1 Kurinthiyon 8
buton kee qurbaaniyaan
1ab main buton kee qurbaanee kay baaray men baat karta hoon. ham jaantay hain ki ham sab saahib-ay-ilm hain. ilm insaan kay phoolnay ka baais banta hai jabki muhabbat us kee taameer kartee hai. 2jo samajhta hai ki us nay kuchh jaan liya hai us nay ab tak us tarah naheen jaana jis tarah us ko jaanna chaahiay. 3lekin jo allaah say muhabbat rakhta hai usay allaah nay jaan liya hai.
4buton kee qurbaanee khaanay kay zimn men ham jaantay hain ki duniya men but koee cheez naheen aur ki rabb kay siva koee aur khuda naheen hai. 5beshak aasmaan-o-zameen par kaee naam-nihaad devta hotay hain, haan dar’asal bahuteray devtaaon aur khudaavandon kee pooja kee jaatee hai. 6to bhee ham jaantay hain ki faqat ek hee khuda hai, hamaara baap jis nay sab kuchh paida kiya hai aur jis kay liyay ham zindagee guzaartay hain. aur ek hee khudaavand hai yaanee eesa maseeh jis kay vaseelay say sab kuchh vujood men aaya hai aur jis say hamen zindagee haasil hai.
7lekin har kisee ko is ka ilm naheen. baaz eemaandaar to ab tak yah sochnay kay aadee hain ki but ka vujood hai. is liyay jab vah kisee but kee qurbaanee ka gosht khaatay hain to vah samajhtay hain ki ham aisa karnay say us but kee pooja kar rahay hain. yoon un ka zameer kamzor honay kee vajah say aalooda ho jaata hai. 8haqeeqat to yah hai ki hamaara allaah ko pasand aana is baat par mabnee naheen ki ham kya khaatay hain aur kya naheen khaatay. na parhez karnay say hamen koee nuqsaan pahunchta hai aur na kha lenay say koee faaida.
9lekin khabardaar rahen ki aap kee yah aazaadee kamzoron kay liyay thokar ka baais na banay. 10kyoonki agar koee kamazorazameer shakhs aap ko butkhaanay men khaana khaatay huay dekhay to kya usay us kay zameer kay khilaaf buton kee qurbaaniyaan khaanay par ubhaara naheen jaaega? 11is tarah aap ka kamzor bhaaee jis kee khaatir maseeh qurbaan hua aap kay ilm-o-irfaan kee vajah say halaak ho jaaega. 12jab aap is tarah apnay bhaaiyon ka gunaah kartay aur un kay kamzor zameer ko majrooh kartay hain to aap maseeh ka hee gunaah kartay hain. 13is liyay agar aisa khaana meray bhaaee ko saheeh raah say bhatkaanay ka baais banay to main kabhee gosht naheen khaaoonga taaki apnay bhaaee kee gumraahee ka baais na banoon.