1 Kurinthiyon 5
zinaakaaree
1yah baat hamaaray kaanon tak pahunchee hai ki aap kay darmiyaan zinaakaaree ho rahee hai, balki aisee zinaakaaree jisay ghairyahoodee bhee rava naheen samajhtay. kahetay hain ki aap men say kisee nay apnee sautelee maan [a] lafzee tarjuma : baap kee beevee, lekin ghaaliban is say muraad sautelee maan hai. say shaadee kar rakhee hai. 2kamaal hai ki aap is fel par naadim naheen balki phoolay phir rahay hain! kya munaasib na hota ki aap dukh mahsoos karkay is badee kay murtaqib ko apnay darmiyaan say khaarij kar detay? 3go main jism kay lihaaz say aap kay paas naheen, lekin rooh kay lihaaz say zaroor hoon. aur main us shakhs par fatwa is tarah day chuka hoon jaisay ki main aap kay darmiyaan maujood hoon. 4jab aap hamaaray khudaavand eesa kay naam men jama hongay to main rooh men aap kay saath hoonga aur hamaaray khudaavand eesa kee qudrat bhee. 5us vaqt aisay shakhs ko iblees kay havaalay karen taaki sirf us ka jism halaak ho jaaay, lekin us kee rooh khudaavand kay din rihaaee paaay.
6aap ka fakhar karna achchha naheen. kya aap ko maaloom naheen ki jab ham thoda sa khameer taaza gundhay huay aatay men milaatay hain to vah saaray aatay ko khameer kar deta hai? 7apnay aap ko khameer say paak-saaf karkay taaza gundha hua aata ban jaaen. daraheqeeqat aap hain bhee paak, kyoonki hamaara eed-ay-fasah ka lela maseeh hamaaray liyay zabah ho chuka hai. 8is liyay aaiay ham puraanay khameeree aatay yaanee buraaee aur badee ko door karkay taaza gundhay huay aatay yaanee khuloos aur sachchaaee kee rotiyaan bana kar fasah kee eed manaaen.
9main nay khat men likha tha ki aap zinaakaaron say taalluq na rakhen. 10mera matlab yah naheen tha ki aap is duniya kay zinaakaaron say taalluq munqatay kar len ya is duniya kay laalchiyon, luteron aur butparaston say. agar aap aisa kartay to laazim hota ki aap duniya hee say kooch kar jaatay. 11naheen, mera matlab yah tha ki aap aisay shakhs say taalluq na rakhen jo maseeh men to bhaaee kahelaata hai magar hai vah zinaakaar ya laalchee ya butparast ya gaalee-galoch karnay vaala ya sharaabee ya lutera. aisay shakhs kay saath khaana tak bhee na khaaen.
12main un logon kee adaalat kyoon karta phiroon jo eemaandaaron kee jamaaat say baahar hain? kya aap khud bhee sirf un kee adaalat naheen kartay jo jamaaat kay andar hain? 13baahar vaalon kee adaalat to khuda hee karega. kalaam-ay-muqaddas men yoon likha hai, ‘shareer ko apnay darmiyaan say nikaal do.’