1 Yoohanna 4

haqeeqee aur jhootee rooh

¹azeezo, har ek rooh ka yaqeen mat karna balki roohon ko parakh kar maaloom karen ki vah allaah say hain ya naheen, kyoonki mut’addid jhootay nabee duniya men niklay hain. ²is say aap allaah kay rooh ko pahechaan letay hain : jo bhee rooh is ka etiraaf kartee hai ki eesa maseeh mujassam ho kar aaya hai vah allaah say hai. ³lekin jo bhee rooh eesa kay baaray men yah tasleem na karay vah allaah say naheen hai. yah mukhaalif-ay-maseeh kee rooh hai jis kay baaray men aap ko khabar milee ki vah aanay vaala hai balki is vaqt duniya men a chuka hai.

⁴lekin aap piyaaray bachcho, allaah say hain aur un par ghaalib a gaay hain. kyoonki jo aap men hai vah us say bada hai jo duniya men hai. ⁵yah log duniya say hain aur is liyay duniya kee baaten kartay hain aur duniya un kee suntee hai. ⁶ham to allaah say hain aur jo allaah ko jaanta hai vah hamaaree sunta hai. lekin jo allaah say naheen hai vah hamaaree naheen sunta. yoon ham sachchaaee kee rooh aur fareb denay vaalee rooh men imtiyaaz kar saktay hain.

allaah muhabbat hai

⁷azeezo, aaen ham ek doosray say muhabbat rakhen. kyoonki muhabbat allaah kee taraf say hai, aur jo muhabbat rakhta hai vah allaah say paida ho kar us ka farzand ban gaya hai aur allaah ko jaanta hai. ⁸jo muhabbat naheen rakhta vah allaah ko naheen jaanta, kyoonki allaah muhabbat hai. ⁹is men allaah kee muhabbat hamaaray darmiyaan zaahir huee ki us nay apnay iklautay farzand ko duniya men bhej diya taaki ham us kay zareeay jien. ¹⁰yahee muhabbat hai, yah naheen ki ham nay allaah say muhabbat kee balki yah ki us nay ham say muhabbat karkay apnay farzand ko bhej diya taaki vah hamaaray gunaahon ko mitaanay kay liyay kaffaara day.

¹¹azeezo, choonki allaah nay hamen itna piyaar kiya is liyay laazim hai ki ham bhee ek doosray ko piyaar karen. ¹²kisee nay bhee allaah ko naheen dekha. lekin jab ham ek doosray ko piyaar kartay hain to allaah hamaaray andar basta hai aur us kee muhabbat hamaaray andar takmeel paatee hai.

¹³ham kis tarah pahechaan letay hain ki ham us men rahetay hen aur vah ham men? is tarah ki us nay hamen apna rooh bakhsh diya hai. ¹⁴aur ham nay yah baat dekh lee aur is kee gavaahee detay hain ki khuda baap nay apnay farzand ko duniya ka najaatadihanda bannay kay liyay bhej diya hai. ¹⁵agar koee iqraar karay ki eesa allaah ka farzand hai to allaah us men raheta hai aur vah allaah men. ¹⁶aur khud ham nay vah muhabbat jaan lee hai aur us par eemaan laaay hain jo allaah ham say rakhta hai. allaah muhabbat hee hai. jo bhee muhabbat men qaaim raheta hai vah allaah men raheta hai aur allaah us men. ¹⁷isee tarah muhabbat hamaaray darmiyaan takmeel tak pahunchtee hai, aur yoon ham adaalat kay din pooray etimaad kay saath khaday ho sakengay, kyoonki jaisay vah hai vaisay hee ham bhee is duniya men hain. ¹⁸muhabbat men khauf naheen hota balki kaamil muhabbat khauf ko bhaga detee hai, kyoonki khauf kay peechhay saza ka dar hai. jo darta hai us kee muhabbat takmeel tak naheen pahunchee.

¹⁹ham is liyay muhabbat rakhtay hain ki allaah nay pahelay ham say muhabbat rakhee. ²⁰agar koee kahay, “main allaah say muhabbat rakhta hoon” lekin apnay bhaaee say nafrat karay to vah jhoota hai. kyoonki jo apnay bhaaee say jisay us nay dekha hai muhabbat naheen rakhta vah kis tarah allaah say muhabbat rakh sakta hai jisay us nay naheen dekha? ²¹jo hukm maseeh nay hamen diya hai vah yah hai, jo allaah say muhabbat rakhta hai vah apnay bhaaee say bhee muhabbat rakhay.