1 Kurinthiyon 15
maseeh ka jee uthnaa
1bhaaiyo, main aap kee tavajjuh us khushkhabaree kee taraf dilaata hoon jo main nay aap ko sunaaee, vahee khushkhabaree jisay aap nay qabool kiya aur jis par aap qaaim bhee hain. 2isee paighaam kay vaseelay say aap ko najaat miltee hai. shart yah hai ki aap vah baaten joon kee toon thaamay rakhen jis tarah main nay aap tak pahunchaaee hain. beshak yah baat is par munhasir hai ki aap ka eemaan laana bemaqsad naheen tha.
3kyoonki main nay is par khaas zor diya ki vahee kuchh aap kay sapurd karoon jo mujhay bhee mila hai. yah ki maseeh nay paak navishton kay mutaabiq hamaaray gunaahon kee khaatir apnee jaan dee, 4phir vah dafan hua aur teesray din paak navishton kay mutaabiq jee utha. 5vah patras ko dikhaaee diya, phir baarah shaagirdon ko. 6is kay baad vah ek hee vaqt paanch sau say ziyaada bhaaiyon par zaahir hua. un men say beshatar ab tak zinda hain agarchi chand ek intiqaal kar chukay hain. 7phir yaaqoob nay usay dekha, phir tamaam rasoolon nay.
8aur sab kay baad vah mujh par bhee zaahir hua, mujh par jo goya qabal az vaqt paida hua. 9kyoonki rasoolon men mera darja sab say chhota hai, balki main to rasool kahelaanay kay bhee laaiq naheen, is liyay ki main nay allaah kee jamaaat ko eeza pahunchaaee. 10lekin main jo kuchh hoon allaah kay fazl hee say hoon. aur jo fazl us nay mujh par kiya vah beasar na raha, kyoonki main nay un sab say ziyaada jaanfishaanee say kaam kiya hai. alabatta yah kaam main nay khud naheen balki allaah kay fazl nay kiya hai jo meray saath tha. 11khair, yah kaam main nay kiya ya unhon nay, ham sab usee paighaam kee munaadee kartay hain jis par aap eemaan laaay hain.
jee uthnay par etiraaz
12ab mujhay yah bataaen, ham to munaadee kartay hain ki maseeh murdon men say jee utha hai. to phir aap men say kuchh log kaisay kah saktay hain ki murday jee naheen uthtay? 13agar murday jee naheen uthtay to matlab yah hua ki maseeh bhee naheen jee utha. 14aur agar maseeh jee naheen utha to phir hamaaree munaadee abas hotee aur aap ka eemaan laana bhee befaaida hota. 15neez ham allaah kay baaray men jhootay gavaah saabit hotay. kyoonki ham gavaahee detay hain ki allaah nay maseeh ko zinda kiya jabki agar vaaqaee murday naheen jee uthtay to vah bhee zinda naheen hua. 16gharaz agar murday jee naheen uthtay to phir maseeh bhee naheen jee utha. 17aur agar maseeh naheen jee utha to aap ka eemaan befaaida hai aur aap ab tak apnay gunaahon men giriftaar hain. 18haan, is kay mutaabiq jinhon nay maseeh men hotay huay intiqaal kiya hai vah sab halaak ho gaay hain. 19chunaanchay agar maseeh par hamaaree ummeed sirf isee zindagee tak mahdood hai to ham insaanon men sab say ziyaada qaabil-ay-rahem hain.
maseeh vaaqaee jee utha hai
20lekin maseeh vaaqaee murdon men say jee utha hai. vah intiqaal kiay huon kee fasal ka pahela phal hai. 21choonki insaan kay vaseelay say maut aaee, is liyay insaan hee kay vaseelay say murdon kay jee uthnay kee bhee raah khulee. 22jis tarah sab is liyay martay hain ki vah aadam kay farzand hain usee tarah sab zinda kiay jaaengay jo maseeh kay hain. 23lekin jee uthnay kee ek tarteeb hai. maseeh to fasal kay pahelay phal kee haisiyat say jee uth chuka hai jabki us kay log us vaqt jee uthengay jab vah vaapas aaega. 24is kay baad khaatma hoga. tab har hukoomat, ikhtiyaar aur quvvat ko nest karkay vah baadshaahee ko khuda baap kay havaalay kar dega. 25kyoonki laazim hai ki maseeh us vaqt tak hukoomat karay jab tak allaah tamaam dushmanon ko us kay paaon kay neechay na kar day. 26aakhiree dushman jisay nest kiya jaaega maut hogee. 27kyoonki allaah kay baaray men kalaam-ay-muqaddas men likha hai, “us nay sab kuchh us (yaanee maseeh) kay paaon kay neechay kar diya.” jab kaha gaya hai ki sab kuchh maseeh kay ma-tahet kar diya gaya hai, to zaahir hai ki is men allaah shaamil naheen jis nay sab kuchh maseeh kay ma-tahet kiya hai. 28jab sab kuchh maseeh kay ma-tahet kar diya gaya tab farzand khud bhee usee kay ma-tahet ho jaaega jis nay sab kuchh us kay ma-tahet kiya. yoon allaah sab men sab kuchh hoga.
