1 Kurinthiyon 16

yarooshalam kee jamaaat kay liyay chandaa

¹rahee chanday kee baat jo yarooshalam kay muqaddaseen kay liyay jama kiya ja raha hai to usee hidaayat par amal karen jo main galtiya kee jamaaaton ko day chuka hoon. ²har itwaar ko aap men say har koee apnay kamaaay huay paison men say kuchh is chanday kay liyay makhsoos karkay apnay paas rakh chhoday. phir meray aanay par hadiyaajaat jama karnay kee zaroorat naheen padegee. ³jab main aaoonga to aisay afraad ko jo aap kay nazdeek qaabil-ay-etimaad hain khutoot day kar yarooshalam bhejoonga taaki vah aap ka hadiya vahaan tak pahuncha den. ⁴agar munaasib ho ki main bhee jaaoon to vah meray saath jaaengay.

⁵main makiduniya say ho kar aap kay paas aaoonga kyoonki makiduniya men say safar karnay ka iraada rakhta hoon. ⁶shaayad aap kay paas thoday arsay kay liyay thaheroon, lekin yah bhee mumkin hai ki sardiyon ka mausam aap hee kay saath kaatoon taaki meray baad kay safar kay liyay aap meree madad kar saken. ⁷main naheen chaahata ki is dafa mukhtasar mulaaqaat kay baad chalta banoon, balki meree khwaahish hai ki kuchh vaqt aap kay saath guzaaroon. shart yah hai ki khudaavand mujhay ijaazat day.

⁸lekin eed-ay-pantikust tak main ifisus men hee thaheroonga, ⁹kyoonki yahaan meray saamnay muassir kaam kay liyay ek bada darvaaza khul gaya hai aur saath hee bahut say mukhaalif bhee paida ho gaay hain.

¹⁰agar teemuthiyus aaay to is ka khayaal rakhen ki vah bilaakhauf aap kay paas rah sakay. meree tarah vah bhee khudaavand kay khet men fasal kaat raha hai. ¹¹is liyay koee usay haqeer na jaanay. usay salaamatee say safar par ravaana karen taaki vah mujh tak pahunchay, kyoonki main aur deegar bhaaee us kay muntazir hain.

¹²bhaaee apullos kee main nay badee hausalaaafzaaee kee hai ki vah deegar bhaaiyon kay saath aap kay paas aaay, lekin allaah ko qat’an manzoor na tha. taaham mauqa milnay par vah zaroor aaega.

naseehaten aur salaam

¹³jaagtay rahen, eemaan men saabitqadam rahen, mardaangee dikhaaen, mazboot banay rahen. ¹⁴sab kuchh muhabbat say karen.

¹⁵bhaaiyo, main ek baat men aap ko naseehat karna chaahata hoon. aap jaantay hain ki stifanaas ka gharaana akhya ka pahela phal hai aur ki unhon nay apnay aap ko muqaddaseen kee khidmat kay liyay vaqf kar rakha hai. ¹⁶aap aisay logon kay taabay rahen aur saath hee har us shakhs kay jo un kay saath khidmat kay kaam men jaanfishaanee karta hai.

¹⁷stifanaas, furtoonaatus aur akheekus kay pahunchnay par main bahut khush hua, kyoonki unhon nay vah kamee pooree kar dee jo aap kee gairahaaziree say paida huee thee. ¹⁸unhon nay meree rooh ko aur saath hee aap kee rooh ko bhee taaza kiya hai. aisay logon kee qadar karen.

¹⁹aasiya kee jamaaaten aap ko salaam kahetee hain. akvila aur priskilla aap ko khudaavand men purjosh salaam kahetay hain aur un kay saath vah jamaaat bhee jo un kay ghar men jama hotee hai. ²⁰tamaam bhaaee aap ko salaam kahetay hain. ek doosray ko muqaddas bosa detay huay salaam kahen.

²¹yah salaam main yaanee paulus apnay haath say likhta hoon.

²²laanat us shakhs par jo khudaavand say muhabbat naheen rakhta.

ai hamaaray khudaavand, a! ²³khudaavand eesa ka fazl aap kay saath rahay.

²⁴maseeh eesa men aap sab ko mera piyaar.