1 Kurinthiyon 3

kurinthus kee bachgaana haalat

¹bhaaiyo, main aap say ruhaanee logon kee baaten na kar saka balki sirf jismaanee logon kee. kyoonki aap ab tak maseeh men chhotay bachchay hain. ²main nay aap ko doodh pilaaya, thos ghiza na khilaaee, kyoonki aap us vaqt is qaabil naheen thay balki ab tak naheen hain. ³abhee tak aap jismaanee hain, kyoonki aap men hasad aur jhagda paaya jaata hai. kya is say yah saabit naheen hota ki aap jismaanee hain aur rooh kay baghair chaltay hain? ⁴jab koee kaheta hai, “main paulus kee paartee ka hoon” aur doosra, “main apullos kee paartee ka hoon” to kya is say yah zaahir naheen hota ki aap ruhaanee naheen balki insaanee soch rakhtay hain?

paulus aur apullos kee haisiyat

⁵apullos kee kya haisiyat hai aur paulus kee kya? donon naukar hain jin kay vaseelay say aap eemaan laaay. aur ham men say har ek nay vahee khidmat anjaam dee jo khudaavand nay us kay sapurd kee. ⁶main nay pauday lagaaay, apullos paanee deta raha, lekin allaah nay unhen ugnay diya. ⁷lihaaza pauda lagaanay vaala aur aabpaashee karnay vaala donon kuchh bhee naheen, balki khuda hee sab kuchh hai jo pauday ko phalnay phoolnay deta hai. ⁸pauda lagaanay aur paanee denay vaala ek jaisay hain, alabatta har ek ko us kee mehanat kay mutaabiq mazdooree milegee. ⁹kyoonki ham allaah kay muaavin hain jabki aap allaah ka khet aur us kee imaarat hain.

¹⁰allaah kay us fazl kay mutaabiq jo mujhay bakhsha gaya main nay ek daanishmand thekedaar kee tarah bunyaad rakhee. is kay baad koee aur us par imaarat taameer kar raha hai. lekin har ek dhyaan rakhay ki vah bunyaad par imaarat kis tarah bana raha hai. ¹¹kyoonki bunyaad rakhee ja chukee hai aur vah hai eesa maseeh. is kay ilaava koee bhee mazeed koee bunyaad naheen rakh sakta. ¹²jo bhee is bunyaad par kuchh taameer karay vah mukhtalif mavaad to istemaal kar sakta hai, maslan sona, chaandee, qeemtee patthar, lakdee, sookhee ghaas ya bhoosa, ¹³lekin aakhir men har ek ka kaam zaahir ho jaaega. qiyaamat kay din kuchh posheeda naheen rahega balki aag sab kuchh zaahir kar degee. vah saabit kar degee ki har kisee nay kaisa kaam kiya hai. ¹⁴agar us ka taameeree kaam na jala jo us nay is bunyaad par kiya to usay ajr milega. ¹⁵agar us ka kaam jal gaya to usay nuqsaan pahunchega. khud to vah bach jaaega magar jaltay jaltay.

¹⁶kya aap ko maaloom naheen ki aap allaah ka ghar hain, aur aap men allaah ka rooh sukoonat karta hai? ¹⁷agar koee allaah kay ghar ko tabaah karay to allaah usay tabaah karega, kyoonki allaah ka ghar makhsoos-o-muqaddas hai aur yah ghar aap hee hain.

apnay baaray men shekhee na maarnaa

¹⁸koee apnay aap ko fareb na day. agar aap men say koee samjhay ki vah is duniya kee nazar men daanishmand hai to phir zarooree hai ki vah bevuqoof banay taaki vaaqaee daanishmand ho jaaay. ¹⁹kyoonki is duniya kee hikmat allaah kee nazar men bevuqoofee hai. chunaanchay muqaddas navishton men likha hai, “vah daanishmandon ko un kee apnee chaalaakee kay phanday men phansa deta hai.” ²⁰yah bhee likha hai, “rabb daanishmandon kay khayaalaat ko jaanta hai ki vah baatil hain.” ²¹gharaz koee kisee insaan kay baaray men shekhee na maaray. sab kuchh to aap ka hai. ²²paulus, apullos, kaifa, duniya, zindagee, maut, maujooda jahaan kay aur mustaqbil kay umoor sab kuchh aap ka hai. ²³lekin aap maseeh kay hain aur maseeh allaah ka hai.