1 Kurinthiyon 7
izdivaajee zindagee
1ab main aap kay savaalaat ka javaab deta hoon. beshak achchha hai ki mard shaadee na karay. 2lekin zinaakaaree say bachnay kee khaatir har mard kee apnee beevee aur har aurat ka apna shauhar ho. 3shauhar apnee beevee ka haq ada karay aur isee tarah beevee apnay shauhar ka. 4beevee apnay jism par ikhtiyaar naheen rakhtee balki us ka shauhar. isee tarah shauhar bhee apnay jism par ikhtiyaar naheen rakhta balki us kee beevee. 5chunaanchay ek doosray say juda na hon siva-ay-is kay ki aap donon baahamee razaamandee say ek vaqt muqarrar kar len taaki dua kay liyay ziyaada fursat mil sakay. lekin is kay baad aap dubaara ikatthay ho jaaen taaki iblees aap kay bezabt nafs say faaida utha kar aap ko aazmaaish men na daalay.
6yah main hukm kay taur par naheen balki aap kay haalaat kay pesh-ay-nazar riaayatan kah raha hoon. 7main chaahata hoon ki tamaam log mujh jaisay hee hon. lekin har ek ko allaah kee taraf say alag nemat milee hai, ek ko yah nemat, doosray ko vah.
talaaq aur ghaireemaandaar say shaadee
8main ghairshaadeeshuda afraad aur bevaaon say yah kaheta hoon ki achchha ho agar aap meree tarah ghairshaadeeshuda rahen. 9lekin agar aap apnay aap par qaaboo na rakh saken to shaadee kar len. kyoonki is say peshtar ki aap kay shahevaanee jazbaat belagaam honay lagen behatar yah hai ki aap shaadee kar len.
10shaadeeshuda jodon ko main naheen balki khudaavand hukm deta hai ki beevee apnay shauhar say taalluq munqatay na karay. 11agar vah aisa kar chukee ho to doosree shaadee na karay ya apnay shauhar say sulah kar lay. isee tarah shauhar bhee apnee beevee ko talaaq na day.
12deegar logon ko khudaavand naheen balki main naseehat karta hoon ki agar kisee eemaandaar bhaaee kee beevee eemaan naheen laaee, lekin vah shauhar kay saath rahenay par raazee ho to phir vah apnee beevee ko talaaq na day. 13isee tarah agar kisee eemaandaar khaatoon ka shauhar eemaan naheen laaya, lekin vah beevee kay saath rahenay par razaamand ho to vah apnay shauhar ko talaaq na day. 14kyoonki jo shauhar eemaan naheen laaya usay us kee eemaandaar beevee kee maarifat muqaddas thaheraaya gaya hai aur jo beevee eemaan naheen laaee usay us kay eemaandaar shauhar kee maarifat muqaddas qaraar diya gaya hai. agar aisa na hota to aap kay bachchay naapaak hotay, magar ab vah muqaddas hain. 15lekin agar ghaireemaandaar shauhar ya beevee apna taalluq munqatay kar lay to usay jaanay den. aisee soorat men eemaandaar bhaaee ya bahen is bandhan say aazaad ho gaay. magar allaah nay aap ko sulah-salaamatee kee zindagee guzaarnay kay liyay bulaaya hai. 16bahen, mumkin hai aap apnay khaavand kee najaat ka baais ban jaaen. ya bhaaee, mumkin hai aap apnee beevee kee najaat ka baais ban jaaen.
allaah kee taraf say muqarrara raah par rahen
17har shakhs usee raah par chalay jo khudaavand nay us kay liyay muqarrar kee aur us haalat men jis men allaah nay usay bulaaya hai. eemaandaaron kee tamaam jamaaaton kay liyay meree yahee hidaayat hai. 18agar kisee ko makhtoon haalat men bulaaya gaya to vah naamakhtoon honay kee koshish na karay. agar kisee ko naamakhtoonee kee haalat men bulaaya gaya to vah apna khatna na karvaaay. 19na khatna kuchh cheez hai aur na khatnay ka na hona, balki allaah kay ahkaam kay mutaabiq zindagee guzaarna hee sab kuchh hai. 20har shakhs usee haisiyat men rahay jis men usay bulaaya gaya tha. 21kya aap ghulaam thay jab khudaavand nay aap ko bulaaya? yah baat aap ko pareshaan na karay. alabatta agar aap ko aazaad honay ka mauqa milay to is say zaroor faaida uthaaen. 22kyoonki jo us vaqt ghulaam tha jab khudaavand nay usay bulaaya vah ab khudaavand ka aazaad kiya hua hai. isee tarah jo aazaad tha jab usay bulaaya gaya vah ab maseeh ka ghulaam hai. 23aap ko qeemat day kar khareeda gaya hai, is liyay insaan kay ghulaam na banen. 24bhaaiyo, har shakhs jis haalat men bulaaya gaya usee men vah allaah kay saamnay qaaim rahay.
