1 Yoohanna 5

duniya par hamaaree fatah

¹jo bhee eemaan rakhta hai ki eesa hee maseeh hai vah allaah say paida ho kar us ka farzand ban gaya hai. aur jo baap say muhabbat rakhta hai vah us kay farzand say bhee muhabbat rakhta hai. ²ham kis tarah pahechaan letay hain ki ham allaah kay farzand say muhabbat rakhtay hain? is say ki ham allaah say muhabbat rakhtay aur us kay ahkaam par amal kartay hain. ³kyoonki allaah say muhabbat say muraad yah hai ki ham us kay ahkaam par amal karen. aur us kay ahkaam hamaaray liyay bojh ka baais naheen hain, ⁴kyoonki jo bhee allaah say paida ho kar us ka farzand ban gaya hai vah duniya par ghaalib a jaata hai. aur ham yah fatah apnay eemaan kay zareeay paatay hain. ⁵kaun duniya par ghaalib a sakta hai? sirf vah jo eemaan rakhta hai ki eesa allaah ka farzand hai.

eesa maseeh kay baaray men gavaahee

⁶eesa maseeh vah hai jo apnay baptismay kay paanee aur apnee maut kay khoon kay zareeay zaahir hua, na sirf paanee kay zareeay balki paanee aur khoon donon hee kay zareeay. aur rooh-ul-quds jo sachchaaee hai is kee gavaahee deta hai. ⁷kyoonki is kay teen gavaah hain, ⁸rooh-ul-quds, paanee aur khoon. aur teenon ek hee baat kee tasdeeq kartay hain. ⁹ham to insaan kee gavaahee qabool kartay hain, lekin allaah kee gavaahee is say kaheen afzal hai. aur allaah kee gavaahee yah hai ki us nay apnay farzand kee tasdeeq kee hai. ¹⁰jo allaah kay farzand par eemaan rakhta hai us kay dil men yah gavaahee hai. aur jo allaah par eemaan naheen rakhta us nay usay jhoota qaraar diya hai. kyoonki us nay vah gavaahee na maanee jo allaah nay apnay farzand kay baaray men dee. ¹¹aur gavaahee yah hai, allaah nay hamen abdee zindagee ata kee hai, aur yah zindagee us kay farzand men hai. ¹²jis kay paas farzand hai us kay paas zindagee hai, aur jis kay paas farzand naheen hai us kay paas zindagee bhee naheen hai.

abdee zindagee

¹³main aap ko jo allaah kay farzand kay naam par eemaan rakhtay hain is liyay likh raha hoon ki aap jaan len ki aap ko abdee zindagee haasil hai. ¹⁴hamaara allaah par yah etimaad hai ki jab bhee ham us kee marzee kay mutaabiq kuchh maangtay hain to vah hamaaree sunta hai. ¹⁵aur choonki ham jaantay hain ki jab maangtay hain to vah hamaaree sunta hai is liyay ham yah ilm bhee rakhtay hain ki hamen vah kuchh haasil bhee hai jo ham nay us say maanga tha.

¹⁶agar koee apnay bhaaee ko aisa gunaah kartay dekhay jis ka anjaam maut na ho to vah dua karay, aur allaah usay zindagee ata karega. main un gunaahon kee baat kar raha hoon jin ka anjaam maut naheen. lekin ek aisa gunaah bhee hai jis ka anjaam maut hai. main naheen kah raha ki aisay shakhs kay liyay dua kee jaaay jis say aisa gunaah sarzad hua ho. ¹⁷har naaraast harkat gunaah hai, lekin har gunaah ka anjaam maut naheen hota.

¹⁸ham jaantay hain ki jo allaah say paida ho kar us ka farzand ban gaya hai vah gunaah karta naheen raheta, kyoonki allaah ka farzand aisay shakhs ko mahfooz rakhta hai aur iblees usay nuqsaan naheen pahuncha sakta.

¹⁹ham jaantay hain ki ham allaah kay farzand hain aur ki tamaam duniya iblees kay qabzay men hai.

²⁰ham jaantay hain ki allaah ka farzand a gaya hai aur hamen samajh ata kee hai taaki ham usay jaan len jo haqeeqee hai. aur ham us men hain jo haqeeqee hai yaanee us kay farzand eesa maseeh men. vahee haqeeqee khuda aur abdee zindagee hai.

²¹piyaaray bachcho, apnay aap ko buton say mahfooz rakhen