1 Kurinthiyon 14

nubuvvat aur ghairzabaanen

¹muhabbat ka daaman thaamay rakhen. lekin saath hee ruhaanee nemton ko sargarmee say istemaal men laaen, khusoosan nubuvvat kee nemat ko. ²ghairzabaan bolnay vaala logon say naheen balki allaah say baat karta hai. koee us kee baat naheen samajhta kyoonki vah rooh men bhed kee baaten karta hai. ³is kay bar’aks nubuvvat karnay vaala logon say aisee baaten karta hai jo un kee taameer-o-taraqqee, hausalaaafzaaee aur tasallee ka baais bantee hain. ⁴ghairzabaan bolnay vaala apnee taameer-o-taraqqee karta hai jabki nubuvvat karnay vaala jamaaat kee.

⁵main chaahata hoon ki aap sab ghairzabaanen bolen, lekin is say ziyaada yah khwaahish rakhta hoon ki aap nubuvvat karen. nubuvvat karnay vaala ghairzabaanen bolnay vaalay say ahem hai. haan, ghairzabaanen bolnay vaala bhee ahem hai basharteeki apnee zabaan ka tarjuma karay, kyoonki is say khuda kee jamaaat kee taameer-o-taraqqee hotee hai.

⁶bhaaiyo, agar main aap kay paas a kar ghairzabaanen boloon, lekin mukaashfay, ilm, nubuvvat aur taaleem kee koee baat na karoon to aap ko kya faaida hoga? ⁷bejaan saazon par ghaur karnay say bhee yahee baat saamnay aatee hai. agar baansree ya sarod ko kisee khaas sur kay mutaabiq na bajaaya jaaay to phir sunnay vaalay kis tarah pahechaan sakengay ki in par kya kya pesh kiya ja raha hai? ⁸isee tarah agar bigal kee aavaaz jang kay liyay tayyaar ho jaanay kay liyay saaf taur say na bajay to kya faujee kamarbasta ho jaaengay? ⁹agar aap saaf saaf baat na karen to aap kee haalat bhee aisee hee hogee. phir aap kee baat kaun samjhega? kyoonki aap logon say naheen balki hava say baaten karengay. ¹⁰is duniya men bahut ziyaada zabaanen bolee jaatee hain aur in men say koee bhee naheen jo bemaanee ho. ¹¹agar main kisee zabaan say vaaqif naheen to main us zabaan men bolnay vaalay kay nazdeek ajnabee thaheroonga aur vah meray nazdeek. ¹²yah usool aap par bhee laagoo hota hai. choonki aap ruhaanee nemton kay liyay tadaptay hain to phir khaaskar un nemton men maahir bannay kee koshish karen jo khuda kee jamaaat ko taameer kartee hain.

¹³chunaanchay ghairzabaan bolnay vaala dua karay ki is ka tarjuma bhee kar sakay. ¹⁴kyoonki agar main ghairzabaan men dua karoon to meree rooh to dua kartee hai magar meree aqal beamal rahetee hai. ¹⁵to phir kya karoon? main rooh men dua karoonga, lekin aqal ko bhee istemaal karoonga. main rooh men hamd-o-sana karoonga, lekin aqal ko bhee istemaal men laaoonga. ¹⁶agar aap sirf rooh men hamd-o-sana karen to haazireen men say jo aap kee baat naheen samajhta vah kis tarah aap kee shukrguzaaree par “aameen” kah sakega? usay to aap kee baaton kee samajh hee naheen aaee. ¹⁷beshak aap achchhee tarah khuda ka shukr kar rahay hongay, lekin is say doosray shakhs kee taameer-o-taraqqee naheen hogee.

¹⁸main khuda ka shukr karta hoon ki aap sab kee nisbat ziyaada ghairzabaanon men baat karta hoon. ¹⁹phir bhee main khuda kee jamaaat men aisee baaten pesh karna chaahata hoon jo doosray samajh saken aur jin say vah tarbiyat haasil kar saken. kyoonki ghairzabaanon men bolee gaee beshumaar baaton kee nisbat paanch tarbiyat denay vaalay alfaaz kaheen behatar hain.

