1 Kurinthiyon 13

muhabbat

¹agar main insaanon aur farishton kee zabaanen boloon, lekin muhabbat na rakhoon to phir main bas goonjta hua ghadiyaal ya thanthanaatee huee jhaanjh hee hoon. ²agar meree nubuvvat kee nemat ho aur mujhay tamaam bhedon aur har ilm say vaaqfiyat ho, saath hee mera aisa eemaan ho ki pahaadon ko khiska sakoon, lekin mera dil muhabbat say khaalee ho to main kuchh bhee naheen. ³agar main apna saara maal ghareebon men taqseem kar doon balki apna badan jalaaay jaanay kay liyay day doon, lekin mera dil muhabbat say khaalee ho to mujhay kuchh faaida naheen. ⁴muhabbat sabr say kaam letee hai, muhabbat meharbaan hai. na yah hasad kartee hai na deengen maartee hai. yah phooltee bhee naheen.

⁵muhabbat badtameezee naheen kartee na apnay hee faaiday kee talaash men rahetee hai. yah jaldee say ghussay men naheen a jaatee aur doosron kee ghaltiyon ka rikaard naheen rakhtee. ⁶yah naainsaafee dekh kar khush naheen hotee balki sachchaaee kay ghaalib aanay par hee khushee manaatee hai. ⁷yah hamesha doosron kee kamzoriyaan bardaasht kartee hai, hamesha etimaad kartee hai, hamesha ummeed rakhtee hai, hamesha saabitqadam rahetee hai.

⁸muhabbat kabhee khatm naheen hotee. is kay muqaablay men nubuvvaten khatm ho jaaengee, ghairzabaanen jaatee rahengee, ilm mit jaaega. ⁹kyoonki is vaqt hamaara ilm naamukammal hai aur hamaaree nubuvvat sab kuchh zaahir naheen kartee. ¹⁰lekin jab vah kuchh aaega jo kaamil hai to yah adhooree cheezen jaatee rahengee. ¹¹jab main bachcha tha to bachchay kee tarah bolta, bachchay kee see soch rakhta aur bachchay kee see samajh say kaam leta tha. lekin ab main baaligh hoon, is liyay main nay bachchay ka sa andaaz chhod diya hai. ¹²is vaqt hamen aaeenay men dhundala sa dikhaaee deta hai, lekin us vaqt ham roo-ba-roo dekhengay. ab main juzvee taur par jaanta hoon, lekin us vaqt kaamil taur say jaan loonga, aisay hee jaisay allaah nay mujhay pahelay say jaan liya hai.

¹³gharaz eemaan, ummeed aur muhabbat teenon qaaim rahetay hain, lekin in men afzal muhabbat hai.