ghairshaadeeshuda log
25kunvaariyon kay baaray men mujhay khudaavand kee taraf say koee khaas hukm naheen mila. to bhee main jisay allaah nay apnee rahemat say qaabil-ay-etimaad banaaya hai aap par apnee raay ka izhaar karta hoon.
26meree daanist men maujooda museebat kay pesh-ay-nazar insaan kay liyay achchha hai ki ghairshaadeeshuda rahay. 27agar aap kisee khaatoon kay saath shaadee kay bandhan men bandh chukay hain to phir is bandhan ko todnay kee koshish na karen. lekin agar aap shaadee kay bandhan men naheen bandhay to phir is kay liyay koshish na karen. 28taaham agar aap nay shaadee kar hee lee hai to aap nay gunaah naheen kiya. isee tarah agar kunvaaree shaadee kar chukee hai to yah gunaah naheen. magar aisay log jismaanee taur par museebat men pad jaaengay jabki main aap ko is say bachaana chaahata hoon.
29bhaaiyo, main to yah kaheta hoon ki vaqt thoda hai. aainda shaadeeshuda aisay zindagee basar karen jaisay ki ghairshaadeeshuda hain. 30ronay vaalay aisay hon jaisay naheen ro rahay. khushee manaanay vaalay aisay hon jaisay khushee naheen mana rahay. khareednay vaalay aisay hon jaisay un kay paas kuchh bhee naheen. 31duniya say faaida uthaanay vaalay aisay hon jaisay is ka koee faaida naheen. kyoonki is duniya kee maujooda shakl-o-soorat khatm hotee ja rahee hai.
32main to chaahata hoon ki aap fikron say aazaad rahen. ghairshaadeeshuda shakhs khudaavand kay muaamlon kee fikr men raheta hai ki kis tarah usay khush karay. 33is kay bar’aks shaadeeshuda shakhs duniyaavee fikr men raheta hai ki kis tarah apnee beevee ko khush karay. 34yoon vah badee kash-m-kash men mubtala raheta hai. isee tarah ghairshaadeeshuda khaatoon aur kunvaaree khudaavand kee fikr men rahetee hai ki vah jismaanee aur ruhaanee taur par us kay liyay makhsoos-o-muqaddas ho. is kay muqaablay men shaadeeshuda khaatoon duniyaavee fikr men rahetee hai ki apnay khaavand ko kis tarah khush karay.
35main yah aap hee kay faaiday kay liyay kaheta hoon. maqsad yah naheen ki aap par paabandiyaan lagaaee jaaen balki yah ki aap sharaafat, saabitqadmee aur yaksooee kay saath khudaavand kee huzooree men chalen.
36agar koee samajhta hai, ‘main apnee kunvaaree mangetar say shaadee na karnay say us ka haq maar raha hoon’ ya yah ki ‘meree us kay liyay khwaahish hadd say ziyaada hai, is liyay shaadee honee chaahiay’ to phir vah apnay iraaday ko poora karay, yah gunaah naheen. vah shaadee kar lay. 37lekin is kay bar’aks agar us nay shaadee na karnay ka pukhta azam kar liya hai aur vah majboor naheen balki apnay iraaday par ikhtiyaar rakhta hai aur us nay apnay dil men faisla kar liya hai ki apnee kunvaaree ladkee ko aisay hee rahenay day to us nay achchha kiya. 38gharaz jis nay apnee kunvaaree mangetar say shaadee kar lee hai us nay achchha kiya hai, lekin jis nay naheen kee us nay aur bhee achchha kiya hai.
39jab tak khaavand zinda hai beevee ko us say rishta todnay kee ijaazat naheen. khaavand kee vafaat kay baad vah aazaad hai ki jis say chaahay shaadee kar lay, magar sirf khudaavand men. 40lekin meree daanist men agar vah aisay hee rahay to ziyaada mubaarak hogee. aur main samajhta hoon ki mujh men bhee allaah ka rooh hai.