaya, lekin in aakhiree dinon men aap kee khaatir zaahir kiya gaya. ²¹aur us kay vaseelay say aap allaah par eemaan rakhtay hain jis nay usay murdon men say zinda karkay izzat-o-jalaal diya taaki aap ka eemaan aur ummeed allaah par ho.

²²sachchaaee kay taabay ho jaanay say aap ko makhsoos-o-muqaddas kar diya gaya aur aap kay dilon men bhaaiyon kay liyay beriya muhabbat daalee gaee hai. chunaanchay ab ek doosray ko khuloosdilee aur lagan say piyaar kartay rahen. ²³kyoonki aap kee naay siray say paidaaish huee hai. aur yah kisee faanee beej ka phal naheen hai balki allaah kay laafaanee, zinda aur qaaim rahenay vaalay kalaam ka phal hai. ²⁴yoon kalaam-ay-muqaddas farmaata hai,

“tamaam insaan ghaas hee hain,

un kee tamaam shaan-o-shaukat janglee phool kee maanind hai.

ghaas to murjha jaatee aur phool gir jaata hai,

²⁵lekin rabb ka kalaam abad tak qaaim raheta hai.”

mazkoora kalaam allaah kee khushkhabaree hai jo aap ko sunaaee gaee hai.