1 Yoohanna 1

zindagee ka kalaam

¹ham aap ko us kee munaadee kartay hain jo ibtida say tha, jisay ham nay apnay kaanon say suna, apnee aankhon say dekha, jis ka mushaahada ham nay kiya aur jisay ham nay apnay haathon say chhua. vahee zindagee ka kalaam hai. ²vah jo khud zindagee tha zaahir hua, ham nay usay dekha. aur ab ham gavaahee day kar aap ko us abdee zindagee kee munaadee kartay hain jo khuda baap kay paas thee aur ham par zaahir huee hai. ³ham aap ko vah kuchh sunaatay hain jo ham nay khud dekh aur sun liya hai taaki aap bhee hamaaree rifaaqat men shareek ho jaaen. aur hamaaree rifaaqat khuda baap aur us kay farzand eesa maseeh kay saath hai. ⁴ham yah is liyay likh rahay hain taaki hamaaree khushee pooree ho jaaay.

allaah noor hai

⁵jo paighaam ham nay us say suna aur aap ko suna rahay hain vah yah hai, allaah noor hai aur us men taareekee hai hee naheen. ⁶jab ham taareekee men chaltay huay allaah kay saath rifaaqat rakhnay ka daava kartay hain to ham jhoot bol rahay aur sachchaaee kay mutaabiq zindagee naheen guzaar rahay. ⁷lekin jab ham noor men chaltay hain, bilkul usee tarah jis tarah allaah noor men hai, to phir ham ek doosray kay saath rifaaqat rakhtay hain aur us kay farzand eesa ka khoon hamen tamaam gunaahon say paak-saaf kar deta hai.

⁸agar ham gunaah say paak honay ka daava karen to ham apnay aap ko fareb detay hain aur ham men sachchaaee naheen hai.

⁹lekin agar ham apnay gunaahon ka iqraar karen to vah vafaadaar aur raast saabit hoga. vah hamaaray gunaahon ko muaaf karkay hamen tamaam naaraastee say paak-saaf karega. ¹⁰agar ham daava karen ki ham nay gunaah naheen kiya to ham usay jhoota qaraar detay hain aur us ka kalaam hamaaray andar naheen hai.