1 Kurinthiyon 6

muqaddamaabaazee

¹aap men yah jur’at kaisay paida huee ki jab kisee ka kisee doosray eemaandaar kay saath tanaazo ho to vah apna jhagda bedeenon kay saamnay lay jaata hai na ki muqaddason kay saamnay? ²kya aap naheen jaantay ki muqaddaseen duniya kee adaalat karengay? aur agar aap duniya kee adaalat karengay to kya aap is qaabil naheen ki chhotay motay jhagdon ka faisla kar saken? ³kya aap ko maaloom naheen ki ham farishton kee adaalat karengay? to phir kya ham rozmarra kay muaamalaat ko naheen nipta saktay? ⁴aur is qism kay muaamalaat ko faisal karnay kay liyay aap aisay logon ko kyoon muqarrar kartay hain jo jamaaat kee nigaah men koee haisiyat naheen rakhtay? ⁵yah baat main aap ko sharm dilaanay kay liyay kaheta hoon. kya aap men ek bhee sayaana shakhs naheen jo apnay bhaaiyon kay maabain faisla karnay kay qaabil ho? ⁶lekin naheen. bhaaee apnay hee bhaaee par muqaddma chalaata hai aur vah bhee ghaireemaandaaron kay saamnay.

⁷avval to aap say yah ghaltee huee ki aap ek doosray say muqaddamaabaazee kartay hain. agar koee aap say naainsaafee kar raha ho to kya behatar naheen ki aap usay aisa karnay den? aur agar koee aap ko thag raha ho to kya yah behatar naheen ki aap usay thignay den? ⁸is kay bar’aks aap ka yah haal hai ki aap khud hee naainsaafee kartay aur thagtay hain aur vah bhee apnay bhaaiyon ko. ⁹kya aap naheen jaantay ki naainsaaf allaah kee baadshaahee meeraas men naheen paaengay? fareb na khaaen! haraamakaar, butparast, zinaakaar, hamjinsparast, laundebaaz, ¹⁰chor, laalchee, sharaabee, badazbaan, luteray, yah sab allaah kee baadshaahee meeraas men naheen paaengay. ¹¹aap men say kuchh aisay thay bhee. lekin aap ko dhoya gaya, aap ko muqaddas kiya gaya, aap ko khudaavand eesa maseeh kay naam aur hamaaray khuda kay rooh say raastbaaz banaaya gaya hai.

jism allaah ka ghar hai

¹²meray liyay sab kuchh jaaiz hai, lekin sab kuchh mufeed naheen. meray liyay sab kuchh jaaiz to hai, lekin main kisee bhee cheez ko ijaazat naheen doonga ki mujh par hukoomat karay. ¹³beshak khuraak pet kay liyay aur pet khuraak kay liyay hai, magar allaah donon ko nest kar dega. lekin ham is say yah nateeja naheen nikaal saktay ki jism zinaakaaree kay liyay hai. hargiz naheen! jism khudaavand kay liyay hai aur khudaavand jism kay liyay. ¹⁴allaah nay apnee qudrat say khudaavand eesa ko zinda kiya aur isee tarah vah hamen bhee zinda karega.

¹⁵kya aap naheen jaantay ki aap kay jism maseeh kay aaza hain? to kya main maseeh kay aaza ko lay kar faahisha kay aaza banaaoon? hargiz naheen. ¹⁶kya aap ko maaloom naheen ki jo faahisha say lipat jaata hai vah us kay saath ek tan ho jaata hai? jaisay paak navishton men likha hai, “vah donon ek ho jaatay hain.” ¹⁷is kay bar’aks jo khudaavand say lipat jaata hai vah us kay saath ek rooh ho jaata hai.

¹⁸zinaakaaree say bhaagen! insaan say sarzad honay vaala har gunaah us kay jism say baahar hota hai siva-ay-zina kay. zinaakaar to apnay hee jism ka gunaah karta hai. ¹⁹kya aap naheen jaantay ki aap ka badan rooh-ul-quds ka ghar hai jo aap kay andar sukoonat karta hai aur jo aap ko allaah kee taraf say mila hai? aap apnay maalik naheen hain ²⁰kyoonki aap ko qeemat ada karkay khareeda gaya hai. ab apnay badan say allaah ko jalaal den.