1 Kurinthiyon 4

khudaavand kay khaadim aur un ka kaam

¹gharaz log hamen maseeh kay khaadim samjhen, aisay nigraan jinhen allaah kay bhedon ko kholnay kee zimmaadaaree dee gaee hai. ²ab nigraanon ka farz yah hai ki un par poora etimaad kiya ja sakay. ³mujhay is baat kee ziyaada fikr naheen ki aap ya koee duniyaavee adaalat mera ehatisaab karay, balki main khud bhee apna ehatisaab naheen karta. ⁴mujhay kisee ghaltee ka ilm naheen hai agarchi yah baat mujhay raastbaaz qaraar denay kay liyay kaafee naheen hai. khudaavand khud mera ehatisaab karta hai. ⁵is liyay vaqt say pahelay kisee baat ka faisla na karen. us vaqt tak intizaar karen jab tak khudaavand na aaay. kyoonki vahee taareekee men chhupee huee cheezon ko raushnee men laaega aur dilon kee mansoobaabandiyon ko zaahir kar dega. us vaqt allaah khud har fard kee munaasib taareef karega.

kurinthiyon kee shekheebaazee

⁶bhaaiyo, main nay in baaton ka itlaaq apnay aur apullos par kiya taaki aap ham par ghaur kartay huay allaah kay kalaam kee hudood jaan len jin say tajaavuz karna munaasib naheen. phir aap phool kar ek shakhs kee himaayat karkay doosray kee mukhaalafat naheen karengay. ⁷kyoonki kaun aap ko kisee doosray say afzal qaraar deta hai? jo kuchh aap kay paas hai kya vah aap ko muft naheen mila? aur agar muft mila to is par shekhee kyoon maartay hain goya ki aap nay usay apnee mehanat say haasil kiya ho?

⁸vaah jee vaah! aap ser ho chukay hain. aap ameer ban chukay hain. aap hamaaray baghair baadshaah ban chukay hain. kaash aap baadshaah ban chukay hotay taaki ham bhee aap kay saath hukoomat kartay! ⁹is kay bajaay mujhay lagta hai ki allaah nay hamaaray liyay jo us kay rasool hain romee tamaashaagaah men sab say nichla darja muqarrar kiya hai, jo un logon kay liyay makhsoos hota hai jinhen saza-ay-maut ka faisla sunaaya gaya ho. haan, ham duniya, farishton aur insaanon kay saamnay tamaasha ban gaay hain. ¹⁰ham to maseeh kee khaatir bevuqoof ban gaay hain jabki aap maseeh men samajhdaar khayaal kiay jaatay hain. ham kamzor hain jabki aap taaqatvar. aap kee izzat kee jaatee hai jabki hamaaree beizzatee. ¹¹ab tak hamen bhook aur piyaas sataatee hai. ham cheethdon men malboos goya nangay phirtay hain. hamen mukkay maaray jaatay hain. hamaaree koee mustaqil rihaaishgaah naheen. ¹²aur badee mashaqqat say ham apnay haathon say rozee kamaatay hain. laan-taan karnay vaalon ko ham barkat detay hain, eeza denay vaalon ko bardaasht kartay hain. ¹³jo hamen bura-bhala kahetay hain unhen ham dua detay hain. ab tak ham duniya ka kooda-karkat aur ghilaazat banay phirtay hain.

paulus kurinthiyon ka ruhaanee baap hai

¹⁴main aap ko sharminda karnay kay liyay yah naheen likh raha, balki apnay piyaaray bachchay jaan kar samjhaanay kee gharaz say. ¹⁵beshak maseeh eesa men aap kay ustaad to beshumaar hain, lekin baap kam hain. kyoonki maseeh eesa men main hee aap ko allaah kee khushkhabaree suna kar aap ka baap bana. ¹⁶ab main taakeed karta hoon ki aap meray namoonay par chalen. ¹⁷is liyay main nay teemuthiyus ko aap kay paas bhej diya jo khudaavand men mera piyaara aur vafaadaar beta hai. vah aap ko maseeh eesa men meree un hidaayaat kee yaad dilaaega jo main har jagah aur eemaandaaron kee har jamaaat men deta hoon.

¹⁸aap men say baaz yoon phool gaay hain jaisay main ab aap kay paas kabhee naheen aaoonga. ¹⁹lekin agar khudaavand kee marzee huee to jald a kar maaloom karoonga ki kya yah phoolay huay log sirf baaten kar rahay hain ya ki allaah kee qudrat un men kaam kar rahee hai. ²⁰kyoonki allaah kee baadshaahee khaalee baaton say zaahir naheen hotee balki allaah kee qudrat say. ²¹kya aap chaahatay hain ki main chhadee lay kar aap kay paas aaoon ya piyaar aur haleemee kee rooh men