1 Kurinthiyon 9

rasool ka haq

¹kya main aazaad naheen? kya main maseeh ka rasool naheen? kya main nay eesa ko naheen dekha jo hamaara khudaavand hai? kya aap khudaavand men meree mehanat ka phal naheen hain? ²agarchi main doosron kay nazdeek maseeh ka rasool naheen, lekin aap kay nazdeek to zaroor hoon. khudaavand men aap hee meree risaalat par muhar hain.

³jo meree baazapurs karna chaahatay hain unhen main apnay difa men kaheta hoon, ⁴kya hamen khaanay-peenay ka haq naheen? ⁵kya hamen haq naheen ki shaadee karkay apnee beevee ko saath liyay phiren? doosray rasool aur khudaavand kay bhaaee aur kaifa to aisa hee kartay hain. ⁶kya mujhay aur barnabaas hee ko apnee khidmat kay ajr men kuchh paanay ka haq naheen? ⁷kaun sa faujee apnay kharch par jang ladta hai? kaun angoor ka baagh laga kar us kay phal say apna hissa naheen paata? ya kaun revad kee gallaabaanee karkay us kay doodh say apna hissa naheen paata?

⁸kya main yah faqat insaanee soch kay tahet kah raha hoon? kya shareeat bhee yahee naheen kahetee? ⁹tauret men likha hai, “jab too fasal gaahanay kay liyay us par bail chalnay deta hai to us ka munh baandh kar na rakhna.” kya allaah sirf bailon kee fikr karta hai ¹⁰ya vah hamaaree khaatir yah farmaata hai? haan, zaroor hamaaree khaatir kyoonki hal chalaanay vaala is ummeed par chalaata hai ki usay kuchh milega. isee tarah gaahanay vaala is ummeed par gaahata hai ki vah paidaavaar men say apna hissa paaega. ¹¹ham nay aap kay liyay ruhaanee beej boya hai. to kya yah naamunaasib hai agar ham aap say jismaanee fasal kaaten? ¹²agar doosron ko aap say apna hissa lenay ka haq hai to kya hamaara un say ziyaada haq naheen banta?

lekin ham nay is haq say faaida naheen uthaaya. ham sab kuchh bardaasht kartay hain taaki maseeh kee khushkhabaree kay liyay kisee bhee tarah say rukaavat ka baais na banen. ¹³kya aap naheen jaantay ki bait-ul-muqaddas men khidmat karnay vaalon kee zarooriyaat bait-ul-muqaddas hee say pooree kee jaatee hain? jo qurbaaniyaan chadhaanay kay kaam men masroof rahetay hain unhen qurbaaniyon say hee hissa milta hai. ¹⁴isee tarah khudaavand nay muqarrar kiya hai ki injeel kee khushkhabaree kee munaadee karnay vaalon kee zarooriyaat un say pooree kee jaaen jo is khidmat say faaida uthaatay hain.

¹⁵lekin main nay kisee tarah bhee is say faaida naheen uthaaya, aur na is liyay likha hai ki meray saath aisa sulook kiya jaaay. naheen, is say pahelay ki fakhar karnay ka mera yah haq mujh say chheen liya jaaay behatar yah hai ki main mar jaaoon. ¹⁶lekin allaah kee khushkhabaree kee munaadee karna meray liyay fakhar ka baais naheen. main to yah karnay par majboor hoon. mujh par afsos agar is khushkhabaree kee munaadee na karoon. ¹⁷agar main yah apnee marzee say karta to phir ajr ka mera haq banta. lekin aisa naheen hai balki khuda hee nay mujhay yah zimmaadaaree dee hai. ¹⁸to phir mera ajr kya hai? yah ki main injeel kee khushkhabaree muft sunaaoon aur apnay us haq say faaida na uthaaoon jo mujhay us kee munaadee karnay say haasil hai.

¹⁹agarchi main sab logon say aazaad hoon phir bhee main nay apnay aap ko sab ka ghulaam bana liya taaki ziyaada say ziyaada logon ko jeet loon. ²⁰men yahoodiyon kay darmiyaan yahoodee kee maanind bana taaki yahoodiyon ko jeet loon. moosvee shareeat kay tahet zindagee guzaarnay vaalon kay darmiyaan main un kee maanind bana taaki unhen jeet loon, go main shareeat kay ma-tahet naheen. ²¹moosvee shareeat kay baghair zindagee guzaarnay vaalon kay darmiyaan main un hee kee maanind bana taaki unhen jeet loon. is ka matlab yah naheen ki main allaah kee shareeat kay taabay naheen hoon. haqeeqat men main maseeh kee shareeat kay tahet zindagee guzaarta hoon. ²²main kamzoron kay liyay kamzor bana taaki unhen jeet loon. sab kay liyay main sab kuchh bana taaki har mumkin tareeqay say baaz ko bacha sakoon. ²³jo kuchh bhee karta hoon allaah kee khushkhabaree kay vaastay karta hoon taaki is kee barkaat men shareek ho jaaoon.

²⁴kya aap naheen jaantay ki stediyam men daudtay to sab hee hain, lekin in’aam ek hee shakhs haasil karta hai? chunaanchay aisay dauden ki aap hee jeeten. ²⁵khelon men shareek honay vaala har shakhs apnay aap ko sakht nazm-o-zabt ka paaband rakhta hai. vah faanee taaj paanay kay liyay aisa kartay hain, lekin ham ghairfaanee taaj paanay kay liyay. ²⁶chunaanchay main har vaqt manzil-ay-maqsood ko pesh-ay-nazar rakhtay huay daudta hoon. aur main isee tarah baaksing bhee karta hoon, main hava men mukkay naheen maarta balki nishaanay ko. ²⁷main apnay badan ko maarta kootta aur isay apna ghulaam banaata hoon, aisa na ho ki doosron men munaadee karkay khud naamaqbool thaheroon.