jee uthnay kay pesh-ay-nazar zindagee guzaarnaa
29agar murday vaaqaee jee naheen uthtay to phir vah log kya karengay jo murdon kee khaatir baptisma letay hain? agar murday jee naheen uthengay to phir vah un kee khaatir kyoon baptisma letay hain? 30aur ham bhee har vaqt apnee jaan khatray men kyoon daalay huay hain? 31bhaaiyo, main rozaana marta hoon. yah baat utnee hee yaqeenee hai jitnee yah ki aap hamaaray khudaavand maseeh eesa men mera fakhar hain. 32agar main sirf isee zindagee kee ummeed rakhtay huay ifisus men vaheshee darindon say lada to mujhay kya faaida hua? agar murday jee naheen uthtay to is qaul kay mutaabiq zindagee guzaarna behatar hoga ki “aao, ham khaaen pien, kyoonki kal to mar hee jaana hai.”
33fareb na khaaen, buree sohbat achchhee aadton ko bigaad detee hai. 34pooray taur par hosh men aaen aur gunaah na karen. aap men say baaz aisay hain jo allaah kay baaray men kuchh naheen jaantay. yah baat main aap ko sharm dilaanay kay liyay kaheta hoon.
murday kis tarah jee uthenge
35shaayad koee savaal uthaaay, “murday kis tarah jee uthtay hain? aur jee uthnay kay baad un ka jism kaisa hoga?” 36bhaee, aqal say kaam len. jo beej aap botay hain vah us vaqt tak naheen ugta jab tak ki mar na jaaay. 37jo aap botay hain vah vahee pauda naheen hai jo baad men ugega balki mahez ek nanga sa daana hai, khwaah gandum ka ho ya kisee aur cheez ka. 38lekin allaah usay aisa jism deta hai jaisa vah munaasib samajhta hai. har qism kay beej ko vah us ka khaas jism ata karta hai.
39tamaam jaandaaron ko ek jaisa jism naheen mila balki insaanon ko aur qism ka, maveshiyon ko aur qism ka, parindon ko aur qism ka, aur machhliyon ko aur qism ka.
40is kay ilaava aasmaanee jism bhee hain aur zameenee jism bhee. aasmaanee jismon kee shaan aur hai aur zameenee jismon kee shaan aur. 41sooraj kee shaan aur hai, chaand kee shaan aur, aur sitaaron kee shaan aur, balki ek sitaara shaan men doosray sitaaray say farq hai.
42murdon ka jee uthna bhee aisa hee hai. jism faanee haalat men boya jaata hai aur laafaanee haalat men jee uthta hai. 43vah zaleel haalat men boya jaata hai aur jalaalee haalat men jee uthta hai. vah kamzor haalat men boya jaata hai aur qavee haalat men jee uthta hai. 44fitratee jism boya jaata hai aur ruhaanee jism jee uthta hai. jahaan fitratee jism hai vahaan ruhaanee jism bhee hota hai. 45paak navishton men bhee likha hai ki pahelay insaan aadam men jaan a gaee. lekin aakhiree aadam zinda karnay vaalee rooh bana. 46ruhaanee jism pahelay naheen tha balki fitratee jism, phir ruhaanee jism hua. 47pahela insaan zameen kee mittee say bana tha, lekin doosra aasmaan say aaya. 48jaisa pahela khaakee insaan tha vaisay hee deegar khaakee insaan bhee hain, aur jaisa aasmaan say aaya hua insaan hai vaisay hee deegar aasmaanee insaan bhee hain. 49yoon ham is vaqt khaakee insaan kee shakl-o-soorat rakhtay hain jabki ham us vaqt aasmaanee insaan kee shakl-o-soorat rakhengay.
maut par fatah
50bhaaiyo, main yah kahena chaahata hoon ki khaakee insaan ka maujooda jism allaah kee baadshaahee ko meeraas men naheen pa sakta. jo kuchh faanee hai vah laafaanee cheezon ko meeraas men naheen pa sakta.
51dekho main aap ko ek bhed bataata hoon. ham sab vafaat naheen paaengay, lekin sab hee badal jaaengay. 52aur yah achaanak, aankh jhapaktay men, aakhiree bigal bajtay hee roonuma hoga. kyoonki bigal bajnay par murday laafaanee haalat men jee uthengay aur ham badal jaaengay. 53kyoonki laazim hai ki yah faanee jism baqa ka libaas pahen lay aur marnay vaala jism abdee zindagee ka. 54jab is faanee aur marnay vaalay jism nay baqa aur abdee zindagee ka libaas pahen liya hoga to phir vah kalaam poora hoga jo paak navishton men likha hai ki
“maut ilaahee fatah ka luqma ho gaee hai.
55ai maut, teree fatah kahaan rahee?
ay maut, tera dank kahaan raha?”
56maut ka dank gunaah hai aur gunaah shareeat say taqviyat paata hai. 57lekin khuda ka shukr hai jo hamen hamaaray khudaavand eesa maseeh kay vaseelay say fatah bakhshta hai.
58gharaz, meray piyaaray bhaaiyo, mazboot banay rahen. koee cheez aap ko daanvaandol na kar day. hamesha khudaavand kee khidmat jaanfishaanee say karen, yah jaantay huay ki khudaavand kay liyay aap kee mehanat-mashaqqat raaygaan naheen jaaegee.