1 Yoohanna 2
maseeh hamaaree shafaaat karta hai
1meray bachcho, main aap ko yah is liyay likh raha hoon ki aap gunaah na karen. lekin agar koee gunaah karay to ek hai jo khuda baap kay saamnay hamaaree shafaaat karta hai, eesa maseeh jo raast hai. 2vahee hamaaray gunaahon ka kaffaara denay vaalee qurbaanee hai, aur na sirf hamaaray gunaahon ka balki pooree duniya kay gunaahon ka bhee.
3is say hamen pata chalta hai ki ham nay usay jaan liya hai, jab ham us kay ahkaam par amal kartay hain. 4jo kaheta hai, “main usay jaanta hoon” lekin us kay ahkaam par amal naheen karta vah jhoota hai aur sachchaaee us men naheen hai. 5lekin jo us kay kalaam kee pairvee karta hai us men allaah kee muhabbat haqeeqatan takmeel tak pahunch gaee hai. is say hamen pata chalta hai ki ham us men hain. 6jo kaheta hai ki vah us men qaaim hai us kay liyay laazim hai ki vah yoon chalay jis tarah eesa chalta tha.
ek naya hukm
7azeezo, main aap ko koee naya hukm naheen likh raha, balki vahee puraana hukm jo aap ko shuroo say mila hai. yah puraana hukm vahee paighaam hai jo aap nay sun liya hai. 8lekin doosree taraf say yah hukm naya bhee hai, aur is kee sachchaaee maseeh aur aap men zaahir huee hai. kyoonki taareekee khatm honay vaalee hai aur haqeeqee raushnee chamaknay lag gaee hai.
9jo noor men honay ka daava karkay apnay bhaaee say nafrat karta hai vah ab tak taareekee men hai. 10jo apnay bhaaee say muhabbat rakhta hai vah noor men raheta hai aur us men koee bhee cheez naheen paaee jaatee jo thokar ka baais ban sakay. 11lekin jo apnay bhaaee say nafrat karta hai vah taareekee hee men hai aur andheray men chalta phirta hai. us ko yah naheen maaloom ki vah kahaan ja raha hai, kyoonki taareekee nay usay andha kar rakha hai.
12piyaaray bachcho, main aap ko is liyay likh raha hoon ki aap kay gunaahon ko us kay naam kee khaatir muaaf kar diya gaya hai. 13vaalido, main aap ko is liyay likh raha hoon ki aap nay usay jaan liya hai jo ibtida hee say hai. javaan mardo, main aap ko is liyay likh raha hoon ki aap iblees par ghaalib a gaay hain. bachcho, main aap ko is liyay likh raha hoon ki aap nay baap ko jaan liya hai. 14vaalido, main aap ko is liyay likh raha hoon ki aap nay usay jaan liya hai jo ibtida hee say hai. javaan mardo, main aap ko is liyay likh raha hoon ki aap mazboot hain. allaah ka kalaam aap men basta hai aur aap iblees par ghaalib a gaay hain.
15duniya ko piyaar mat karna, na kisee cheez ko jo duniya men hai. agar koee duniya ko piyaar karay to khuda baap kee muhabbat us men naheen hai. 16kyoonki jo bhee cheez duniya men hai vah baap kee taraf say naheen balki duniya kee taraf say hai, khwaah vah jism kee buree khwaahishaat, aankhon ka laalach ya apnee milkiyat par fakhar ho. 17duniya aur us kee vah cheezen jo insaan chaahata hai khatm ho rahee hain, lekin jo allaah kee marzee pooree karta hai vah abad tak jeeta rahega.
maseeh ka dushman
18bachcho, ab aakhiree ghadee a pahunchee hai. aap nay khud sun liya hai ki mukhaalif-ay-maseeh a raha hai, aur haqeeqatan bahut say aisay mukhaalif-ay-maseeh a chukay hain. is say hamen pata chalta hai ki aakhiree ghadee a gaee hai. 19yah log ham men say niklay to hain, lekin haqeeqat men ham men say naheen thay. kyoonki agar vah ham men say hotay to vah hamaaray saath hee rahetay. lekin hamen chhodnay say zaahir hua ki sab ham men say naheen hain.
20lekin aap farq hain. aap ko us say jo quddoos hai rooh ka masah mil gaya hai, aur aap pooree sachchaaee ko jaantay hain. 21main aap ko is liyay naheen likh raha ki aap sachchaaee ko naheen jaantay balki is liyay ki aap sachchaaee jaantay hain aur ki koee bhee jhoot sachchaaee kee taraf say naheen a sakta.
22kaun jhoota hai? vah jo eesa kay maseeh honay ka inkaar karta hai. mukhaalif-ay-maseeh aisa shakhs hai. vah baap aur farzand ka inkaar karta hai. 23jo farzand ka inkaar karta hai us kay paas baap bhee naheen hai, aur jo farzand ka iqraar karta hai us kay paas baap bhee hai.
24chunaanchay laazim hai ki jo kuchh aap nay ibtida say suna vah aap men rahay. agar vah aap men rahay to aap bhee farzand aur baap men rahengay. 25aur jo vaada us nay ham say kiya hai vah hai abdee zindagee.
26main aap ko yah un kay baaray men likh raha hoon jo aap ko saheeh raah say hataanay kee koshish kar rahay hain. 27lekin aap ko us say rooh ka masah mil gaya hai. vah aap kay andar basta hai, is liyay aap ko is kee zaroorat hee naheen ki koee aap ko taaleem day. kyoonki maseeh ka rooh aap ko sab baaton kay baaray men taaleem deta hai aur jo kuchh bhee vah sikhaata hai vah sachch hai, jhoot naheen. chunaanchay jis tarah us nay aap ko taaleem dee hai, usee tarah maseeh men rahen.
28aur ab piyaaray bachcho, us men qaaim rahen taaki us kay zaahir honay par ham pooray etimaad kay saath us kay saamnay khaday ho saken aur us kee aamad par sharminda na hona paday. 29agar aap jaantay hain ki maseeh raastbaaz hai to aap yah bhee jaantay hain ki jo bhee raast kaam karta hai vah allaah say paida ho kar us ka farzand ban gaya hai.