²⁰bhaaiyo, bachchon jaisee soch say baaz aaen. buraaee kay lihaaz say to zaroor bachchay banay rahen, lekin samajh men baaligh ban jaaen. ²¹shareeat men likha hai, “rabb farmaata hai ki main ghairzabaanon aur ajnabiyon kay honton kee maarifat is qaum say baat karoonga. lekin vah phir bhee meree naheen sunengay.” ²²is say zaahir hota hai ki ghairzabaanen eemaandaaron kay liyay imtiyaazee nishaan naheen hoteen balki ghaireemaandaaron kay liyay. is kay bar’aks nubuvvat ghaireemaandaaron kay liyay imtiyaazee nishaan naheen hotee balki eemaandaaron kay liyay.

²³ab farz karen ki eemaandaar ek jagah jama hain aur tamaam haazireen ghairzabaanen bol rahay hain. isee asna men ghairzabaan ko na samajhnay vaalay ya ghaireemaandaar a shaamil hotay hain. aap ko is haalat men dekh kar kya vah aap ko deevaana qaraar naheen dengay? ²⁴is kay muqaablay men agar tamaam log nubuvvat kar rahay hon aur koee ghaireemaandaar andar aaay to kya hoga? vah sab usay qaail kar lengay ki gunaahgaar hai aur sab usay parakh lengay. ²⁵yoon us kay dil kee posheeda baaten zaahir ho jaaengee, vah gir kar allaah ko sijda karega aur tasleem karega ki filaheqeeqat allaah aap kay darmiyaan maujood hai.

jamaaat men tarteeb kee zaroorat

²⁶bhaaiyo, phir kya hona chaahiay? jab aap jama hotay hain to har ek kay paas koee geet ya taaleem ya mukaashfa ya ghairzabaan ya is ka tarjuma ho. in sab ka maqsad khuda kee jamaaat kee taameer-o-taraqqee ho. ²⁷ghairzabaan men boltay vaqt sirf do ya ziyaada say ziyaada teen ashkhaas bolen aur vah bhee baaree baaree. saath hee koee un ka tarjuma bhee karay. ²⁸agar koee tarjuma karnay vaala na ho to ghairzabaan bolnay vaala jamaaat men khaamosh rahay, alabatta usay apnay aap say aur allaah say baat karnay kee aazaadee hai. ²⁹nabiyon men say do ya teen nubuvvat karen aur doosray un kee baaton kee sehat ko parkhen. ³⁰agar is dauraan kisee baithay huay shakhs ko koee mukaashfa milay to pahela shakhs khaamosh ho jaaay. ³¹kyoonki aap sab baaree baaree nubuvvat kar saktay hain taaki tamaam log seekhen aur un kee hausalaaafzaaee ho. ³²nabiyon kee roohen nabiyon kay taabay rahetee hain, ³³kyoonki allaah betarteebee ka naheen balki salaamatee ka khuda hai.

jaisa muqaddaseen kee tamaam jamaaaton ka dastoor hai ³⁴khavaateen jamaaat men khaamosh rahen. unhen bolnay kee ijaazat naheen, balki vah faramaambardaar rahen. shareeat bhee yahee farmaatee hai. ³⁵agar vah kuchh seekhna chaahen to apnay ghar par apnay shauhar say poochh len, kyoonki aurat ka khuda kee jamaaat men bolna sharm kee baat hai.

³⁶kya allaah ka kalaam aap men say nikla hai, ya kya vah sirf aap hee tak pahuncha hai? ³⁷agar koee khayaal karay ki main nabee hoon ya khaas ruhaanee haisiyat rakhta hoon to vah jaan lay ki jo kuchh main aap ko likh raha hoon vah khudaavand ka hukm hai. ³⁸jo yah nazar’andaaz karta hai usay khud bhee nazar’andaaz kiya jaaega.

³⁹gharaz bhaaiyo, nubuvvat karnay kay liyay tadaptay rahen, alabatta kisee ko ghairzabaanen bolnay say na roken. ⁴⁰lekin sab kuchh shaaistagee aur tarteeb say amal men aaay.