1 Yoohanna 3

allaah kay farzand

¹dhyaan den ki baap nay ham say kitnee muhabbat kee hai, yahaan tak ki ham allaah kay farzand kahelaatay hain. aur ham vaaqaee hain bhee. is liyay duniya hamen naheen jaantee. vah to usay bhee naheen jaantee. ²azeezo, ab ham allaah kay farzand hain, aur jo kuchh ham hongay vah abhee tak zaahir naheen hua hai. lekin itna ham jaantay hain ki jab vah zaahir ho jaaega to ham us kee maanind hongay. kyoonki ham us ka mushaahada vaisay hee karengay jaisa vah hai. ³jo bhee maseeh men yah ummeed rakhta hai vah apnay aap ko paak-saaf rakhta hai, vaisay hee jaisa maseeh khud hai.

⁴jo gunaah karta hai vah shareeat kee khilaafvarzee karta hai. haan, gunaah shareeat kee khilaafvarzee hee hai. ⁵lekin aap jaantay hain ki eesa hamaaray gunaahon ko utha lay jaanay kay liyay zaahir hua. aur us men gunaah naheen hai. ⁶jo us men qaaim raheta hai vah gunaah naheen karta. aur jo gunaah karta raheta hai na to us nay usay dekha hai, na usay jaana hai.

⁷piyaaray bachcho, kisee ko ijaazat na den ki vah aap ko saheeh raah say hata day. jo raast kaam karta hai vah raastbaaz, haan maseeh jaisa raastbaaz hai. ⁸jo gunaah karta hai vah iblees say hai, kyoonki iblees shuroo hee say gunaah karta aaya hai. allaah ka farzand isee liyay zaahir hua ki iblees ka kaam tabaah karay.

⁹jo bhee allaah say paida ho kar us ka farzand ban gaya hai vah gunaah naheen karega, kyoonki allaah kee fitrat us men rahetee hai. vah gunaah kar hee naheen sakta kyoonki vah allaah say paida ho kar us ka farzand ban gaya hai. ¹⁰is say pata chalta hai ki allaah kay farzand kaun hain aur iblees kay farzand kaun : jo raast kaam naheen karta, na apnay bhaaee say muhabbat rakhta hai, vah allaah ka farzand naheen hai.

ek doosray say muhabbat rakhnaa

¹¹kyoonki yahee vah paighaam hai jo aap nay shuroo say sun rakha hai, ki hamen ek doosray say muhabbat rakhna hai. ¹²qaabeel kee tarah na hon, jo iblees ka tha aur jis nay apnay bhaaee ko qatl kiya. aur us nay us ko qatl kyoon kiya? is liyay ki us ka kaam bura tha jabki bhaaee ka kaam raast tha.

¹³chunaanchay bhaaiyo, jab duniya aap say nafrat kartee hai to hairaan na ho jaaen. ¹⁴ham to jaantay hain ki ham maut say nikal kar zindagee men daakhil ho gaay hain. ham yah is liyay jaantay hain ki ham apnay bhaaiyon say muhabbat rakhtay hain. jo muhabbat naheen rakhta vah ab tak maut kee haalat men hai. ¹⁵jo bhee apnay bhaaee say nafrat rakhta hai vah qaatil hai. aur aap jaantay hain ki jo qaatil hai us men abdee zindagee naheen rahetee. ¹⁶is say hee ham nay muhabbat ko jaana hai ki maseeh nay hamaaree khaatir apnee jaan day dee. aur hamaara bhee farz yahee hai ki apnay bhaaiyon kee khaatir apnee jaan den. ¹⁷agar kisee kay maalee haalaat theek hon aur vah apnay bhaaee kee zarooratmand haalat ko dekh kar rahem na karay to us men allaah kee muhabbat kis tarah qaaim rah saktee hai? ¹⁸piyaaray bachcho, aaen ham alfaaz aur baaton say muhabbat ka izhaar na karen balki hamaaree muhabbat amlee aur haqeeqee ho.

allaah kay huzoor poora etimaad

¹⁹gharaz is say ham pahechaan letay hain ki ham sachchaaee kee taraf say hain, aur yoon hee ham apnay dil ko tasallee day saktay hain ²⁰jab vah hamen mujrim thaheraata hai. kyoonki allaah hamaaray dil say bada hai aur sab kuchh jaanta hai. ²¹aur azeezo, jab hamaara dil hamen mujrim naheen thaheraata to ham pooray etimaad kay saath allaah kay huzoor a saktay hain ²²aur vah kuchh paatay hain jo us say maangtay hain. kyoonki ham us kay ahkaam par chaltay hain aur vahee kuchh kartay hain jo usay pasand hai. ²³aur us ka yah hukm hai ki ham us kay farzand eesa maseeh kay naam par eemaan la kar ek doosray say muhabbat rakhen, jis tarah maseeh nay hamen hukm diya tha. ²⁴jo allaah kay ahkaam kay taabay raheta hai vah allaah men basta hai aur allaah us men. ham kis tarah pahechaan letay hain ki vah ham men basta hai? us rooh kay vaseelay say jo us nay hamen diya hai.